លោក Didier Deschamps ថា ក្រុមខ្លួននឹងផ្តោតលើការប្រកួត UEFA Euro 2024 ទោះប្រទេសបារាំងកំពុងមានបញ្ហានយោបាយ

EURO
June 17th, 2024 (7 months)
508 Views
Share

គ្រូបង្វឹកក្រុមបាល់ទាត់ជម្រើសជាតិបារាំង លោក Didier Deschamps បាននិយាយថា ក្រុមរបស់លោកនឹងនៅតែផ្តោតលើការប្រកួត UEFA Euro 2024 ទោះបីជា ពេលនេះប្រទេសបារាំងកំពុងមានវិបត្តិនយោបាយក្តី។

ការប្រកាសដ៏គួរអោយភ្ញាក់ផ្អើលរបស់ប្រធានាធិបតី បារាំង លោក Emmanuel Macron កាលពី សប្តាហ៍មុន ដើម្បីហៅការបោះឆ្នោតសភាមួយសម្រាប់ចុងខែនេះ បន្ទាប់ពីលោកត្រូវបានទម្លាក់នៅក្នុងសហភាពអឺរ៉ុបដែលបោះឆ្នោតដោយគណបក្សស្តាំជ្រុលរបស់លោកស្រី Marine Le Pen។ ការផ្លាស់ប្តូរនេះបានធ្វើអោយបារាំង ធ្លាក់ចូលទៅក្នុងភាពមិនប្រាកដប្រជា ផ្នែកនយោបាយ និងបានធ្វើអោយទីផ្សារហិរញ្ញវត្ថុមានការរង្គោះរង្គើរផងដែរ។

បញ្ហានយោបាយនៅក្នុងប្រទេស បាននាំអោយមានការព្រួយបារម្ភពីការជះឥទិ្ធពល ទៅដល់សមាជិកក្រុមជម្រើសជាតិបារាំង ដែលកំពុងចូលរួមព្រឹត្តិការណ៍ UEFA Euro 2024 នាប្រទេសអាល្លឺម៉ង់។ ក្នុងនោះដែរ កាលពីថ្ងៃសៅរ៍កន្លងទៅ សហព័ន្ធបាល់ទាត់បារាំងបានអំពាវនាវអោយក្រុមជម្រើសជាតិ គោរពអព្យាក្រឹតភាពរបស់ខ្លួន ផ្តោតលើការប្រកួត និងកុំអោយកីឡាករ មានការព្រួយបារម្ភពីបញ្ហានយោបាយ។

ឆ្លើយតបនឹងរឿងនេះលោក Didier Deschamps គ្រូបង្វឹកក្រុមបារាំងក៏បានលើកឡើងថា កីឡាកររបស់លោកមានសេរីភាពក្នុងការធ្វើឬនិយាយអ្វីដែលពួកគេចង់ ពាក់ព័ន្ធនឹងបញ្ហានយោបាយនៅក្នុងប្រទេសបារាំង ប៉ុន្តែ ពេលនេះអ្វីដែលពួកគេផ្តោតសំខាន់ជាមុន គឺជាការប្រកួតពានរង្វាន់ទ្វីបអឺរ៉ុបប៉ុណ្ណោះ។

គ្រូបង្វឹកវ័យ ៥៥ឆ្នាំ បានអោយដឹងដូចនេះ “ទោះបីជាយើងជាកីឡាករ តែយើងក៏ជាប្រជាជនបារាំង យើងមានសិទ្ធក្នុងនិយាយអំពីអ្វីដែលកើតឡើងក្នុងប្រទេសរបស់យើង។ យ៉ាងណាមិញ ពេលនេះយើងមានភារកិច្ចដ៏ធំមួយគឺការប្រជែងពានរង្វាន់ UEFA Euro។ វាជាអទិភាពចម្បងរបស់យើង ហើយយើងផ្តោតអារម្មណ៍ និងព្យាយាមអោយបានខ្លាំងក្នុងការប្រកួត។”

សូមបញ្ជាក់ថា ក្រុមបាល់ទាត់ជម្រើសជាតិបារាំង នឹងចាប់ផ្តើមការប្រកួត UEFA Euro 2024 ពូល D របស់ពួកគេដោយត្រូវប៉ះ ក្រុមអូទ្រីសនៅយប់នេះ វេលាម៉ោង២រំលងអាធ្រាត ដោយការប្រកួតក៏មានផ្សាយបន្តផ្ទាល់ លើ CTN CNC MYTV ផងដែរ៕

អត្ថបទទាក់ទង

លោក Didier Deschamps ថា ក្រុមខ្លួននឹងផ្តោតលើការប្រកួត UEFA Euro 2024 ទោះប្រទេសបារាំងកំពុងមានបញ្ហានយោបាយ

ព្រឹត្តិការណ៍ប្រចាំទ្វីបអឺរ៉ុប UEFA Euro 2024