ក្រោយបង្ហាញខ្លួនជាសមាជិកSevillaជាផ្លូវការ Sergio Ramos ថាខ្លួនវិលត្រឡប់មកវិញតាមបេះដូងចង់បាន

បាល់ទាត់
September 7th, 2023 (2 years)
531 Views
Share

ខ្សែការពារ Sergio Ramos បានបង្ហាញខ្លួនជាសមាជិកថ្មីរបស់ Sevilla ជាផ្លូវការ ហើយ ខណៈកម្មវិធីបង្ហាញខ្លួនរបស់គេ បានទទួលការស្វាគមន៍ពីអ្នកគាំទ្រយ៉ាងច្រើន នាកីឡដ្ឋាន Ramón Sánchez Pizjuán ស្ថិតក្នុងទីក្រុង Seville ប្រទេសអេស្ប៉ាញ។

ជាការពិត Ramos បានសម្រេចចិត្តវិលត្រលប់មកកាន់ក្លិប Sevilla វិញក្នុងនាមជាកីឡាករគ្មានតម្លៃខ្លួន បន្ទាប់ពីចាកចេញអស់រយ:ពេល ១៨ ឆ្នាំ ខណៈនេះហាក់ជាការផ្ទេរដ៏គួរឱ្យភ្ញាក់ផ្អើលមួយ ក្រោយពីរូបគេសុខចិត្តចោលសំណើក្លិបធំៗជាច្រើន។

អតីតខ្សែការពារ Real Madrid គ្មានក្លិបលេងចាប់តាំងពីដើមខែមិថុនា បន្ទាប់ពីផុតកុងត្រាជាមួយក្លិប Paris Saint-Germain ប៉ុន្តែគេបានសម្រេចចិត្តបដិសេធសំណើលុយមហាសាលពីបណ្តាក្លិបនៅអារ៉ាប៊ីសាអ៊ូឌីត និងតួកគី ដើម្បីមកចូលរួមជាមួយ Sevilla ដោយចុះកុងត្រារយៈពេល១ឆ្នាំ។

ក្រុមរបស់គ្រូបង្វឹកលោក Jose Luis Mendilibar នឹងចំណាយសម្រាប់ Ramos ជាង២លានអឺរ៉ូប៉ុណ្ណោះ បើទោះបីជាក្លិប Al Ittihad ហ៊ានផ្តល់ជូនដល់ ២២លានអឺរ៉ូក៏ដោយ តែរូបគេមិនបានចាប់អារម្មណ៍នោះឡើយ។

យ៉ាងណាមិញ បន្ទាប់ពីការបង្ហាញខ្លួនជាសមាជិកថ្មីជាផ្លូវការ Ramos ក៏បាននិយាយក្នុងបទសម្ភាសដំបូងជាមួយក្លិប អំពីការសម្រេចចិត្តរបស់គេ។

Sergio Ramos បាននិយាយថា៖ “ខ្ញុំមានឱកាសបន្តនៅទីក្រុងប៉ារីស ២ ឆ្នាំទៀត តែខ្ញុំមិនចង់ទេ។ ខ្ញុំតែងតែសម្រេចចិត្ត ដោយសារតែកម្លាំងចិត្ត និងបេះដូង។ វាមិនមែនដោយសារលុយទេ។ នោះហើយជាមូលហេតុដែលខ្ញុំមិនបានទៅលេងនៅអារ៉ាប់។ នោះហើយជាមូលហេតុ ដែលខ្ញុំចុះហត្ថលេខាជាមួយ Sevilla ។ ពេលខ្លះអ្វីៗកើតឡើងដោយហេតុផលមួយ ហើយខ្ញុំជឿជាក់លើថាមពល។ សម្រាប់ខ្ញុំ វាជាសុបិនមួយ ដើម្បីត្រលប់មកទីនេះវិញ។”

Ramos ធំធាត់នៅជាយក្រុង Seville ហើយបានចូលហ្វឹកហាត់នៅថ្នាលរបស់ក្លិបមួយនេះ នៅពេលមានអាយុ៧ឆ្នាំ ដោយបង្ហាញខ្លួន ៥០ប្រកួតគ្រប់ការប្រកួតទាំងអស់ជាមួយក្រុមឈុតធំ Seville មុនពេលចុះហត្ថលេខាជាមួយ Real Madrid នៅក្នុងឆ្នាំ ២០០៥ ។ Ramos ចាយពេល១៦រដូវកាលក្នុងរដ្ឋធានី Madrid ដោយរកគ្រាប់បាល់បាន ១០១គ្រាប់ពីការបង្ហាញខ្លួនសរុប ៦៧១ប្រកួត និងឈ្នះពានរង្វាន់ចំនួន ២២ ដែលក្នុងនោះរួមមានទាំងជើងឯក La Liga ៥ដងផងដែរ។ នៅដើមខែកក្កដា ឆ្នាំ២០២១ កន្លងទៅ Ramos បានចូលរួមជាមួយ PSG បន្ទាប់ពីផុតកុងត្រាជាមួយ Real Madrid ហើយបានចំណាយពេល២រដូវកាល នៅលីគកំពូលបារាំង Ligue 1 ដោយឈ្នះជើងឯកលីគទាំង២រដូវកាល និង French Super Cup ១ដងផងដែរ៕

អត្ថបទទាក់ទង

ក្រោយបង្ហាញខ្លួនជាសមាជិកSevillaជាផ្លូវការ Sergio Ramos ថាខ្លួនវិលត្រឡប់មកវិញតាមបេះដូងចង់បាន

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស