CONMEBOL បើកការស៊ើបអង្កេតការប្រើហិង្សារវាងអ្នកគាំទ្រកូឡុំប៊ី និងអ្នកគាំទ្រអ៊ុយរូហ្កាយនៅ Copa America 2024

បាល់ទាត់
July 15th, 2024 (6 months)
820 Views
Share

សហព័ន្ធបាល់ទាត់ទ្វីបអាមេរិកខាងត្បូង CONMEBOL បានសម្រេចបើកការស៊ើបអង្កេត ករណីជម្លោះរវាងក្រុមអ្នកគាំទ្រកូឡុំប៊ី និងក្រុមអ្នកគាំទ្រ ព្រមទាំងកីឡាករអ៊ុយរូហ្កាយ ដែលក្នុងនោះក៏មានខ្សែប្រយុទ្ធ Darwin Nunez សមាជិកក្លិប Liverpool ផងដែរ នៅក្នុងព្រឹត្តិការណ៍ Copa America 2024។

រឿងរ៉ាវជម្លោះបានកើតឡើង ក្រោយពេលក្រុមជម្រើសជាតិអ៊ុយរូហ្កាយត្រូវបានក្រុមជម្រើសជាតិ កូឡុំប៊ីទម្លាក់ចេញពីការប្រកួត នៅវគ្គពាក់កណ្តាលផ្តាច់ព្រ័ត្រ ដោយលទ្ធផល ១-០ នាពេលកន្លងទៅ។

វីដេអូឃ្លីបមួយបានបង្ហាញពី ការប៉ះទង្គិចគ្នារបស់ក្រុមអ្នកគាំទ្រកូឡុំប៊ី និងក្រុមអ្នកគាំទ្រអ៊ុយរូហ្កាយ ហើយស្រាប់តែមានវត្តមានខ្សែប្រយុទ្ធ Darwin Nunez និងខ្សែការពារ Ronald Araujo របស់ក្រុមអ៊ុយរូហ្កាយ ឡើងទៅប្រតាយប្រតប់ប្រើហិង្សាដាក់អ្នកគាំទ្រកូឡុំប៊ីដែរ។

យ៉ាងណា មានការអះអាងថា ការដែលក្រុមកីឡាករ មានវត្តមាននៅក្នុងការប៉ះទង្គិចគ្នានោះគឺដោយសារពួកគេព្យាយាមចូលទៅការពារក្រុមគ្រួសារពីការប្រើហិង្សា និងដើម្បីជួយសម្រួលស្ថានការណ៍ជម្លោះអោយធូរស្រាល វិញតែប៉ុណ្ណោះ។

បែបនេះក្តី សហព័ន្ធបាល់ទាត់ទ្វីបអាមេរិកខាងត្បូង CONMEBOL បានចេញសេចក្តីថ្លែងការណ៍ទាក់ទងករណីនេះថា ពួកគេនឹងបើកការស៊ើបអង្កេតដើម្បីស្វែងរកឬសគល់ប្រភពដែលនាំអោយរឿងរ៉ាវជម្លោះកើតឡើង។

CONMEBOL ក៏បញ្ជាក់ថា គ្មានសកម្មភាពណាមួយនឹងត្រូវបានអត់ឱនឡើយ ពេលធ្វើអោយការប្រារព្ធពិធីបាល់ទាត់អន្តរជាតិមានការរអាក់រអួល។

ដោយឡែក ប្រសិនបើរកឃើញថា មានកំហុសឆ្គងល្មើសនឹងគោលការណ៍ នោះស្ថាប័ន CONMEBOL នឹងធ្វើការដាក់ពិន័យ ចំពោះអ្នកគាំទ្រក្រុមទាំងសងខាង ហើយកីឡាករដែលពាក់ព័ន្ធក៏នឹងរងទណ្ឌកម្ម បន្ថែមផងដែរ៕

អត្ថបទទាក់ទង

CONMEBOL បើកការស៊ើបអង្កេតការប្រើហិង្សារវាងអ្នកគាំទ្រកូឡុំប៊ី និងអ្នកគាំទ្រអ៊ុយរូហ្កាយនៅ Copa America 2024

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស