គ្រូបង្វឹក Juventus ព្រមព្រៀងចែកផ្លូវគ្នាជាមួយក្លិប

បាល់ទាត់
June 4th, 2024 (8 months)
537 Views
Share

ក្លិប Juventus និងគ្រូបង្វឹក លោក Massimiliano Allegri បានឈានដល់កិច្ចព្រមព្រៀង ក្នុងការបញ្ចប់កុងត្រា ចែកផ្លូវជាមួយគ្នាជាផ្លូវការហើយ។ នេះបើតាមការប្រកាសអោយដឹងពីក្លិប នៅក្របខណ្ឌ Serie A។

មែនទៅ បុរសវ័យ ៥៦ឆ្នាំ ត្រូវបានបញ្ចប់តំណែងតាំងពីខែឧសភាមកម្ល៉េះ ដោយសារអាកប្បកិរិយាមិនល្អរបស់លោក ទាំងអំឡុងពេលប្រកួត និងក្រោយចប់ការប្រកួត វគ្គផ្តាច់ព្រ័ត្រ ពានរង្វាន់ Coppa Italia ដោយលោកត្រូវបានបណ្តេញចេញពីទីលាន ហើយ Juventus បានយកឈ្នះ Atalanta ១-០ ដើម្បីឈ្នះពានក្នុងស្រុកជាលើកទី១៥។

បើទោះជាលោក Allegri ត្រូវបណ្តេញចេញ តែភាគីទាំង២នៅមានលក្ខខណ្ឌមួយចំនួនដែលមិនទាន់ព្រមព្រៀងគ្នា ហើយក៏មានដំណោះស្រាយជាបន្តបន្ទាប់ រហូតមកដល់ពេលនេះ ពួកគេក៏បានឈានដល់កិច្ចព្រមព្រៀង ក្នុងការបញ្ចប់កុងត្រាទាំងឡាយដែលនៅសេសសល់។

លោក Massimiliano Allegri បានដឹកនាំ Juventus ចំនួន២ដង សរុប រយៈពេល ៨ឆ្នាំ ដោយការដឹកនាំលើកទី១ លោកដឹកនាំពីឆ្នាំ២០១៤-១៩ និងលើកទី២ ពីឆ្នាំ ២០២១-២៤។ លោកបានដឹកនាំ ក្លិបសេះបង្កង់ឈ្នះ ពាន Serie A ៥ដង Coppa Italia ៥ដង និង Supercoppa Italiana ២ដង។

សម្រាប់រដូវកាល ២០២៣-២៤ ដែលទើបតែបញ្ចប់ទៅកាលពីពេលថ្មីៗនេះ លោក Allegri បានដឹកនាំក្លិបឈ្នះ ពាន Coppa Italia តែ១ប៉ុណ្ណោះ ខណៈនៅក្នុងការប្រជែងពានរង្វាន់លីគកំពូលអ៊ីតាលី Serie A វិញ ពួកគេបញ្ចប់ត្រឹមចំណាត់ថ្នាក់លេខ៣ តែប៉ុណ្ណោះ៕

អត្ថបទទាក់ទង

គ្រូបង្វឹក Juventus ព្រមព្រៀងចែកផ្លូវគ្នាជាមួយក្លិប

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស