Bayern Munich នឹងចែកផ្លូវគ្នាពីលោក Thomas Tuchel នៅចប់រដូវកាលនេះ

បាល់ទាត់
February 22nd, 2024 (1 year)
614 Views
Share

Bayern Munich បាននិយាយកាលពីពេលថ្មីៗនេះថា ពួកគេនឹងបញ្ចប់កិច្ចសហការរបស់ពួកគេជាមួយគ្រូបង្វឹក Thomas Tuchel នៅចុងបញ្ចប់នៃរដូវកាលនេះ បើទោះបីជាកិច្ចសន្យាដល់ឆ្នាំ ២០២៥ ក៏ដោយ។

ក្រោមការដឹកនាំរបស់លោក Tuchel មួយរយៈចុងក្រោយ Bayern Munich បង្ហាញទម្រង់លេងមិនសូវល្អនោះទេ។ ជាក់ស្តែង ក្រុមជើងឯកលីគកំពូលអាល្លឺម៉ង់មួយនេះ បានចាញ់បីប្រកួតចុងក្រោយរបស់ពួកគេគ្រប់កម្មវិធី ដោយបានឈរលេខ២ និងបន្ថែមគន្លាត៨ ពិន្ទុតាមពីក្រោយក្រុមកំពូលតារាង Bayer Leverkusen នាក្របខណ្ឌ Bundesliga ។

ទន្ទឹមនឹងនេះ កាលពីសប្តាហ៍មុន ពួកគេក៏ត្រូវបានក្រុមអ៊ីតាលី Lazio យកឈ្នះក្នុងលទ្ធផល ១-០ ក្នុងពានរង្វាន់ UEFA Champions League វគ្គ១៦ក្រុមចុងក្រោយ ជើងទី១ ផងដែរ។

ទាក់ទិននឹងរឿងនេះ នាយកប្រតិបត្តិ Bayern Munich លោក Jan-Christian Dreesen បាននិយាយថា៖ “គោលដៅរបស់យើងគឺចាប់ផ្ដើមទិសដៅបាល់ទាត់ថ្មី ជាមួយនឹងគ្រូបង្គោលថ្មីចាប់ពីរដូវកាល២០២៤-២៥។”

រីឯលោក Thomas Tuchel បាននិយាយថា៖ “ពួកយើងបានព្រមព្រៀងគ្នានៅក្នុងការបញ្ចប់ទំនាក់ទំនងការងារនៅក្នុងរដូវកាលនេះ។”

សូមបញ្ជាក់ថា លោក Thomas Tuchel បានចូលកាន់តំណែងជាគ្រូបង្វឹក Bayern Munich កាលពីខែមីនា ឆ្នាំ ២០២៣ បន្តតំណែងពីលោក Julian Nagelsmann។ ទោះបីជាលោក Tuchel បានដឹកនាំក្រុមឱ្យឈ្នះពានរង្វាន់ Bundesliga កាលពីរដូវកាលមុននៅថ្ងៃប្រកួតចុងក្រោយក៏ដោយ ក៏ពួកគេមិនបានបង្ហាញទម្រង់លេងល្អទេក្នុងរដូវកាលនេះទេ ដែលជារឿងមិនអាចទទួលយកបានសម្រាប់ក្រុមដែលឈានមុខគេក្នុងវិស័យកីឡាបាល់ទាត់អាល្លឺម៉ង់ អស់រយៈពេលមួយទសវត្សកន្លងមក៕

អត្ថបទទាក់ទង

Bayern Munich នឹងចែកផ្លូវគ្នាពីលោក Thomas Tuchel នៅចប់រដូវកាលនេះ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស