គ្រូ Real Madrid ថា Kylian Mbappe ជាកីឡាករមានគុណភាពខ្ពស់មួយរូប

បាល់ទាត់
September 2nd, 2024 (1 month)
238 Views
Share

គ្រូបង្វឹក Real Madrid លោក Carlo Ancelotti បាននិយាយលើកសរសើរ ខ្សែប្រយុទ្ធ Kylian Mbappe ថា រូបគេគឺជាកីឡាករមានសមត្ថភាពនិងគុណភាពខ្ពស់មួយរូប។

ការលើកឡើងរបស់លោក Carlo Ancelotti គឺបន្ទាប់ពីកីឡាករបារាំង បានស៊ុតបញ្ចូលទី២គ្រាប់ជួយអោយ Real Madrid យកឈ្នះ Real Betis ដោយលទ្ធផល ២-០ នៅក្នុងជំនួបក្របខណ្ឌ La Liga កាលពីយប់មិញ។

ការប្រកួតនាទីលាន Santiago Bernabéu មិនគ្រាប់បាល់កើតឡើងទេ បើទោះជាក្រុមម្ចាស់ផ្ទះ Real Madrid បានវាយសម្រុកដាក់សម្ពាធទៅលើគូប្រកួតខ្លាំងក៏ដោយ។

យ៉ាងណាមិញ ឈានចូលដល់វគ្គទី២ នាទី៦៧ Kylian Mbappe ជាអ្នកបំបែកភាពស្ងប់ស្ងាត់ ដោយការស៊ុតបញ្ចូលទីគ្រាប់បាល់បើកឆាកសម្រាប់ក្រុម Real Madrid។ នាទី ៧៥ Rui Silva កីឡាករ របស់ Real Betis បានបង្កកំហុសលើ Vinicius Junior ដែលធ្វើអោយក្រុមម្ចាស់ផ្ទះ មានឱកាសទាត់បាល់ពិន័យ១១ម៉ែត្រ ហើយ Kylian Mbappe ដដែលជាអ្នកស៊ុតបញ្ចូលទីបានសម្រេច ហើយលទ្ធផល ២-០ បានបន្តដល់ចប់ការប្រកួត។ នេះជាការស៊ុតគ្រាប់បាល់បានសម្រេចលើកដំបូងរបស់ Mbappe នៅក្នុងការប្រកួត La Liga និងជាគ្រាប់បាល់ទី៣របស់គេស៊ុតអោយ Real Madrid ពីការបង្ហាញខ្លួន ៥ដង គ្រប់កម្មវិធី។

ចំពោះទម្រង់លេងល្អរបស់កីឡាករ វ័យ២៥ឆ្នាំ បានធ្វើអោយ គ្រូបង្វឹក លោក Carlo Ancelotti មានភាពរីករាយ និងថា Mbappe ជាកីឡាករមានសមត្ថភាពមិនអាចជំនួសបាននៅក្នុងក្រុម Real Madrid នៅពេលនេះ។

គ្រូបង្វឹកវ័យ ៦៥ឆ្នាំ បានថ្លែងដូចនេះថា “Kylian Mbappe បានបង្ហាញនូវគុណភាពទាំងអស់របស់គេ។ រូបគេនៅក្មេង និងបានបង្ហាញពីរបៀបលេងបាល់ទាត់យ៉ាងត្រឹមត្រូវបន្តិចម្តងៗ។ និយាយដោយត្រង់ ខ្ញុំយល់ថា រូបគេគឺជាកីឡាករដែលមិនអ្នកអាចជំនួសបានទេនៅក្នុងក្រុមរបស់យើងនៅពេលនេះ។”

លោក Carlo Ancelotti បន្តថា “ការដែលកីឡាកររបស់យើងលេងបានល្អ ព្រោះយើងមិនដែលដាក់សម្ពាធលើពួកគេទេ។ ពួកគេតែងតែក្តោបក្តាប់ឱកាសបានជានិច្ច។”

ឆ្លងកាត់៤ប្រកួតកន្លងមកនៅក្របខណ្ឌ La Liga រដូវកាលថ្មី 2024-25 នេះ Real Madrid ឈ្នះ២ដង ស្មើ២ ដង មាន៨ពិន្ទុឈរលេខ២ ក្រោមគូប្រជែង Barcelona ដែលឈរកំពូលតារាង មាន១២ពិន្ទុ៕

អត្ថបទទាក់ទង

គ្រូ Real Madrid ថា Kylian Mbappe ជាកីឡាករមានគុណភាពខ្ពស់មួយរូប

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស