Paris Saint Germain តែងតាំងលោក Luis Enrique ជាគ្រូបង្វឹកថ្មីភ្លាមៗក្រោយបញ្ចប់តំណែងរបស់លោក Christophe Galtier

បាល់ទាត់
July 6th, 2023 (2 years)
427 Views
Share

ក្លិបម្ចាស់ជើងឯក Ligue 1, Paris St Germain បានបណ្តេញគ្រូបង្វឹកលោក Christophe Galtier កាលពីថ្ងៃពុធ ហើយតែងតាំងអតីតគ្រូបង្វឹក Barcelona និងក្រុមជម្រើសជាតិអេស្ប៉ាញ លោក Luis Enrique មកកាន់តំណែងជាបន្តភា្លមៗ។

លោក Luis Enrique បានដឹកនាំក្រុម Barcelona ទទួលបានពានរង្វាន់បីក្នុងរដូវកាល ២០១៤-១៥ ខណៈរូបលោកក៏បានដឹកនាំក្រុមជម្រើសជាតិអេស្ប៉ាញទៅកាន់វគ្គពាក់កណ្តាលផ្តាច់ព្រ័ត្រនៃពានរង្វាន់ជើងឯកទ្វីបអឺរ៉ុបឆ្នាំ២០២០។ លោកត្រូវបានបណ្តេញចេញពីតំណែង ក្រោយពីពួកគេបានធ្លាក់ចេញពីការប្រកួតបាល់ទាត់ពិភពលោកឆ្នាំ ២០២២ វគ្គ ១៦ ក្រុមចុងក្រោយ។ បន្ទាប់ពីនោះបុរសវ័យ ៥៣ឆ្នាំ មិនមានក្រុមដឹកនាំទេ តែពេលនេះលោកបានមកកាន់តំណែងនៅ PSG ដោយចុះកិច្ចសន្យាដល់ឆ្នាំ ២០២៥។ លោក Enrique ត្រូវមានការងារធំនោះគឺការដឹកនាំក្រុមអោយឈ្នះពានរង្វាន់ Champions League។

ក្នុងការបង្ហាញខ្លួនជាផ្លូវការលោក Luis Enrique បានឱ្យដឹងថា៖ “ខ្ញុំមានសម្ពាធគឺការដឹកនាំក្រុមឱ្យឈ្នះពានរង្វាន់ Champions League ប៉ុន្តែ ខ្ញុំចូលចិត្តសម្ពាធនេះ។ ក្រុមនៅអឺរ៉ុបជាច្រើន ក៏មានសុបិនដូចគ្នានេះដែរ។ ការប្រកួត Champions League វាពិបាកណាស់ ព្រោះអ្នកធ្លាក់ចេញពីការប្រកួត គ្រប់ពេល ប៉ុន្តែយើងខិតខំឱ្យខ្លាំងជាងនេះ”។

ដោយឡែក ប្រធានក្លិប PSG លោក Nasser Al-Khelaifi បានស្វាគមន៍គ្រូបង្វឹកថ្មី ហើយបាននិយាយថា អនាគតរបស់កីឡាករ Kylian Mbappe នឹងក្លាយជាប្រធានបទនៃការពិភាក្សានៅ PSG ក្នុងរយៈពេលប៉ុន្មានខែខាងមុខនេះ។

Mbappe បានផ្ញើសំបុត្រទៅ PSG កាលពីខែមុនដោយបញ្ជាក់ថា គេគ្មានចេតនាបន្តកិច្ចសន្យាដែលនឹងផុតកំណត់នៅឆ្នាំ ២០២៤។ ប៉ុន្តែក្រោយមកគេបានបញ្ជាក់យ៉ាងច្បាស់ថា គេមិនបានសុំឱ្យក្លិបបារាំងអនុញ្ញាតឱ្យគេផ្ទេរទៅក្លិបអេស្ប៉ាញ Real Madrid នោះទេ។

លោក Al-Khelaifi បាននិយាយថា Mbappe ត្រូវតែចុះហត្ថលេខាលើកិច្ចសន្យាថ្មី ប្រសិនបើគេចង់បន្តនៅក្លិប ខណៈដែលម្ចាស់ជើងឯកបារាំង នឹងមិនអនុញ្ញាតឱ្យកីឡាករចាកចេញដោយឥតគិតថ្លៃនៅឆ្នាំក្រោយនោះឡើយ៕

អត្ថបទទាក់ទង

Paris Saint Germain តែងតាំងលោក Luis Enrique ជាគ្រូបង្វឹកថ្មីភ្លាមៗក្រោយបញ្ចប់តំណែងរបស់លោក Christophe Galtier

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស