ខ្សែប្រយុទ្ធ Harry Kane ថា Cristiano Ronaldo ជាអ្នកជំរុញខ្លួនអោយលេងបាល់ទាត់បានយូរឆ្នាំ

បាល់ទាត់
September 11th, 2024 (1 month)
275 Views
Share

ខ្សែប្រយុទ្ធ Harry Kane បាននិយាយថា ខ្សែប្រយុទ្ធ Cristiano Ronaldo ជាអ្នកអ្នកជម្រុញទឹកចិត្តរបស់គេ អោយរក្សាការលេងបាល់ទាត់បានយូរឆ្នាំ។

ជាការពិត Harry Kane ដែលបច្ចុប្បន្នមាន ៣១ឆ្នាំ បានចូលលេងប្រកួតទី ១០០ អោយក្រុមបាល់ទាត់ជម្រើសជាតិអង់គ្លេស ដោយយកឈ្នះក្រុមហ្វាំងឡង់ដោយលទ្ធផល ២-០ នៅក្នុងការប្រកួត UEFA Nations League ជុំទី២ ក្រុមទី២ ពូល B ហើយគ្រាប់បាល់ជ័យជំនះទាំង២គ្រាប់នោះធ្វើបានដោយរូបគេទៀត។ ការបង្ហាញខ្លួននោះដែរ បានធ្វើអោយ Harry Kane ជាប់ក្នុងបញ្ជីកីឡាករលេងអោយក្រុមជម្រើសជាតិអង់គ្លេសច្រើនជាងគេលំដាប់ទី១០។

សម្រាប់ Cristiano Ronaldo វិញ បានរកបានគ្រាប់បាល់ទី៩០១ ក្នុងអាជីពបាល់ទាត់ ដែលមិនមានកីឡាករបាល់ទាត់រូបណាអាចធ្វើបាន ខណៈដែលកីឡាកររបស់ព័រទុយហ្គាល់រូបនេះបានឈានចូលដល់វ័យ៣៩ឆ្នាំទៅហើយ។

ជាមួយនឹងការបង្ហាញខ្លួននៅលើទីលានទោះជាមានវ័យច្រើនហើយក៏ដោយរបស់ Cristiano Ronaldo បានក្លាយជាការជម្រុញទឹកចិត្តមួយសម្រាប់ Harry Kane ក្នុងការលេងបាល់ទាត់ជាច្រើនទៀត។
ទាក់ទិននឹងរឿនេះ Harry Kane បាននិយាយថា “វាជាការប្រកួតដ៏រីករាយសម្រាប់ក្រុម និង រូបខ្ញុំ។ ខ្ញុំស្រឡាញ់ការប្រកួត ខ្ញុំស្រឡាញ់ក្រុមអង់គ្លេស ហើយខ្ញុំមិនទាន់ចង់បញ្ចប់វានៅពេលឆាប់ៗនេះទេ។ ខ្ញុំចង់នៅលេងបានយូរដូច Cristiano Ronaldo។”

សមាជិកក្លិប Bayern Munich បន្តថា “ Ronaldo ជាអ្នកជម្រុញទឹកចិត្តខ្ញុំ ហើយនៅពេលខ្ញុំបានឃើញរូបគេ រកបាន ៩០១ គ្រាប់នៅក្នុងអាជីពនោះ ខ្ញុំពិតជាចង់នៅលេងអោយបានយូរតាមដែលអាចធ្វើទៅបាន ទោះជាមានវ័យច្រើនក៏ដោយ។”

សូមបញ្ជាក់ដែរថា Harry Kane បានចូលលេងអោយក្រុមជម្រើសជាតិអង់គ្លេសនៅឆ្នាំ២០១៥ ដោយពេលនេះគេបង្ហាញខ្លួនបានគ្រប់១០០ប្រកួត និងរកបានគ្រាប់បាល់សរុបបានចំនួន ៦៨គ្រាប់ ដែលធ្វើអោយរូបគេគឺជាអ្នករកបានគ្រាប់បាល់បានច្រើនជាងគេសម្រាប់អង់គ្លេសមិនធ្លាប់មានកីឡាកររូបណាធ្វើបានឡើយ៕

អត្ថបទទាក់ទង

ខ្សែប្រយុទ្ធ Harry Kane ថា Cristiano Ronaldo ជាអ្នកជំរុញខ្លួនអោយលេងបាល់ទាត់បានយូរឆ្នាំ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស