កន្សែងជូតមាត់មានកំណត់ហេតុ Lionel Messi នៅ Barcelona ដាក់ដេញថ្លៃ ចាប់ពីតម្លៃ៣០ម៉ឺនដុល្លារ

បាល់ទាត់
May 13th, 2024 (10 months)
601 Views
Share

កន្សែងជូតមាត់មួយ ដែលអ្នកឃ្លាំមើលកីឡាករថ្នាលរបស់ក្លិប Barcelona បានសរសេរកំណត់ហេតុ ក្នុងការចុះកិច្ចសន្យានាំយក Lionel Messi កាលពីវ័យ ១៣ឆ្នាំ ត្រូវបានដាក់ដេញថ្លៃ ចាប់ពី ៣សែនដុល្លារឡើងទៅ។

កន្សែងជូតមាត់ ត្រូវបានសរសេរកំណត់ហេតុ កាលពីខែធ្នូ ឆ្នាំ ២០០០ នៅពេលដែលលោក Carles Rexach ប្រធានផ្នែកកីឡារបស់ក្លិប Barcelona បានចូលព្រមជាមួយនឹងភ្នាក់ងារកីឡាករ លោក Horacio Gaggioli ដើម្បីនាំយក Lionel Messi។ Messi នៅតែបន្តឈ្មោះជាកីឡាករដែលស៊ុតគ្រាប់បាល់ច្រើនជាងគេបង្អស់ប្រចាំក្លិប Barcelona ទោះចាកចេញច្រើនឆ្នាំក៏ដោយក្តី។

ការសរសេរនៅលើកន្សែងដែលបានដាក់ឱ្យមានការដេញថ្លៃ ដែលបង្ហាញពីការសន្យារបស់ភ្នាក់ងារកីឡាករ នឹងនាំយក Messi ទៅ Barcelona ត្រូវបានពិពណ៌នាដោយក្រុមហ៊ុនដេញថ្លៃ Bonhams ថាជា ស្នាមទឹកប៊ិចដែលសរសេរនៅកន្សែងជូនមាត់ស្តង់ដាអេស្ប៉ាញ។ បើតាមការអះអាងរបស់ Bonhams គ្រាន់តែបើកឱ្យមានការដេញថ្លៃភ្លាម កន្សែងមួយនេះត្រូវបានគេផ្តល់តម្លៃដំបូង ២២០,០០០ផោន ភ្លាម។

ការបើកលក់កន្សែងដែលមានកំណត់ត្រាកែប្រែវាសនា Messi នេះ នឹងត្រូវបើកឱ្យដេញថ្លៃតាមប្រព័ន្ធអនឡាញ ហើយនឹងបិទនៅថ្ងៃទី១៧ ខែឧសភា ដោយតម្លៃចាប់ផ្តើមដំបូងពីចន្លោះ ៣សែនដុល្លារ ទៅ ៥សែនដុល្លារ។

លោក Marc Sands នាយកផ្នែកទីផ្សារក្រុមហ៊ុនដេញថ្លៃ Bonhams បានឱ្យដឹងថា៖ “វាមិនដែលជាប់កាតព្វកិច្ចផ្លូវច្បាប់នោះទេ ប៉ុន្តែតាមអារម្មណ៍វាតំណាងឱ្យការតភ្ជាប់ដ៏ស៊ីជម្រៅមួយ ឬក៏រឿងរ៉ាវដំបូងបង្អស់ដ៏ស៊ីជម្រៅ ដែល Messi បានមកកាន់ក្លិប Barcelona។ ប្រសិនបើអ្នកស្រលាញ់បាល់ទាត់ អ្នកនឹងដឹងស្ទើរទាំងអស់ពី Lionel Messi ហើយអ្នកនឹងដឹងថាគេត្រូវបានចាត់ទុកថាជាកីឡាករបាល់ទាត់ដ៏ពូកែគ្រប់ជំនាន់។ បើអ្នកចង់បានចំណែកនៃសកម្មភាពនោះ នេះគឺជារឿងដែលអ្នកត្រូវតែទទួល។”

Messi បានជួយ Barcelona ឈ្នះពានរង្វាន់ចំនួន ៣៥ ពេលប្រកបអាជីពក្នុងទឹកដីអេស្ប៉ាញ។ គេបានបង្ហាញខ្លួនលេងចំនួន ៧៨២ប្រកួត និងបានស៊ុតបាល់ ៦៧៤គ្រាប់ ឱ្យក្រុមរហស្សនាមអ្នកមានបុណ្យ ហើយនៅឆ្នាំ ២០២១ Messi បានចាកចេញពី Barcelona ក្រោយរួមរស់រយៈពេល ១៧ឆ្នាំ ហើយបច្ចុប្បន្នគេកំពុងប្រកបអាជីពនៅក្លិប Inter Miami នៅអាមេរិក៕

អត្ថបទទាក់ទង

កន្សែងជូតមាត់មានកំណត់ហេតុ Lionel Messi នៅ Barcelona ដាក់ដេញថ្លៃ ចាប់ពីតម្លៃ៣០ម៉ឺនដុល្លារ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស