ព្រឹត្តិការណ៍អូឡាំពិកទីក្រុងប៉ារីស ទទួលផ្សព្វផ្សាយស្រាបៀរជាលើកដំបូងក្នុងប្រវត្តិសាស្រ្ត

កីឡាចម្រុះ
January 18th, 2024 (1 year)
690 Views
Share

ព្រឹត្តិការណ៍ប្រកួតកីឡាអូឡាំពិក ដែលរៀបចំនៅក្រុងប៉ារីស ប្រទេសបារាំង ឆ្នាំ២០២៤ បានទទួលផ្សាយពាណិជ្ជកម្មស្រាបៀរជាលើកដំបូងក្នុងប្រវត្តិសាស្ត្រអូឡាំពិក។

ក្រុមហ៊ុនផលិតស្រាបៀរ Anheuser-Busch InBev បានក្លាយជាអ្នកឧបត្ថម្ភស្រាបៀរលើកដំបូងក្នុងព្រឹត្តិការណ៍កីឡាអូឡាំពិក និងប៉ារ៉ាឡាំពិក ចំនួន៣លើកបន្តបន្ទាប់ ជាមួយនឹងយីហោស្រាដែលគ្មានជាតិអាល់កុល។

ការឧបត្ថម្ភផ្សាយពាណិជ្ជកម្មស្រាបៀររបស់ AB InBev ត្រូវបានប្រកាសថាជាស្រាបៀរឈ្មោះ Corona Cero ដែលគ្មានជាតិអាល់កុលនឹងបង្ហាញខ្លួនជាសាកលនៅអូឡាំពិករដូវក្តៅ ក្រុងប៉ារីស។

ក្រុមហ៊ុនផលិតស្រាបៀរដ៏ល្បីនៅបែលសហ្ស៊ិកអះអាងជុំវិញការផ្សាយនេះថា៖ “ក្រុមហ៊ុន និងគណៈកម្មាធិការអូឡាំពិកអន្តរជាតិ IOC នឹងរៀបចំការចែកចាយ និងទទួលទានប្រកបដោយទំនួលខុសត្រូវទៅកាន់អ្នកគាំទ្រអូឡាំពិករាប់លាននៅជុំវិញពិភពលោក។”

មិនបានបង្ហាញពីទំហំតម្លៃនៃការឧបត្ថម្ភនោះទេ ប៉ុន្តែកិច្ចព្រមព្រៀងផ្សាយស្រាបៀរ Corona Cero នឹងគ្របដណ្តប់ការប្រកួតកីឡារដូវក្តៅនៅទីក្រុងប៉ារីសឆ្នាំ២០២៤ អូឡាំពិករដូវរងា ក្រុង Milan ឆ្នាំ ២០២៦ និងអូឡាំពិករដូវក្តៅឆ្នាំ ២០២៨ នៅ Los Angeles សហរដ្ឋអាមេរិក។

អូឡាំពិកមិនដែលមានការឧបត្ថម្ភស្រាបៀរជាសាកលនោះទេ ប៉ុន្តែលោក Michel Doukeris នាយកប្រតិបត្តិ AB InBev អះអាងថា ស្រាបៀរ និងកីឡាមានភាពល្អប្រសើរជាមួយគ្នា ដូច្នេះលោករីករាយក្នុងការក្លាយជាអ្នកឧបត្ថម្ភស្រាបៀរដំបូងគេនៅកីឡាអូឡាំពិក ដែលជាព្រឹត្តិការណ៍លំដាប់ពិភពលោក។

ការលក់ស្រាបៀរគ្មានជាតិអាល់កុលជាសាកល បានកើនឡើងក្នុងរយៈពេលប៉ុន្មានឆ្នាំចុងក្រោយ ខណៈអ្នកផឹកទទួលបានកម្រិតមធ្យមនៃជាតិស្រវឹង។ ការិយាល័យតាមដានការលក់គ្រឿងស្រវឹងសាកល IWSR Drinks Market Analysis បានវាយតម្លៃថា ការលក់ស្រាបៀរដែលមានជាតិស្រវឹងទាប ត្រូវបានគេរំពឹងថានឹងកើនឡើង ៣១ភាគរយ នៅឆ្នាំ ២០២៤នេះ ពោលគឺនៅក្នុងទីផ្សារធំៗចំនួន១០ ដែលរួមទាំងនៅអេស្ប៉ាញ អាល្លឺម៉ង់ និងអាមេរិក។

ដោយឡែក សម្រាប់ IOC វិញ ការយល់ព្រមជ្រើសរើសការផ្សព្វផ្សាយជាមួយ Corona នេះព្រោះដោយសារតែវាជាម៉ាកយីហោស្រាបៀរ ដែលគេស្គាល់ស្ទើរពេញសាកលទៅហើយ៕

អត្ថបទទាក់ទង

ព្រឹត្តិការណ៍អូឡាំពិកទីក្រុងប៉ារីស ទទួលផ្សព្វផ្សាយស្រាបៀរជាលើកដំបូងក្នុងប្រវត្តិសាស្រ្ត

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស