ព្រឹត្តិការណ៍ប៉ារ៉ាឡាំពិកឆ្នាំ២០២៤ ធ្វើពិធីបិទបញ្ចប់ជាផ្លូវការ

Olympic, កីឡាចម្រុះ
September 9th, 2024 (1 month)
85 Views
Share

ព្រឹត្តិការណ៍ប្រកួតកីឡាជនពិការប៉ារ៉ាឡាំពិក ទីក្រុងប៉ារីស ឆ្នាំ ២០២៤ ដែលដំណើរការតាំងពីថ្ងៃទី ២៨ ខែសីហា បានបិទបញ្ចប់កម្មវិធីប្រកួតផ្លូវការហើយកាលពីយប់មិញ ដែលបានធ្វើឡើងនាកីឡដ្ឋាន Stade de France។

ក្រោយដំណើរការប្រកួតកីឡាប៉ារ៉ាឡាំពិកប៉ារីសជាផ្លូវការរយៈ១១ថ្ងៃ មានប្រជាជាតិចំនួន ៨៥ រកបានមេដាយរៀងខ្លួន ក្នុងចំណោមប្រជាជាតិចំនួន ១៦៧ ដែលបានចូលរួម។

ចិន នៅតែរក្សាចំណាត់ថ្នាក់កំពូលតារាងរបស់ខ្លួននៅប៉ារ៉ាឡាំពិក ប៉ារីស ឆ្នាំ ២០២៤នេះ ខណៈចក្រភពអង់គ្លេស និងអាមេរិក ក៏នៅតែជាក្រុមគូប្រជែង ដែលទទួលបានចំណាត់ថ្នាក់លេខ២ និងលេខ៣ ដដែលដូចគ្នា។ នេះព្រឹត្តិការណ៍ប៉ារ៉ាឡាំពិកលើកទី៥ជាប់គ្នា ដែលចិនបញ្ចប់ក្នុងចំណាត់ថ្នាក់កំពូលតារាង ក្រោយធ្វើបាន៤រួចមកហើយចាប់ពី ឆ្នាំ ២០០៤មក។ ចក្រភពអង់គ្លេស ទទួលបានលេខពីរ ៣លើកជាប់គ្នា ចាប់ពីឆ្នាំ ២០១៦មក។

ក្រុមអត្តពលិកចិន ដណ្តើមបានមេដាយសរុប ២២០ ក្នុងនោះមាស ៩៤ ប្រាក់ ៧៦ និងសំរឹទ្ធ៥០ ស្របពេលចក្រភពអង់គ្លេស រកបានមេដាយសរុប ១២៤ ក្នុងនោះមាស ៤៩ ប្រាក់ ៤៤ និងសំរឹទ្ធ៣១ និងលេខ៣អាមេរិក ប្រមួលបានមេដាយមាស ៣៦ ប្រាក់ ៤២ និងសំរឹទ្ធ២៧ សរុប ១០៥។ ម្ចាស់ផ្ទះបារាំង បញ្ចប់ក្នុងចំណាត់ថ្នាក់លេខ៨ ដោយរកបានមេដាយមាស ១៩ ប្រាក់ ២៨ និងសំរឹទ្ធ ២៨ សរុប ៧៥។

ដោយឡែក នៅក្នុងពិធីបិទព្រឹត្តិការណ៍ប៉ារ៉ាឡាំពិក ទីក្រុងប៉ារីស ឆ្នាំ ២០២៤ មានទស្សនីយភាពដ៏ទាក់ទាញជាច្រើន មានទាំងការរាំច្រៀង ការអបអរ ការដង្ហែររបស់អត្តពលិក អមដោយវត្តមានរបស់ថ្នាក់ដឹកនាំប្រទេសបារាំង ដូចជាប្រធានាធិបតីបារាំង លោក Emmanuel Macron រួមទាំងការចូលរួមរបស់អ្នកគាំទ្រយ៉ាងច្រើនផងដែរ និងមានការបាញ់កាំជ្រួចអបអរសាទរភាពទទួលជោគជ័យរបស់ប្រទេសបារាំង ក្នុងការដំណើរការការធ្វើជាម្ចាស់ផ្ទះទាំងព្រឹត្តិការណ៍អូឡាំពិក និង ប៉ារ៉ាឡាំពិក បានដោយរលូន។

ជាចុងបញ្ចប់ អភិបាលក្រុងប៉ារីស លោកស្រី Anne Hidalgo បានជូនទង់ប៉ារ៉ាឡាំពិក ដល់គណៈកម្មាធិការប៉ារ៉ាឡាំពិកអន្តរជាតិ លោក Andrew Parsons ដែលនឹងបន្តផ្តល់ទង់នេះ ទៅដល់អភិបាលក្រុង Los Angeles លោកស្រី Karen Bass ដែលទីក្រុង Los Angeles សហរដ្ឋអាមេរិកនេះ នឹងជាទីតាំងបន្តសម្រាប់ការប្រកួតអូឡាំពិក និង ប៉ារ៉ាឡាំពិក ជាបន្តនៅឆ្នាំ ២០២៨៕

អត្ថបទទាក់ទង

ព្រឹត្តិការណ៍ប៉ារ៉ាឡាំពិកឆ្នាំ២០២៤ ធ្វើពិធីបិទបញ្ចប់ជាផ្លូវការ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស