អបអរសាទរក្រុមបាល់ទះក្រសួងមហាផ្ទៃឈ្នះមេដាយមាសក្នុងព្រឹត្តិការណ៍កីឡានគរបាល និងកងពន្លត់អគ្គិភ័យពិភពលោក

កីឡាចម្រុះ
July 31st, 2023 (1 year)
530 Views
Share

ក្រុមបាល់ទះក្រសួងមហាផ្ទៃ នៃព្រះរាជាណាចក្រកម្ពុជា បានឈ្នះមេដាយមាស ក្នុងព្រឹត្តិការណ៍ ប្រកួតកីឡានគរបាល និងកងពន្លត់អគ្គិភ័យពិភពលោកឆ្នាំ២០២៣ (World Plice & Fire Games 2023) នាទីក្រុង Winnipeg ប្រទេសកាណាដា ដោយបានយកឈ្នះក្រុមបាល់ទះប្រេស៊ីល CBMDF ដោយលទ្ធផល ៣ សិតទល់នឹង ០ នៅក្នុងវគ្គផ្តាច់ព្រ័ត្រ កាលពីយប់មិញ។

សូមជម្រាបថា មុនឈានដល់វគ្គនេះ ក្រុមបាល់ទះក្រសួងមហាផ្ទៃ បានដណ្ដើមបានជ័យជម្នះ ៦ប្រកួតជាប់ៗគ្នា ដោយយកឈ្នះក្រុមប្រេស៊ីល PMDF ២សិតទល់នឹង០ នៅវគ្គពាក់កណ្ដាលផ្ដាច់ព្រ័ត្រ, ហើយក្នុងនោះបានឈ្នះក្រុមម្ចាស់ផ្ទះកាណាដា ២សិតទល់នឹង០, ឈ្នះក្រុមប្រេស៊ីល CBMDF ២សិតទល់នឹង០, ឈ្នះក្រុមអាមេរិក United Volleyball USA ២សិតទល់នឹង០, ឈ្នះក្រុម NYPD Finest ២សិតទល់នឹង០ និងឈ្នះក្រុម Thunder របស់កាណាដា ២សិតទល់នឹង០ នៅក្នុងពូល ដោយឈរនៅកំពូល។

កម្ពុជាបានបញ្ជូនអត្តពលិកជានគរបាលជាតិ ទៅចូលរួមប្រកួតចំនួន ១៣ប្រភេទកីឡារួមមាន៖ កីឡាវាយសី យូដូ ជឺជីតស៊ូ ការ៉ាតេ ហែលទឹក វាយកូនឃ្លីលើតុ បាល់ទះក្នុងសាល បាល់ទះឆ្នេរខ្សាច់ ចំបាប់ ចំបាប់កាច់ដៃ វាយកូនគោល លើកទម្ងន់Bench Press និងកីឡាលើកទម្ងន់Push -Pull lifting ស្មើនឹង ៧៦ វិញ្ញាសា។

ដោយមានការអនុញ្ញាតដ៏ខ្ពង់ខ្ពស់ពីរាជរដ្ឋាភិបាលកម្ពុជា និងទទួលបានការអនុញ្ញាត ព្រមទាំងការឧបត្ថម្ភដ៏ខ្ពង់ខ្ពស់ពីសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមប្រឹក្សាកីឡាក្រសួងមហាផ្ទៃ កាលពីព្រឹកថ្ងៃទី២៥ ខែកក្កដា ឆ្នាំ២០២៣ ឯកឧត្តម សរ សិទ្ធិ អនុរដ្ឋលេខាធិការក្រសួងមហាផ្ទៃ ទទួលជួយការងារដឹកនាំអគ្គលេខាធិការដ្ឋាននៃក្រុមប្រឹក្សាកីឡាក្រសួងមហាផ្ទៃ បានដឹកនាំប្រតិភូកីឡាជានគរបាលជាតិកម្ពុជា សរុបចំនួន ៤៩រូប ធ្វើដំណើរទៅចូលរួមក្នុងព្រឹត្តិការណ៍ប្រកួតកីឡានគរបាល និងកងពន្លត់អគ្គិភ័យពិភពលោក (World Police & Fire Games) ដែលតែងប្រារព្វធ្វើឡើងរៀងរាល់ ០២ឆ្នាំម្តង និងមានអត្តពលិក ដែលជានគរបាលមកពីបណ្តាប្រទេសជាង ៧០នៅជុំវិញពិភពលោកតែងតែបានមកចូលរួម ហើយសម្រាប់ឆ្នាំ២០២៣នេះ ព្រឹត្តិការណ៍ប្រកួតបានប្រារព្ធធ្វើឡើងនៅទីក្រុង Winnipeg ប្រទេសកាណាដា។

ចំពោះគោលបំណងនៃការរៀបចំព្រឹត្តិការណ៍ប្រកួតនេះឡើង គឺដើម្បីបង្ហាញពីសាមគ្គីភាព សមត្ថភាព និងទេពកោសល្យរបស់នគរបាលនៃបណ្តាប្រទេសនីមួយៗ ក៏ដូចជាការផ្លាស់ប្តូរ និងចែករំលែកនូវបទពិសោធលើវិស័យកីឡាពីគ្នាទៅវិញទៅមកផងដែរ ដែលកម្មវិធីប្រកួតចាប់ផ្តើមពីថ្ងៃទី២៨ ខែកក្កដា ដល់ថ្ងៃទី០៦ ខែសីហា ឆ្នាំ២០២៣៕

អត្ថបទទាក់ទង

អបអរសាទរក្រុមបាល់ទះក្រសួងមហាផ្ទៃឈ្នះមេដាយមាសក្នុងព្រឹត្តិការណ៍កីឡានគរបាល និងកងពន្លត់អគ្គិភ័យពិភពលោក

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស