ខ្សែប្រយុទ្ធ Harry Kane ថា ខ្លួនខកចិត្តខ្លាំងបំផុត ក្រោយមិនអាចយកបានជើងឯក UEFA Euro 2024

បាល់ទាត់
July 17th, 2024 (8 months)
648 Views
Share

ខ្សែប្រយុទ្ធ Harry Kane បាននិយាយថា ខ្លួនមានការខកចិត្តខ្លាំងបំផុត ក្រោយមិនអាចជួយក្រុមបាល់ទាត់ជម្រើសជាតិអង់គ្លេស កា្លយជាម្ចាស់ជើងឯកពានរង្វាន់ UEFA Euro 2024។

ជាការពិត អង់គ្លេសបានជួបរឿងខកចិត្តជាលើកទី២ជាប់ៗគ្នា ដោយបានត្រឹមតំណែងរងជើងឯកនៃព្រឹត្តិការណ៍ប្រកួតបាល់ទាត់ទ្វីបអឺរ៉ុប បន្ទាប់ពីពួកគេបានចាញ់ក្រោមថ្វីជើងអេស្ប៉ាញ លទ្ធផល ២-១ ជំនួបផ្តាច់ព្រ័ត្រ Euro 2024។

ប្រធានក្រុម Harry Kane បង្ហាញអារម្មណ៍សោកស្តាយ និងថារូបគេខូចចិត្តបំផុតដែលមិនអាចសម្រេចលទ្ធផលដែលបានទន្ទឹងរង់ចាំអស់ពេលជាយូរ។

កីឡាករវ័យ៣០ឆ្នាំ បានរៀបរាប់ដូច្នេះថា “ជារឿងខូចចិត្តខ្លាំងបំផុតដែលយើងមិនអាចទទួលនូវសមិទ្ធផលដែលយើងបានខិតខំប្រឹងយ៉ាងលំបាក។ យើងមានមោទនភាព ដែលអាចឡើងដល់វគ្គផ្តាច់ព្រ័ត្រ តែយើងត្រូវជួបរឿងសោកស្តាយខ្លាំងបំផុតគឺយើងមិនសម្រេចគោលដៅសាជាថ្មី។ យ៉ាងណា យើងក៏ត្រូវតែលើកទឹកចិត្តវិញ និងត្រៀមខ្លួនសម្រាប់ការប្រកួតបន្ត។”

ចាញ់ការប្រកួតធ្វើអោយអង់គ្លេស ត្រូវរង់ចាំការឈ្នះពាន UEFA Euro បន្តទៀត ខណៈពួកគេមិនដែលបានឈ្នះសោះតាំងពីពានរង្វាន់នេះចាប់ផ្តើមប្រកួតជាលើកដំបូងនៅឆ្នាំ ១៩៦០មក។

នេះក៏ជាលើកទី២ជាប់គ្នាដែរ ដែលអង់គ្លេសបានទទួលតំណែងរងជើងឯក ពានរង្វាន់ UEFA Euro ដោយកាលពី UEFA Euro 2020 ពួកគេបានចាញ់ក្រោមថ្វីជើងអ៊ីតាលី នៅវគ្គផ្តាច់ព្រ័ត្រ៕

អត្ថបទទាក់ទង

ខ្សែប្រយុទ្ធ Harry Kane ថា ខ្លួនខកចិត្តខ្លាំងបំផុត ក្រោយមិនអាចយកបានជើងឯក UEFA Euro 2024

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស