ខ្សែប្រយុទ្ធ Kylian Mbappe ចូលរួមជាមួយ Real Madrid ដោយឥតតម្លៃខ្លួន លើកិច្ចសន្យារយៈពេល ៥ឆ្នាំ

បាល់ទាត់
June 4th, 2024 (12 months)
568 Views
Share

ខ្សែប្រយុទ្ធ Kylian Mbappe បានសម្រេចចូលរួមជាមួយ Real Madrid ក្នុងនាមជាកីឡាករឥតតម្លៃខ្លួន ដោយរូបគេបានចុះកិច្ចសន្យារយៈពេល៥ឆ្នាំ ពោលគឺរហូតដល់ឆ្នាំ២០២៩។ នេះបើតាមការប្រកាសអោយដឹងពីក្លិប នៅក្របខណ្ឌ La Liga។

កីឡាករបារាំង បានបញ្ចប់ដំណើររួមរស់រយៈពេល៦ឆ្នាំជាមួយក្លិប Paris Saint-Germain ក្រោយពីកុងត្រារបស់គេ បានផុតកំណត់ កាលពីថ្ងៃទី ៣០ ខែមិថុនា ដោយការលេងជាមួយក្លិបនៅក្របខណ្ឌ Ligue 1 នោះ រូបគេបានបង្ហាញខ្លួន ៣០៨ ដង ស៊ុតបញ្ចូលទីបាន ២៥៦គ្រាប់ ហើយបានឈ្នះពានរង្វាន់ Ligue 1 ៦ដង Coupe de France ៤ដង Coupe de la Ligue ២ដង និង Trophée des Champions ចំនួន៣ដង។

កន្លងមកមានការរាយការណ៍ថា Kylian Mbappe បានព្រមព្រៀងជាពាក្យសម្តីក្នុងការផ្លាស់មកកាន់ទឹកដី Santiago Bernabéu តាំងពីខែកុម្ភៈមកម្ល៉េះ ហើយនៅខែឧសភា រូបគេបានប្រកាសពីការចាកចេញពី Paris Saint-Germain នៅដំណាច់រដូវកាល ២០២៣-២៤។

មែនទែនទៅ ដំណឹងនៃការផ្សារភា្ជប់ កីឡាករវ័យ២៥ឆ្នាំ មកកាន់ Real Madrid មានរយៈពេលជាយូរមកហើយ តាំងពីឆ្នាំ២០២១ ហើយនៅឆ្នាំ២០២២ ការផ្លាស់ប្តូររូបគេទៅកាន់ក្លិបនៅអេស្ប៉ាញ ហៀបនឹងសម្រេច ប៉ុន្តែក្លិប Paris Saint-Germain បានប្រកាសពីការបន្តកុងត្រាថ្មី ជាមួយកីឡាករ ដែលធ្វើអោយក្លិប Real Madrid មានការខឹងសម្បារជាខ្លាំង។

យ៉ាងណាមិញ ពេលនេះ Kylian Mbappe បានទទួលជោគជ័យក្នុងការចូលរួមជាមួយ Real Madrid ខណៈការផ្ទេរជាផ្លូវការ នឹងធ្វើឡើងពេលដែលទីផ្សារដោះដូរកីឡាករនៅអេស្ប៉ាញបើកដំណើរការនៅថ្ងៃទី ១ ខែមិថុនា។ ក្លិបម្ចាស់ជើងឯក UEFA Champions League ១៥សម័យ រំពឹងពីការប្រកាសពីកុងត្រាជាមួយ Kylian Mbappe នៅសប្តាហ៍ក្រោយ រួមទាំងការបង្ហាញខ្លួនរូបគេ នៅមុពេលដែលព្រឹត្តិការណ៍ UEFA Euro 2024 ចាប់ផ្តើមប្រកួត។

សម្រាប់ប្រាក់ឈ្នួលដែល Kylian Mbappe នឹងទទួលបានពី Real Madrid ត្រូវបានជឿថា ទទួលបាន ១៥លានអឺរ៉ូ ក្នុងមួយរដូវកាល បូករួមថ្លៃលើកទឹកចិត្តក្នុងការចុះកុងត្រា ១៥០លានអឺរ៉ូ រយៈពេល៥ឆ្នាំ ហើយរូបគេក៏ទទួលបានភាគរយពីការប្រើប្រាស់សិទ្ធរូបភាពរបស់គេផងដែរ៕

អត្ថបទទាក់ទង

ខ្សែប្រយុទ្ធ Kylian Mbappe ចូលរួមជាមួយ Real Madrid ដោយឥតតម្លៃខ្លួន លើកិច្ចសន្យារយៈពេល ៥ឆ្នាំ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស