ខ្សែប្រយុទ្ធ Harry Kane ទទួលបានស្បែកជើងមាសអឺរ៉ុបជាផ្លូវការ

បាល់ទាត់
August 29th, 2024 (2 months)
240 Views
Share

ខ្សែប្រយុទ្ធ Harry Kane របស់ក្លិប Bayern Munich បានទៅទទួលពានរង្វាន់ស្បែកមាសអឺរ៉ុប European Golden Shoe Award ដែលកម្មវិធីប្រគល់ពានរង្វាន់បានធ្វើឡើងនាទីក្រុង Munich ប្រទេសអាល្លឺម៉ង់។

ពានរង្វាន់ស្បែកជើងមាសអឺរ៉ុប European Golden Shoe Award នេះត្រូវផ្តល់អោយកីឡាករដែលបានស៊ុតបញ្ចូលទីច្រើនជាងគេក្នុងការប្រកួតលីគបាល់ទាត់តំបន់អឺរ៉ុប ក្នុងរដូវកាលមុន។

ជាក់ស្តែង កាលពីរដូវកាល ២០២៣-២៤ កីឡាករអង់គ្លេស បានស៊ុតបញ្ចូលទីរហូតដល់ទៅ៣៦គ្រាប់ពីការបង្ហាញខ្លួន៣២ដងនៅក្របខណ្ឌ Bundesliga ដែលជាការប្រកួតរដូវកាលដំបូងរបស់គេជាមួយ Bayern Munich បន្ទាប់ពីផ្លាស់មកពីក្លិប Tottenham Hotspur។ បើសរុបពីការស៊ុតបញ្ចូលទីគ្រប់កម្មវិធីរបស់ Kane ជាមួយ Bayern Munich វិញ គឺរូបគេស៊ុតបានដល់ទៅ ៤៤គ្រាប់ពីការប្រកួត ៤៥ដង ប៉ុន្តែគួរអោយសោកស្តាយដោយរូបគេមិនអាចជួយក្លិបឈ្នះពានរង្វាន់ណាមួយទេ។

កីឡាករវ័យ ៣១ឆ្នាំ គឺជាកីឡាករអង់គ្លេសដំបូងគេ ដែលបានឈ្នះពានរង្វាន់ស្បែកជើងមាសអឺរ៉ុប European Golden Shoe Award ចាប់តាំងពី Kevin Phillips ក្នុងឆ្នាំ ២០០០ ហើយរូបគេក៏ជាកីឡាករក្លិប Bayern Munich ទី៣ដែលឈ្នះពានរង្វាន់នេះបន្ទាប់ពីខ្សែប្រយុទ្ធ Gerd Muller និង ខ្សែប្រយុទ្ធ Robert Lewandowski ។

សម្រាប់ ការទទួលបានពានរង្វាន់ស្បែកជើងមាសនេះដែរ Kane បានប្រាប់ថា “ការចុះហត្ថលេខាលេងជាមួយ Bayern Munich គឺជាជំហានដ៏ធំមួយក្នុងអាជីពរបស់ខ្ញុំ និងជាការសម្រេចចិត្តដ៏ល្អបំផុតមួយនៃជីវិតជាកីឡាករបាល់ទាត់។”

សូមបញ្ជាក់ថា នេះក៏ជាលើកដំបូងដែរ ដែល Harry Kane បានឈ្នះពានរង្វាន់ស្បែកជើងមាស។ បើនិយាយពី អ្នកឈ្នះពានរង្វាន់ស្បែកជើងមាស European Golden Shoe Award នេះ គឺ អតីតខ្សែប្រយុទ្ធ Barcelona Lionel Messi គឺជាកីឡាករតែមួយគត់ដែលឈ្នះពានរង្វាន់នេះច្រើនជាងគេគឺ៦ ដង ខណៈអតីតខ្សែប្រយុទ្ធ Real Madrid Cristiano Ronaldo ជាកីឡាករទី២ឈ្នះច្រើនជាងគេចំនួន៤ ដង៕

អត្ថបទទាក់ទង

ខ្សែប្រយុទ្ធ Harry Kane ទទួលបានស្បែកជើងមាសអឺរ៉ុបជាផ្លូវការ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស