ខ្សែប្រយុទ្ធ Neymar នឹងអវត្តមានពីព្រឹត្តិការណ៍ Copa America 2024 ដោយសារមិនទាន់ជាសះស្បើយរបួស

បាល់ទាត់
December 21st, 2023 (1 year)
627 Views
Share

វេជ្ជបណ្ឌិតរបស់ក្រុមបាល់ទាត់ជម្រើសជាតិប្រេស៊ីល លោក Rodrigo Lasmar បាននិយាយកាលពីពេលថ្មីៗនេះថា ខ្សែប្រយុទ្ធ Neymar នឹងមិនជាសះស្បើយពីការវះកាត់ជង្គង់ទាន់ពេលដើម្បីចូលរួមប្រកួតនៅក្នុងព្រឹត្តិការណ៍ Copa America ឆ្នាំក្រោយនោះទេ។

Neymar កីឡាករស៊ុតបញ្ចូលទីច្រើនជាងគេរបស់ក្រុមប្រេស៊ីល បានទទួលការវះកាត់កាលពីខែមុន បន្ទាប់ពីរងរបួសសរសៃពួរ ACL និងរបួសជង្គង់ខាងឆ្វេងរបស់គេ អំឡុងពេលដែលរូបចូលរួមការប្រកួតជាមួយប្រេស៊ីល កាលពីខែតុលា។

វេជ្ជបណ្ឌិត លោក Rodrigo Lasmar ដែលជាអ្នកធ្វើការវះកាត់ព្យាបាលឱ្យ Neymar បាននិយាយថា កីឡាករវ័យ៣១ឆ្នាំ នឹងមិនមានភាពធូរស្រាលរហូតដល់ខែសីហានោះទេ ហើយក្រុមគូ្រពេទ្យក៏មិនមានបំណងប្រើវិធីសាស្ត្រពន្លឿនក្នុងដំណើរជាសះស្បើយសម្រាប់របួសនេះដែរ នោះគឺដើម្បីបញ្ចៀសបញ្ហាផ្សេងៗដែលអាចកើតមានឡើង។

លោក Lasmar បាននិយាយប្រាប់ក្នុងកិច្ចសម្ភាសមួយថា៖ “យើងមិនប្រើវិធីសាស្រ្តពន្លឿន និងរំលងដំណើរការជាសះស្បើយដោយខ្លួនឯង ចំពោះរបួសរបស់ Neymar ទេ ព្រោះយើងមិនចង់ជួបហានិភ័យដែលមិនចាំបាច់។ យើងរំពឹងថា Neymar នឹងត្រលប់មកវិញនៅអំឡុងខែសីហា។ វាមានសារសំខាន់ខ្លាំងណាស់ក្នុងការមានពេលវេលាគ្រប់គ្រាន់ សម្រាប់រាងកាយជាសះស្បើយដោយខ្លួនឯង ហើយយើងចង់ឱ្យកីឡាករ ដំណើរការទៅតាមរបត់នោះ។”

Neymar បានចូលរួមជាមួយក្លិប Al-Hilal នៅក្របខណ្ឌកំពូលអារ៉ាប៊ីសាអ៊ូឌីត Saudi Pro League កាលពីខែសីហា ប៉ុន្តែអតីតសមាជិក Barcelona និង Paris St Germain លេងបានតែ ៥ ប្រកួតប៉ុណ្ណោះ ដោយរូបគេមានបញ្ហារបួសសាច់ដុំ។

ដោយឡែក ប្រេស៊ីលបានជាប់ក្នុងពូល D សម្រាប់ការប្រកួតព្រឹត្តិការណ៍ Copa America 2024 ជាមួយកូឡុំប៊ី ប៉ារ៉ាហ្គាយ និង ក្រុមដែលត្រូវឆ្លងកាត់វគ្គជម្រុះ Playoff មួយក្រុមទៀត។ ព្រឹត្តិការណ៍ Copa America 2024 នឹងធ្វើឡើងចាប់ពីថ្ងៃទី ២០ ខែមិថុនា ដល់ថ្ងៃទី ១៤ ខែកក្កដា ខាងមុខ ដោយសហរដ្ឋអាមេរិក គឺជាម្ចាស់ផ្ទះរៀបចំដំណើរការការប្រកួតនោះ៕

អត្ថបទទាក់ទង

ខ្សែប្រយុទ្ធ Neymar នឹងអវត្តមានពីព្រឹត្តិការណ៍ Copa America 2024 ដោយសារមិនទាន់ជាសះស្បើយរបួស

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស