លោក Xabi Alonso ថា Bayer Leverkusen បានចារប្រវត្តិសាស្ត្រដំបូងនៅ Bundesliga

បាល់ទាត់
May 20th, 2024 (5 months)
397 Views
Share

គ្រូបង្វឹក Bayer Leverkusen លោក Xabi Alonso បាននិយាយថា លោកមានភាពរីករាយបំផុតដែលក្រុមរបស់លោក បានចារប្រវត្តិសាស្ត្រមិនអាចបំភ្លេចបាន បន្ទាប់ពីឈ្នះពាន Bundesliga ដោយមិនស្គាល់ចាញ់ពេញមួយរដូវកាល។

ជាការពិត Bayer Leverkusen បានក្លាយជាក្រុមដំបូងក្នុងប្រវត្តិសាស្ត្រ ដែលបានឈ្នះពាន Bundesliga ដោយមិនស្គាល់ចាញ់នៅ រដូវកាល ២០២៣-២៤ ដែលកំណត់ត្រានេះពួកគេធ្វើបានក្រោយយកឈ្នះ FC Augsburg នៅក្នុងការប្រកួតបញ្ចប់រដូវកាល ដោយលទ្ធផល ២-១។ Victor Boniface និង Robert Andrich បានស៊ុតបាល់បញ្ចូលទីម្នាក់មួយគ្រាប់ ដែលនាំឱ្យពួកគេឈ្នះដល់ទៅ២៨ប្រកួត និងស្មើ៦ប្រកួត ដោយរកបាន៩០ពិន្ទុ។

បុរសវ័យ៤២ឆ្នាំ បានអះអាងថា វាជារឿងដែលមិនអាចបំភ្លេចបាន ចំពោះការសម្រេច ជោគជ័យដ៏អស្ចារ្យរបស់ក្លិបនាក្របខណ្ឌ Budesliga ដែលចាប់កំណើតតាំងពីឆ្នាំ១៩៦៣មក។
អតីតខ្សែបម្រើ Real Madrid និង Liverpool រូបនេះ ខកចិត្តបន្តិចដែលមិនអាចនាំក្រុមទៅបំបែកកំណត់ត្រារកបានលើសពី៩១ពិន្ទុក្នុងមួយរដូវកាល ប៉ុន្តែការរក្សាបានលទ្ធផលមិនស្គាល់ចាញ់ គឺជាជោគជ័យដ៏ធំធេង មិនមែនតែនៅអាល្លឺម៉ង់ គឺនៅតំបន់អឺរ៉ុបទាំងមូល។

លោក Xabi Alonso បានថ្លែងឱ្យដឹងបែបនេះថា៖ “ក្រុមរបស់យើងបានចារកំណត់ត្រាខ្លួនឯងក្នុងប្រវត្តិសាស្ត្រ Bundesliga។ ២០ឆ្នាំខាងមុខទៀត យើងរំលឹកត្រឡប់ក្រោយមកវិញ យើងក៏នៅតែអាចនិយាយបានថា អស្ចារ្យ យើងសម្រេចបានយ៉ាងអស្ចារ្យ។”

តាមពិតទៅ ក្នុងរដូវកាលនេះ Bayer Leverkusen មានកំណត់ត្រាមិនស្គាល់ចាញ់រហូតដល់៥១ប្រកួតក្នុងនោះ Bundesliga ៣៤ប្រកួត, Europa League ១២ប្រកួត និងពានអាល្លឺម៉ង់ DFB-Pokal ៥ប្រកួត។ លោក Alonso រំពឹងនាំក្រុមឈ្នះពាន៣ក្នុងមួយរដូវកាល ដោយក្រោយលើកពាន Bundesliga ពួកគេត្រូវបន្តប្រជែងពាន UEFA Europa League វគ្គផ្តាច់ព្រ័ត្រ ទល់នឹងក្រុមអ៊ីតាលី Atalanta នៅថ្ងៃទី ២២ខែឧសភា មុនបន្តទៅជួបក្រុមពីលីគលំដាប់ទី២អាល្លឺម៉ង់ Kaiserslautern នៅវគ្គផ្តាច់ព្រ័ត្រ ពាន DFB-Pokal នៅ ថ្ងៃទី ២៥ ខែឧសភា ខាងមុខ៕

អត្ថបទទាក់ទង

លោក Xabi Alonso ថា Bayer Leverkusen បានចារប្រវត្តិសាស្ត្រដំបូងនៅ Bundesliga

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស