Napoli តែងតាំងអតីតគ្រូបង្វឹកខ្លួនមកដឹកនាំសាជាថ្មី ក្រោយបណ្តេញលោក Rudi Garcia ចេញពីតំណែង

បាល់ទាត់
November 15th, 2023 (3 weeks)
528 Views
Share

ក្លិប Napoli បានតែងតាំងអតីតគ្រូបង្វឹករបស់ខ្លួនគឺលោក Walter Mazzarri មកដឹកនាំសាជាថ្មីរហូតដល់ដំណាច់រដូវកាល។ នេះបើតាមការប្រកាសអោយដឹងពីក្លិបនៅលីគកំពូលអ៊ីតាលី។

បុរសវ័យ ៦២ ឆ្នាំ បានចូលមកជំនួសតំណែងរបស់លោក Rudi Garcia ដែលបានត្រូវបណ្តេញចេញ បន្ទាប់ពី Napoli ចាញ់ Empoli បានធ្វើឱ្យពួកគេ ឈរនៅចំណាត់ថ្នាក់លេខ៤ក្នុងតារាងពិន្ទុក្របខណ្ឌ Serie A មាន ២១ ពិន្ទុតាមពីក្រោយក្រុមកំពូលតារាង Inter Milan ចំនួន ១០ពិន្ទុ។

ក្រុមម្ចាស់ជើងឯករដូវកាលមុន បានចាញ់៣ប្រកួតក្នុងការប្រកួតបើកឆាករដូវកាល ២០២៣-២៤ ចំនួន ១២ លើករបស់ពួកគេ ហើយការបរាជ័យទាំងអស់សុទ្ធតែកើតឡើងនៅទឹកដីរបស់ខ្លួនឯង ដោយចាញ់ក្រុម Lazio, Fiorentina និង Empoli ។

Napoli ក៏មានទម្រង់លេងមិនសូវល្អប៉ុន្មាន រួមទាំងលទ្ធផលស្មើគ្នា ១-១ ទល់នឹងក្រុមអាល្លឺម៉ង់ Union Berlin នៅក្នុងការប្រកួតក្របខ័ណ្ឌ UEFA Champions League ដែលធ្វើឱ្យកៅអីរបស់ គ្រូបង្វឹកជនជាតិបារាំងវ័យ ៥៩ឆ្នាំ ឡើងកម្តៅជាបន្តបន្ទាប់ រហូតត្រូវរបូតតំណែង។

លោក Garcia បានចូលដឹកនាំ Napoli កាលពីខែមិថុនា បន្ទាប់ពីលោក Luciano Spalletti បានលាលែងពីតំណែង ក្រោយជួយក្រុមទទួលបានជោគជ័យ នោះគឺការឈ្នះជើងឯក Serie A ជាលើកដំបូងចាប់តាំងពីឆ្នាំ ១៩៩០ ប៉ុន្តែឥឡូវនេះ Napoli ប្រឈមនឹងការធ្លាក់ចេញពីការប្រជែងដណ្តើមពាននៅរដូវកាលនេះ។

ឥឡូវនេះ ក្រោយការបណ្តេញលោក Rudi Garcia រួច Napoli បានតែងតាំងលោក Walter Mazzarri មកដឹកនាំវិញជាលើកទី២ បន្ទាប់ពីរូបលោកបានដឹកនាំក្រុមកាលពីឆ្នាំ ២០០៩-១៣ ។

ក្នុងការដឹកនាំលើកដំបូង លោក Walter Mazzarri បានជួយក្រុម Napoli ឈ្នះ ពានរង្វាន់ Coppa Italia កាលពីរដូវកាល២០១១-១២ ដែលជាការឈ្នះពានរង្វាន់លើកដំបូងរបស់ក្រុមក្នុងរយៈពេល២០ឆ្នាំ បន្ទាប់ពីយកឈ្នះក្រុមជើងខ្លាំង Juventus នៅវគ្គផ្តាច់ព្រ័ត្រ។ រដូវកាលបន្ទាប់លោក Walter Mazzarri បានជួយក្រុម បញ្ចប់ចំណាត់ថ្នាក់លេខ២ក្នុងក្របខណ្ឌ Serie A៕

អត្ថបទទាក់ទង