FIFA ស៊ើបអង្កេតវីដេអូដែលក្រុមកីឡាករអាហ្សង់ទីនរើសអើងកីឡាករបារាំង

បាល់ទាត់
July 19th, 2024 (8 months)
847 Views
Share

សហព័ន្ធបាល់ទាត់ពិភពលោក FIFA បានបើកការស៊ើបអង្កេតទៅលើករណីវីដេអូបង្ហោះ ដែលបង្ហាញពីមិត្តរួមក្រុមជម្រើសជាតិអាហ្សង់ទីន ស្រែកច្រៀងចម្អក និង រើសអើងកីឡាករបារាំង ក្រោយពេលពួកគេបានឈ្នះពានរង្វាន់ Copa America 2024។

រឿងហេតុដែលជាប់ទាក់ទងគ្នារហូតមានការច្រៀងចម្អក ប្រើពាក្យរើសអើង ដោយសារតែ ខ្សែបម្រើ Enzo Fernandez បានបង្ហោះវីដេអូនៅលើបណ្តាញសង្គម Instagram បង្ហាញពីការអបអរការឈ្នះជើងឯកពានរង្វាន់ Copa America ក្រោយអាហ្សង់ទីនឈ្នះការប្រកួតលទ្ធផល ១-០ លើកូឡុំប៊ី ក្នុងវគ្គផ្តាច់ព្រ័ត្រ។

ការស្រែកច្រៀងនោះ បានសំដៅចំៗទៅកាន់កីឡាករខ្សែប្រយុទ្ធ Kylian Mbappe និងកីឡាករមានដើមកំណើតអាហ្រ្វិកដទៃផ្សេងទៀតស្ថិតក្នុងក្រុមជម្រើសជាតិបារាំង ក៏ទទួលបានការរើសអើងដែរ។

កាលពីឆ្នាំ ២០២២ ដែលព្រឹត្តិការណ៍ FIFA World Cup ធ្វើឡើងក្នុងប្រទេសកាតា អាហ្សង់ទីនបានក្លាយជាជើងឯកពិភពលោក ក្រោយយកឈ្នះបារាំងដោយបាល់កាត់សេចក្តី ១១ម៉ែត្រ។

ជុំវិញរឿងនេះ សហព័ន្ធបាល់ទាត់បារាំង FFF មានការភ្ញាក់ផ្អើល និង ខឹងសម្បារ ចំពោះទង្វើរបស់កីឡាករក្រុមអាហ្សង់ទីន និងបានដាក់ពាក្យប្តឹងទៅកាន់ FIFA ជុំវិញករណីវីដេអូដែលបានបង្ហោះនោះ ពីភាពរើសអើងមិនអាចទទួលយកបាន។

សម្រាប់ FIFA វិញ បានអោយដឹងថា ពួកគេកំពុងពិនិត្យមើលវិដេអូនោះ និងបានថ្កោលទោលយ៉ាងខ្លាំងចំពោះការរើសអើងពូជសាសន៍រាល់គ្រប់រូបភាព ពីនរណាម្នាក់ មិនថាជាកីឡាករនោះឡើយ រួមទាំងអ្នកគាំទ្រ ឬក៏មន្ត្រីការប្រកួត។

ទោះបែបនេះក្តី អនុប្រធានាធិបតីអាហ្សង់ទីន លោកស្រី Victoria Villarruel បានចេញមុខការពារកីឡាករក្រុមបាល់ទាត់ជម្រើសជាតិខ្លួន និងថា កីឡាករអាហ្សង់ទីនអាចនិយាយការពិតអំពីប្រទេសដែលធ្លាប់ដាក់អណានិគមទៅលើប្រទេសដទៃ៕

អត្ថបទទាក់ទង

FIFA ស៊ើបអង្កេតវីដេអូដែលក្រុមកីឡាករអាហ្សង់ទីនរើសអើងកីឡាករបារាំង

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស