គ្រូអាហ្សង់ទីនថា Lionel Messi នឹងបន្តចូលលេងក្នុងការប្រកួតជាមួយកាណាដា នៅវគ្គ៤ក្រុមចុងក្រោយ Copa América 2024

បាល់ទាត់
July 9th, 2024 (11 months)
882 Views
Share

គ្រូបង្វឹកក្រុមបាល់ទាត់ជម្រើសជាតិអាហ្សង់ទីនលោក Lionel Scaloni បាននិយាយថា ខ្សែប្រយុទ្ធ Lionel Messi នឹងបន្តចូលលេងក្នុងការប្រកួតដែលត្រូវប៉ះកាណាដា សាជាថ្មី នៅក្នុងវគ្គ៤ក្រុមចុងក្រោយ ពានរង្វាន់ Copa América 2024។

Messi បានមានរបួសភ្លៅខាងស្តាំ ពេលប្រកួតឈ្នះឈីលីក្នុងជំនួបជុំទី២ ពូល A ហើយគេបានអវត្តមានការប្រកួត បិទពូល ដែលអាហ្សង់ទីនឈ្នះ ប៉េរូ ២-០។ យ៉ាងណា ប្រធានក្រុមពពកសរូបនេះ បានវិលមកទីលានវិញ ក្នុងការប្រកួតដែលអាហ្សង់ទីនឈ្នះ អេក្វាឌ័រនៅវគ្គ៨ក្រុមចុងក្រោយ ។

យ៉ាងណា សម្រាប់ការប្រកួតទល់នឹងកាណាដានេះ លោក Lionel Scaloni បានអះអាងថា Lionel Messi នឹងបន្តមានវត្តមានជួយក្រុមដដែល។

គ្រូបង្វឹក វ័យ ៤៦ឆ្នាំ បានអោយដឹងដូច្នេះថា “Messi មានអាការៈល្អប្រសើរហើយ ដូច្នេះគេនឹងក្លាយជាផ្នែកមួយរបស់ក្រុមដែលត្រូវប្រកួតទល់នឹងកាណាដា។ សម្រាប់ការប្រកួតនេះ យើងមានជំនឿចិត្ត ព្រោះពួកយើងធ្លាប់យកឈ្នះពួកគេរួចមកហើយ។”

ក្រុមការពារជើងឯកអាហ្សង់ទីន កំពុងព្យាយាមស្វែងរកការលើកពាន Copa América ជាលើកទី១៦ក្នុងការប្រកួតឆ្នាំនេះ។ ពួកគេបានឡើងមកកាន់វគ្គ៤ក្រុមចុងក្រោយ បន្ទាប់ពី ឈ្នះ អេក្វាឌ័រនៅវគ្គ៨ក្រុមចុងក្រោយ ដោយការទាត់បាល់១១ម៉ែត្រកាត់សេចក្តី ៤-២ ក្រោយស្មើគ្នា ១-១ នៅ៩០នាទី។ រីឯកាណាដាបានឡើងមកវគ្គ៤ក្រុមចុងក្រោយ បន្ទាប់ពីឈ្នះ វេណេស៊ុយអេឡា ដោយការទាត់បាល់ ១១ម៉ែត្រ កាត់សេចក្តី ៤-៣ ក្រោយស្មើគ្នា ១-១ នៅ ៩០នាទី។

វាក៏ជាលើកទី២ដែរ ដែលក្រុមទាំង២បានជួយគ្នា នៅក្នុងព្រឹត្តិការណ៍ Copa América 2024 បន្ទាប់ពីជួបគ្នាលើកដំបូងក្នុងការប្រកួតបើកពូល A ដោយអាហ្សង់ទីនបានឈ្នះកាណាដា ២-០។ សម្រាប់ការប្រកួតសាជាថ្មី រវាងក្រុមទាំង២នឹងធ្វើឡើងនាយប់នេះ នាកីឡដ្ឋាន MetLife Stadium រដ្ឋ New Jersey សហរដ្ឋអាមេរិក៕

អត្ថបទទាក់ទង

គ្រូអាហ្សង់ទីនថា Lionel Messi នឹងបន្តចូលលេងក្នុងការប្រកួតជាមួយកាណាដា នៅវគ្គ៤ក្រុមចុងក្រោយ Copa América 2024

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស