គណៈប្រតិភូសភាពាណិជ្ជកម្មអន្តរជាតិនៃកម្ពុជា (IBC) មកបំពេញទស្សនកិច្ចនៅក្រុមហ៊ុន Cambodian Broadcasting Service (CBS)

ផ្សេងៗ
June 25th, 2024 (10 months)
808 Views
Share

ភ្នំពេញ៖ ក្រុមហ៊ុន Cambodian Broadcasting Service ហៅកាត់ថា CBS ដែលជាបុត្រសម័្ពន្ធមួយរបស់ក្រុមហ៊ុនរ៉ូយ៉ាល់គ្រុប បានទទួលស្វាគមន៍គណៈប្រតិភូគណៈគ្រប់គ្រង និងឥស្សរជនមកពីសភាពាណិជ្ជកម្មអន្តរជាតិនៃកម្ពុជា ឬហៅកាត់ថា IBC នៅក្នុងដំណើរបំពេញទស្សនកិច្ចមកកាន់ក្រុមហ៊ុន CBS នៅថ្ងៃអង្គារនេះ។

ដំណើរទស្សនកិច្ចនាពេលនេះ អនុញ្ញាតឱ្យសមាជិករបស់សភាពាណិជ្ជកម្មអន្តរជាតិនៃកម្ពុជា IBC មានឱកាសចូលរួមសិក្សាស្វែងយល់អំពីភាពដ៏សម្បូរបែបរបស់ប្រព័ន្ធផ្សព្វផ្សាយ CBS។ ជាពិសេស គណៈប្រតិភូធុរកិច្ចអន្តរជាតិ ក៏មានឱកាស ក្នុងការចូលរួមកិច្ចពិភាក្សាយ៉ាងស៊ីជម្រៅ ជាមួយនាយកប្រតិបត្តិរបស់ក្រុមហ៊ុន CBS លោក David Ulmer ដោយទទួលបាននូវចំណេះដឹង និងការយល់ដឹងដោយផ្ទាល់ អំពីដំណើរការនៃប្រតិបត្តិការផ្សាយ និងភាពច្នៃប្រឌិតស្ថិតនៅពីក្រោយនៃមាតិកាដ៏ទាក់ទាញនានា សម្រាប់អ្នកគាំទ្រនៅកម្ពុជា។

បន្ទាប់ពីកិច្ចពិភាក្សាគ្នាយ៉ាងទូលំទូលាយ គណៈសភាពាណិជ្ជកម្មអន្តរជាតិនៃកម្ពុជា IBC បានទស្សនកិច្ចនៅក្នុងបរិវេណ និងស្ទូឌីយ៉ូនីមួយៗនៅក្នុងស្ថានីយរបស់ក្រុមហ៊ុន CBS ។ ដំណើរទស្សនកិច្ចក្នុងស្ថានីយនាពេលនេះ ផ្តល់នូវទិដ្ឋភាពដ៏អស្ចារ្យផ្សេងៗរបស់ស្ថានីយ CBS រួមទាំងអនុញ្ញាតឱ្យក្រុមការងារសភាពាណិជ្ជកម្មអន្តរជាតិនៃកម្ពុជា បានជ្រាបដោយផ្ទាល់នូវដំណើរការដ៏សម្បូរបែបនៅពីក្រោយការបង្កើតកម្មវិធីនានា ។

ដំណើរទស្សនកិច្ចនេះ បានបញ្ចប់ទៅជាមួយនឹងបទពិសោធន៍យ៉ាងពិសេសៗជាច្រើន រួមជាមួយនឹងនឹងការទស្សនាដោយផ្ទាល់នូវកម្មវិធី “MasterChef Cambodia” ជាកម្មវិធីធ្វើម្ហូបដ៏ពេញនិយមបំផុតនៅក្នុងប្រទេសកម្ពុជា។ ក្នុងឱកាសដ៏ពិសេសនេះ ក៏បានផ្តល់ជូនគណៈប្រតិភូ IBC ស្វែងយល់ជុំវិញការផលិតនូវព្រឹត្តិការណ៍ព័ត៌មានជាតិ និងបង្ហាញអំពីកម្មវិធីកម្សាន្តដ៏ទាក់ទាញរបស់ប្រព័ន្ធផ្សព្វផ្សាយ CBS។

លើសពីនេះ ដំណើរទស្សនកិច្ចរបស់គណៈប្រតិភូសភាពាណិជ្ជកម្មអន្តរជាតិនៃកម្ពុជា ក៏ជំរុញឱ្យមានកិច្ចសហការដ៏មានតម្លៃជាទីបំផុត រវាងប្រព័ន្ធផ្សព្វផ្សាយឈានមុខគេនៅកម្ពុជា ជាមួយនឹងក្រុមថ្នាក់ដឹកនាំធុរកិច្ចដ៏លេចធ្លោ។ គណៈសភាពាណិជ្ជកម្មអន្តរជាតិនៃកម្ពុជា IBC ក៏ទទួលបានឱកាសយ៉ាងពិសេស ក្នុងការសិក្សាស្វែងយល់ពីប្រសិទ្ធភាពដ៏អស្ចារ្យ និងឥទ្ធិពលរបស់ប្រព័ន្ធផ្សព្វផ្សាយឈានមុខនៅកម្ពុជា អមដោយការពង្រឹងទំនាក់ទំនង និងជំរុញចំពោះការយល់ដឹងកាន់តែស៊ីជម្រៅរវាងសហគមន៍ធុរកិច្ចអន្តរជាតិ និងប្រព័ន្ធផ្សព្វផ្សាយ CBS។

សូមបញ្ជាក់ថា ចាប់តាំងពីការបង្កើតឡើងដំបូងក្នុងឆ្នាំ ២០០៣ ក្រុមហ៊ុន Cambodian Broadcasting Service(CBS) ត្រូវបានទទួលស្គាល់ថាជាបណ្តាញផ្សព្វផ្សាយនាំមុខគេ និងមានបទដ្ឋានច្នៃប្រឌិតខ្ពស់ក្នុងវិស័យទូរទស្សន៍នៅកម្ពុជា។ ក្នុងរយៈពេលជាច្រើនឆ្នាំមកនេះ ក្រុមហ៊ុន CBS បានខិតខំយ៉ាងខ្លាំងក្លា ក្នុងការបម្រើចំណីចក្ខុ និងចំណេះដឹងដល់ពលរដ្ឋកម្ពុជា តាមរយៈការផ្តល់កម្មវិធីផ្សាយលំដាប់អន្តរជាតិ ដែលនាំមកជូននូវទស្សនីយភាពកម្សាន្ត ការអប់រំ និងការបំផុសគំនិតផ្សេងៗ។ បន្ថែមពីនេះ ក៏រួមមានកម្មវិធីកម្សាន្ត ព័ត៌មាន និងចំណេះដឹងដ៏មានប្រជាប្រិយភាពបំផុតសម្រាប់អ្នកទស្សនាជាង ១៥លាននាក់នៅលើកញ្ចក់ទូរទស្សន៍ និងតាមបណ្តាញផ្សព្វផ្សាយឌីជីថល ដូចជា CTN, MyTV, CNC, CBS Sports និង CBS Digital ដោយធើ្វឱ្យ CBS ក្លាយជាក្រុមហ៊ុនប្រព័ន្ធផ្សព្វផ្សាយមួយដែលមានអ្នកទស្សនាច្រើនបំផុតក្នុងប្រទេសកម្ពុជា។

ក្រុមហ៊ុន CBS ក៏ជាអ្នកឧបត្ថម្ភ និងជាដៃគូដ៏ធំមួយរបស់មូលនិធិកុមារកម្ពុជា (CCF) និងអង្គការមូលនិធិផ្កាយសមុទ្រឥណ្ឌូចិន (ISF) រួមទាំងបើកចំហរសម្រាប់ជំនួយសប្បុរសធម៌ដោយមិនប្រកាន់ជំនឿសាសនា ដែលជំរុញលើកកម្ពស់សិទ្ធិអំណាចរបស់កុមារ និងពលរដ្ឋក្រីក្រនៅកម្ពុជា ដើម្បីការផ្លាស់ប្តូរជីវិតជាវិជ្ជមាន ដោយផ្តល់ការអប់រំប្រកបដោយគុណភាព សេវាសុខាភិបាលល្អប្រសើ និងឱកាសផ្សេងៗទៀតនៅក្នុងសង្គម ៕

អត្ថបទទាក់ទង

គណៈប្រតិភូសភាពាណិជ្ជកម្មអន្តរជាតិនៃកម្ពុជា (IBC) មកបំពេញទស្សនកិច្ចនៅក្រុមហ៊ុន Cambodian Broadcasting Service (CBS)

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស