លោក Carlo Ancelotti កោតសរសើរ Kylian Mbappe ក្រោយរួមចំណែករកគ្រាប់បាល់ជួយ Real Madrid ឈ្នះ Atalanta ក្នុងពានរង្វាន់ UEFA Super Cup

បាល់ទាត់
August 15th, 2024 (2 months)
237 Views
Share

គ្រូបង្វឹក លោក Carlo Ancelotti បានធ្វើការកោតសរសើរការលេងរបស់ខ្សែប្រយុទ្ធចំណូលថ្មី Kylian Mbappe ក្រោយពីរូបគេបានរួមចំណែករកគ្រាប់បាល់ជួយ Real Madrid ឈ្នះ Atalanta ក្នុងពានរង្វាន់ UEFA Super Cup ។

ជាការពិត ការប្រកួតដែលធ្វើឡើងនាកីឡដ្ឋាន PGE Narodowy ក្នុងទីក្រុង Warsaw ប្រទេសប៉ូឡូញ កាលពីយប់មិញ ក្រុមទាំង២បានបង្ហាញការលេងល្អដូចគ្នា ដោយស្ថិតិនៃការគ្រប់គ្របគ្រាប់បាល់គឺ Real Madrid មាន ៥១,៨ ភាគរយ ប៉ុន្តែឱកាសនៃការស៊ុតបាល់ Real Madrid មានដល់ទៅ ១៣ដង ខណៈ Atalanta មានតែ៧ដង។ យ៉ាងណា វគ្គទី១ មិនមានការស៊ុតបញ្ចូលទីនោះទេ ពីសំណាក់ក្រុមទាំងសងខាងគឺ ០-០។

ឈានចូលដល់វគ្គទី២ Real Madrid ហាក់មានប្រៀបជាងគូប្រជែងរបស់ខ្លួន ដោយក្នុងនោះនៅនាទី ៥៩ ខ្សែបម្រើ Federico Valverde បានទាត់បញ្ចូលទីក្រោមការបញ្ចូនពី Vinicius Junior ដើម្បីផ្តល់ការនាំមុខមុនដល់ក្រុមអធិរាជស។ នៅនាទី ៦៨ កីឡាករចំណូលថ្មី Kylian Mbappe បានទទួលបាល់ពី Jude Bellingham ដើម្បីស៊ុតបញ្ចូលទី គ្រាប់ដំបូង ក្នុងការបង្ហាញខ្លួនលើកដំបូង ជួយអោយ Real Madrid បង្កើនការនាំមុខគ្រាប់ទី២។ រីឯក្រុម Atalanta វិញ ប្រឹងប្រែងបង្កើតឱកាសជាច្រើនដងដែរ ប៉ុន្តែមិនបានសម្រេច។ លទ្ធផល Real Madrid ២ Atalanta ០ ក៏បន្តដល់ចប់ការប្រកួត។

ជាមួយការសម្រេចជោគជ័យរបស់កូនក្រុមជាពិសេស ទម្រង់លេងល្អរបស់ខ្សែប្រយុទ្ធចំណូលថ្មី Kylian Mbappe បានធ្វើអោយគ្រូបង្វឹក Real Madrid លោក Carlo Ancelotti មានការពេញចិត្ត និងកោតសរសើរចំពោះរូបគេយ៉ាងខ្លាំង។

គ្រូបង្វឹក ជនជាតិអ៊ីតាលីបាននិយាយអោយដឹងក្រោយចប់ការប្រកួតថា “Mbappe មានគុណភាពដ៏ធំសម្បើម។ គេពិតជាធ្វើការបានយ៉ាងល្អ ហើយលេងយ៉ាងស៊ីចង្វាក់ជាមួយមិត្តរួមក្រុមថ្មីរបស់គេ។ នេះជាអ្វីដែលខ្ញុំកោតសរសើរ ទេពកោសល្យរបស់គេ។”

សូមបញ្ជាក់ថា ការឈ្នះពានរង្វាន់ UEFA Super Cup នេះ គឺជាការឈ្នះលើកទី៦របស់ Real Madrid ដែលធ្វើអោយពួកគេជាក្រុមឈ្នះពានរង្វាន់នេះច្រើនជាងគេ វ៉ាហួសក្រុម Barcelona និង AC Milan ដែលឈ្នះ៥ដងដូចគ្នា៕

អត្ថបទទាក់ទង

លោក Carlo Ancelotti កោតសរសើរ Kylian Mbappe ក្រោយរួមចំណែករកគ្រាប់បាល់ជួយ Real Madrid ឈ្នះ Atalanta ក្នុងពានរង្វាន់ UEFA Super Cup

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស