ខ្សែបម្រើ Paul Pogba ត្រូវព្យួរឈ្មោះជាបណ្តោះអាសន្នក្រោយពាក់ព័ន្ធការប្រើសារធាតុហាមឃាត់

បាល់ទាត់
September 12th, 2023 (2 years)
687 Views
Share

ខ្សែបម្រើ Paul Pogba របស់ក្លិប Juventus ត្រូវបានព្យួរឈ្មោះជាបណ្តោះអាសន្ន ពីការប្រកួតនានា ក្រោយជាប់ពាក់ព័ន្ធបញ្ហាប្រើប្រាស់សារធាតុហាមឃាត់។

អង្គភាពប្រឆាំងសារធាតុហាមឃាត់របស់អ៊ីតាលី NADO បានឱ្យដឹងថា លទ្ធផលធ្វើតេស្តរបស់កីឡាករបារាំង វ័យ៣០ឆ្នាំ មានភាពវិជ្ជមានលើសារធាតុ Testosterone ក្រោយពី Juventus បានយកឈ្នះ Udinese ក្នុងលទ្ធផល ៣-០ នៅជំនួបបើកឆាកក្របខណ្ឌ Serie A កាលពីថ្ងៃទី២០ ខែសីហា កន្លងទៅ។

តាមពិតទៅ ក្នុងការប្រកួតនោះ Paul Pogba មានឈ្មោះជាកីឡាករបម្រុង និងមិនត្រូវបានប្តូរចូលលេងនោះទេ ប៉ុន្តែសំណាករបស់គេត្រូវបានជ្រើសរើសដោយមិនមានការព្រៀងទុក សម្រាប់ការធ្វើតេស្តរកសារធាតុហាមឃាត់។
ប្រសិនបើត្រូវបានរកឃើញថា Paul Pogba ពិតជាមានពាក់ព័ន្ធជាមួយសារធាតុហាមឃាត់ពិតប្រាកដមែន នោះរូបគេអាចនឹងត្រូវប្រឈមមុខនឹងការដាក់ពិន័យ ចាប់ពី២ឆ្នាំ ដល់៤ឆ្នាំឯណោះ។

ជុំវិញរឿងនេះដែរ ក្លិប Juventus បានចេញសេចក្តីថ្លែងការណ៍ថា៖ “ក្លិបបានទទួលការបញ្ជាពីអង្គភាពប្រឆាំងសារធាតុហាមឃាត់របស់អ៊ីតាលី ឱ្យធ្វើការព្យួរឈ្មោះ Paul Pogba ជាបណ្តោះអាសន្ន។ ក្លិបនឹងធ្វើការសម្រេចជាបន្តថានឹងអនុវត្តវិធានាការនានាយ៉ាងណា ក្រោយទទួលបានព័ត៌មានលម្អិតបន្ថែមទៀត។”

ដោយឡែក NADO បានអះអាងថា ពួកគេបានរកឃើញកម្រិតសារធាតុ Testosterone ដែលជាសារធាតុជំនួយដល់កម្លាំងសម្រាប់អ្នកដែលបានប្រើប្រាស់ ហើយមិនត្រូវបានអនុញ្ញាតឱ្យប្រើប្រាស់សម្រាប់អត្តពលិកនៅពេលប្រកួតនោះទេ។
ដោយឡែក អតីតសមាជិក Man UTD រូបនេះ នៅមានវេលាចំនួន៣ថ្ងៃ ដើម្បីធ្វើការឆ្លើយតបបដិសេធទៅនឹងលទ្ធផលចេញពីអង្គភាព NADO៕

អត្ថបទទាក់ទង

ខ្សែបម្រើ Paul Pogba ត្រូវព្យួរឈ្មោះជាបណ្តោះអាសន្នក្រោយពាក់ព័ន្ធការប្រើសារធាតុហាមឃាត់

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស