គ្រូព័រទុយហ្កាល់ បង្ហាញក្តីរំភើបចំពោះ Cristiano Ronaldo ដែលក្លាយជាបុរសទី១ក្នុងលោកដែលរកគ្រាប់បាល់បាន៩០០គ្រាប់ក្នុងអាជីព

បាល់ទាត់
September 6th, 2024 (1 month)
306 Views
Share

គ្រូបង្វឹកក្រុមបាល់ទាត់ជម្រើសជាតិព័រទុយហ្កាល់ លោក Roberto Martínez បានបង្ហាញពីក្តីរំភើបចំពោះ ខ្សែប្រយុទ្ធ Cristiano Ronaldo ដែលបានក្លាយជាបុរសទី១ នៅលើពិភពលោកដែលរកគ្រាប់បាល់បាន៩០០គ្រាប់ក្នុងអាជីព។

ជាការពិត ១គ្រាប់យប់មិញរបស់ Cristiano Ronaldo នៅនាទីទី៣៤ ក្នុងការប្រកួតដែលក្រុមព័រទុយហ្កាល់ ឈ្នះ ក្រុមក្រូអាត នៅក្នុងពានរង្វាន់ UEFA Nations League គឺជាគ្រាប់បាល់ទី៩០០ ក្នុងអាជីពរបស់គេ ហើយវាបានជួយអោយកីឡាករ វ័យ៣៩ឆ្នាំ ជាប់កំណត់ត្រាកីឡាករទី១ក្នុងលោកដែលរកបានគ្រាប់បាល់ច្រើនបំផុតក្នុងអាជីព។

ជំនួបដែលធ្វើឡើងនាកីឡដ្ឋាន Estádio da Luz ស្ថិតនាទីក្រុង Lisbon ក្រុមព័រទុយហ្គាល់ដែលជាម្ចាស់ផ្ទះ បានយកឈ្នះទៅលើក្រូអាត ដោយលទ្ធផល ២-១។ គ្រាប់បាល់របស់ព័រទុយហ្កាល់កើតឡើងនៅនាទី ៧ ដែលស៊ុតបញ្ចូលទីនៅនាទី៧ មុនពេល Ronaldo បានទាត់បាល់ Volleyed យ៉ាងស្អាតនៅនាទីទី៣៤ ដើម្បីជួយព័រទុយហ្គាល់នាំមុខក្រូអាត ២-០។ យ៉ាងណាមិញ ក្រូអាតតាមបាន ១គ្រាប់មកវិញ ដោយការធ្វើអោយចូលទីខ្លួនឯងរបស់ Diogo Dalot នាទីទី៤១។

នៅវគ្គទី២មិនមានគ្រាប់បាល់ត្រូវស៊ុតបញ្ចូលទីជាបន្តទេ ដោយលទ្ធផល ព័រទុយហ្កាល់ ២ ក្រូអាត ១ បន្តដល់ចប់ការប្រកួត។

ជាមួយនឹងភាពជោគជ័យរបស់ក្រុម នេះដែរ បានធ្វើអោយគ្រូបង្វឹក លោក Roberto Martínez មានភាពរីករាយ និងកោតសរសើរការធ្វើបានល្អរបស់កីឡាករគ្រប់រូប ជាពិសេសការបង្កើតកំណត់ត្រារបស់ Cristiano Ronaldo។

គ្រូបង្វឹកវ័យ ៥១ឆ្នាំ បាននិយាយក្រោយចប់ការប្រកួតបែបនេះ “ វាជាឱកាសពិសេសណាស់សម្រាប់ Ronaldo ព្រោះការស៊ុតបញ្ចូលទីបាន៩០០គ្រាប់មិនមែនជារឿងងាយស្រួលនោះទេ។ គេស៊ុតបានដោយសារតែការលះបង់របស់គេចំពោះក្រុមជម្រើសជាតិ និងការហ្វឹកហាត់ដ៏ព្យាយាម។ វាអស្ចារ្យណាស់សម្រាប់ប្រវត្តិសាស្ត្របាល់ទាត់ព័រទុយហ្គាល់ សម្រាប់ Ronaldo និងបាល់ទាត់ពិភពលោក ហើយវាក៏ជាគំរូដ៏ល្អសម្រាប់កីឡាករជំនាន់ក្រោយ។”

សូមបញ្ជាក់ថា វាជាគ្រាប់បាល់ទី១៣១សម្រាប់ក្រុមជម្រើសជាតិព័រទុយហ្គាល់បន្ទាប់ពី Cristiano Ronaldo រកបានគ្រាប់បាល់ដំបូងកាលពី២០ឆ្នាំមុន។ បើគិតទៅ Ronaldo រកបានគ្រាប់បាល់អោយក្លិបដែលបានប្រកបអាជីពជាមួយក្នុងនោះមាន Sporting Lisbon, Man UTD, Real Madrid, Juventus និងក្លិបកំពុងលេងបច្ចុប្បន្ន Al-Nassr នៅអារ៉ាប៊ីសាអ៊ូឌីតផងដែរ៕

អត្ថបទទាក់ទង

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស