ក្លិប Al Nassr ផ្តល់សំណើធំនាំយកលោក Zinedine Zidane មកធ្វើជាគ្រូបង្វឹកថ្មី

បាល់ទាត់
April 20th, 2023 (2 years)
1534 Views
Share

ក្លិប Al Nassr នៅលីគកំពូលបាល់ទាត់អារ៉ាប៊ីសាអ៊ូឌីត ដែលមានខ្សែប្រយុទ្ធ Cristiano Ronaldo កំពុងលេងនៅទីនោះ ត្រូវបានរាយការណ៍ថា បានដាក់សំណើទៅកាន់លោក Zinedine Zidane ដើម្បីនាំយករូបលោក មកធ្វើជាគ្រូបង្វឹកថ្មី។

ប្រព័ន្ធផ្សព្វផ្សាយអារ៉ាប៊ីសាអ៊ូឌីតបានអះអាងថា កញ្ចប់ទឹកប្រាក់តម្លៃ ១២០ លានអឺរ៉ូសម្រាប់ពីររដូវកាល ឬ ៦០ លានអឺរ៉ូក្នុងមួយឆ្នាំ បានផ្ដល់ជូនលោក Zidane។ យ៉ាងណា មកដល់ពេលនេះ អតីតគ្រូបង្វឹក Real Madrid មិនបានឆ្លើយតបទៅនឹងការផ្តល់ជូនពីក្លិប Al Nassr នៅឡើយទេ។

បន្ទាប់ពីការបណ្តេញលោក Rudi Garcia ក្លិប Al Nassr បានតែងតាំងលោក Dinko Jelicic ជាគ្រូបង្វឹកបណ្ដោះអាសន្ន ប៉ុន្តែបំណងរបស់ពួកគេគឺចង់នាំយកលោក Zidane មកជួបជុំជាមួយ Cristiano Ronaldo សាជាថ្មី។

ក្លិប Al Nassr កំពុងជួបរដូវកាលមិនល្អរបស់ខ្លួន ដោយប្រឈមការរបូតពានជើងឯកលីគ ក្រោយចាញ់ប៉ុន្មានប្រកួតចុងក្រោយនេះ។ ពួកគេកំពុងឈរនៅលេខ២ នៃតារាងលីគ ដោយចាញ់ក្រុមកំពូលតារាង Al Ittihad រហូតដល់ ៦ពិន្ទុ។

លោក Zinedine Zidane ដែលត្រូវគេទទួលស្គាល់ថា ជាគ្រូបង្វឹកដ៏ជោគជ័យម្នាក់ បើទោះបីជាលោកមានបទពិសោធដឹកនាំតែមួយក្លិបប៉ុណ្ណោះ ពោលគឺ Real Madrid ។ ការដឹកនាំក្លិបអេស្ប៉ាញមួយនេះ លោក Zidane បានឈ្នះពានជាច្រើន ជាពិសេសការឈ្នះពានជើងឯកអឺរ៉ុប Champions League ៣រដូវកាលជាប់ៗគ្នា។ យ៉ាងណា ក្រោយលាលែងតំណែងនៅ Real Madrid ជាលើកទី២ កាលពីឆ្នាំ២០២១ មកនោះ លោក Zinedine Zidane នៅទំនេរមិនទាន់ចូលដឹកនាំក្លិបណាមួយនៅឡើយទេ៕

អត្ថបទទាក់ទង

ក្លិប Al Nassr ផ្តល់សំណើធំនាំយកលោក Zinedine Zidane មកធ្វើជាគ្រូបង្វឹកថ្មី

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស