ប្រធានសហព័ន្ធបាល់ទាត់អេស្ប៉ាញ ប្រឈមការរបូតតំណែងក្រោយថើបមាត់កីឡាការិនីដោយមិនមានការអនុញ្ញាត

FIFA World Cup, បាល់ទាត់
August 23rd, 2023 (2 years)
1817 Views
Share

ប្រធានសហព័ន្ធកីឡាបាល់ទាត់អេស្ប៉ាញ លោក Luis Rubiales កំពុងប្រឈមនឹងការរបូតតំណែងរបស់ខ្លួន បន្ទាប់ពីបានថើបមាត់កីឡាការិនីដោយមិនមានការអនុញ្ញាត បន្ទាប់ពីក្រុមជម្រើសជាតិនារីអេស្ប៉ាញ ឈ្នះជើងឯក FIFA Women’s World Cup 2023។

បុរសវ័យ៤៥ឆ្នាំ បានថើបមាត់កីឡាការិនីខ្សែបម្រើ Jenni Hermoso អំឡុងពិធីលើកពានរង្វាន់បាល់ទាត់ពិភពលោកនារី ដោយបានឈ្នះក្រុមនារីអង់គ្លេស នៅវគ្គផ្តាច់ព្រ័ត្រ ១-០ កាលពីថ្ងៃទី២០ ខែសីហា ឆ្នាំ ២០២៣ តែ កីឡាការិនី Hermoso បាននិយាយថា នាងមិនបានពេញចិត្តទេ។

យ៉ាងណា សេចក្តីថ្លែងការណ៍មួយ ដែលចេញផ្សាយនៅពេលក្រោយរបស់ Hermoso បាននិយាយការពារលោក Rubiales ពីការរិះគន់របស់មហាជន ដោយថា នៅពេលនោះ គឺជាកាយវិការនៃក្តីស្រលាញ់ និងភាពរីករាយដ៏ក្រៃលែង នៃការឈ្នះពានរង្វាន់ Women’s World Cup។

ដោយឡែក លោក Rubiales បានទទួលស្គាល់កំហុសឆ្គង និងធ្វើការសុំទោសជាសាធារណៈផងដែរ ប៉ុន្តែទង្វើរបស់លោកនៅតែត្រូវបានរដ្ឋមន្ត្រីរដ្ឋាភិបាលអេស្ប៉ាញមួយចំនួនរិះគន់ និងរងការរិះគន់កាន់តែខ្លាំងថែមទៀត នៅលើបណ្តាញទំនាក់ទំនងសង្គម។

ជាក់ស្តែង លោកស្រី Irene Montero រដ្ឋមន្ត្រីសមភាពរបស់អេស្ប៉ាញបាននិយាយថា៖ “វាជាទម្រង់នៃការបំពានផ្លូវភេទ ដែលស្ត្រីទទួលរងការឈឺចាប់ជារៀងរាល់ថ្ងៃ រហូតមកដល់ពេលនេះ វាត្រូវបានគេមើលរំលង យើងមិនអាចធ្វើវាឱ្យធម្មតាបានទេ។ យើងមិនគួរសន្មតថា ការថើបដោយគ្មានការយល់ព្រមពីភាគីម្ខាងទៀត គឺជាអ្វីកើតឡើងធម្មតានោះទេ។”

ទោះបានធ្វើសុំទោសជាសាធារណៈ ក៏ដោយ លោក Rubiales នៅតែទទួលបានការមិនពេញចិត្តពីមហាជន ហើយគេចង់ឃើញប្រធានសហព័ន្ធកីឡាបាល់ទាត់អេស្ប៉ាញរូបនេះ លាលែងចេញពីតំណែងចំពោះទង្វើមិនអាចទទួលយកបាន៕

អត្ថបទទាក់ទង

ប្រធានសហព័ន្ធបាល់ទាត់អេស្ប៉ាញ ប្រឈមការរបូតតំណែងក្រោយថើបមាត់កីឡាការិនីដោយមិនមានការអនុញ្ញាត

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស