×

ពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) រកឃើញបេក្ខភាពវគ្គពាក់កណ្ដាលផ្ដាច់ព្រ័ត្រ

យោងតាមការផ្សាយរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានឱ្យដឹងថា ការប្រកួតបាល់ទាត់ដណ្ដើមពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ឆ្នាំ២០២១ បានរកឃើញបេក្ខភាពវគ្គពាក់កណ្ដាលផ្ដាច់ព្រ័ត្រហើយ ក្រោយបញ្ចប់ការប្រកួតវគ្គ ៨ក្រុមចុងក្រោយ កាលពីចុងសប្ដាហ៍កន្លងទៅ រួមមានក្រុមបាល់ទាត់ខេត្តត្បូងឃ្មុំ, ខេត្តបាត់ដំបង, ខេត្តបន្ទាយមានជ័យ និងក្រុមកោះកុងអេហ្វស៊ី ។

ចំពោះលទ្ធផលការប្រកួតវគ្គ ៨ក្រុមចុងក្រោយ រួមមានខេត្តត្បូងឃ្មុំ បានយកឈ្នះក្រុមភ្នំពេញហ្គាឡាក់ស៊ី ២-០ នៅកីឡដ្ឋាន AEU Sport Park ។ ខេត្តបាត់ដំបង បានយកឈ្នះខេត្តកណ្ដាល ៧-១ នៅកីឡដ្ឋាន 7NG ។ ខេត្តបន្ទាយមានជ័យ យកឈ្នះក្រុមសៀមរាមអេហ្វស៊ី ១-០ នៅកីឡដ្ឋានខេមបូឌាអ៊ែរវ៉េ និងក្រុមកោះកុងអេហ្វស៊ី បានយកឈ្នះខេត្តកំពង់ឆ្នាំង ៩-១ នៅកីឡដ្ឋានស្ដាតចាស់ ។

យោងតាមរូបមន្ដប្រកួត ក្រុមទទួលបានជ័យជម្នះខាងលើ ត្រូវដឹកដៃគ្នាឡើងវគ្គពាក់កណ្ដាលផ្ដាច់ព្រ័ត្រ ខណៈកម្មវិធីប្រកួតវគ្គបន្ដ គឺខេត្តត្បូងឃ្មុំ ត្រូវជួបខេត្តបាត់ដំបង និងក្រុមកោះកុងអេហ្វស៊ី ត្រូវជួបក្រុមបាល់ទាត់ខេត្តបន្ទាយមានជ័យ ។ ការប្រកួតវគ្គ ៤ក្រុមចុងក្រោយនេះ នឹងធ្វើឡើងនាថ្ងៃទី២០ ខែតុលានេះ ដើម្បីកាត់សេចក្ដីរកក្រុមខ្លាំងឡើងវគ្គផ្ដាច់ព្រ័ត្រ នៃពានរង្វាន់សម្ដេចតេជោ ហ៊ុន សែន (ថ្នាក់ខេត្ត) ឆ្នាំ២០២១ ៕

ប្រភព៖ CAMSOC

អ្នកអាចចែករំលែកដោយ៖

Loading...
អត្ថបទទាក់ទង