Real Madrid យកបានខ្សែប្រយុទ្ធ Joselu Mato ពី Espanyol ក្នុងលក្ខខណ្ឌខ្ចីជើង

បាល់ទាត់
June 20th, 2023 (2 years)
494 Views
Share

ក្លិបយក្សអេស្ប៉ាញ Real Madrid បានចុះហត្ថលេខាលើខ្សែប្រយុទ្ធ Joselu Mato ពីក្លិប Espanyol ដែលត្រូវបានកាត់ចោលទៅកាន់ក្របខណ្ឌទី២ លើលក្ខខណ្ឌខ្ចីជើងរយៈពេលមួយរដូវកាល អមដោយជម្រើសក្នុងការទិញផ្តាច់ផងដែរ។

កីឡាករជម្រើសជាតិអេស្ប៉ាញវ័យ ៣៣ ឆ្នាំរូបនេះធ្លាប់ជាសមាជិករបស់ Real Madrid ផងដែរអំឡុងឆ្នាំ ២០០៩-១២ តែបានបង្ហាញខ្លួនត្រឹមតែ២លើកប៉ុណ្ណោះ មុនពេលផ្លាស់ទៅចូលរួមជាមួយ Hoffenheim របស់អាល្លឺម៉ង់។

Joselu ដែលធ្លាប់លេងនៅ Stoke City និង Newcastle United នៅទឹកដីអង់គ្លេសដែរនោះ ធ្លាប់ស៊ុតបញ្ចូលទីបាន ១៦ គ្រាប់ក្នុងការបង្ហាញខ្លួន ៣៣ លើកសម្រាប់ Espanyol កាលពីរដូវកាលមុន និងទទួលបានការកោះហៅជាលើកដំបូងរបស់ខ្លួនទៅកាន់ក្រុមជម្រើសជាតិអេស្ប៉ាញក្នុងខែមីនា។

Real Madrid បាននិយាយនៅលើគេហទំព័ររបស់ពួកគេថា ក្លិបនឹងធ្វើពិធីបង្ហាញ Joselu ក្នុងនាមជាកីឡាករថ្មីរបស់ខ្លួនដែលនឹងប្រព្រឹត្តទៅនាពេលឆាប់ៗនេះ។

សម្រាប់ការនាំយក Joselu មកនេះ មានការជឿថា គឺ Real Madrid នឹងប្រើប្រាស់រូបគេ មកបំពេញកន្លែងរបស់ Karim Benzema ។

Joselu បានផ្ទេរទៅទីនោះ ដោយខាង Real Madrid ចាយលុយទូទាត់តែថ្លៃប្រាក់ពលកម្មសរុបមួយរដូវកាលពេញឱ្យតែ ៥០០ ០០០ អឺរ៉ូប៉ុណ្ណោះ។ ចំណែកឯថ្លៃផ្តាច់កុងត្រា ១,៥ លានអឺរ៉ូ ជាសិទ្ធិដែល Real Madrid អាចសម្រេចថាទិញយកឬអត់ នៅបញ្ចប់រដូវកាលបន្ទាប់៕

អត្ថបទទាក់ទង

Real Madrid យកបានខ្សែប្រយុទ្ធ Joselu Mato ពី Espanyol ក្នុងលក្ខខណ្ឌខ្ចីជើង

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស