ខ្សែប្រយុទ្ធ Rodrygo ថា ប្រេស៊ីល ត្រូវការ Neymar បើចង់ឈ្នះ FIFA World Cup 2026

បាល់ទាត់
September 12th, 2024 (1 month)
462 Views
Share

ខ្សែប្រយុទ្ធ Rodrygo បាននិយាយថា ក្រុមបាល់ទាត់ជម្រើសជាតិប្រេស៊ីល ត្រូវការខ្សែប្រយុទ្ធ Neymar ប្រសិនបើក្រុមចង់ឈ្នះពាន FIFA World Cup 2026 ។

កីឡាករវ័យ ២៣ឆ្នាំ ដែលរកគ្រាប់បាល់អោយក្រុមប្រេស៊ីលឈ្នះក្រុមអេក្វាឌ័រ ១-០ នៃការប្រកួតវគ្គជម្រុះពានរង្វាន់ FIFA World Cup 2026 តំបន់អាមេរិកខាងត្បូង កាលពីសប្តាហ៍មុន បានលើកឡើងពី Neymar ថា ជាកីឡាករសំខាន់ក្នុងការនាំប្រេស៊ីលទៅរកភាពជោគជ័យ។

ដោយឡែក អវត្តមានរបស់ Neymar បានធ្វើអោយក្រុមប្រេស៊ីល ជួបរឿងលំបាកជាច្រើនក្នុងការប្រកួតប្រជែងទល់នឹងក្រុមខ្លាំងក្នុងតំបន់ និងពិភពលោក ដោយការប្រកួតពានរង្វាន់ Copa America 2024 កន្លងទៅ ប្រេស៊ីលបានធ្លាក់ចេញត្រឹមវគ្គ ៨ក្រុម ចុងក្រោយ ខណៈកាលឆ្នាំ ២០២១ ប្រេស៊ីល ឡើងដល់វគ្គផ្តាច់ព្រ័ត្រ។

ទន្ទឹមនឹងនេះ ការប្រកួតរបស់ប្រេស៊ីល ដែលគ្មានវត្តមានរបស់ Neymar ហាក់ដូចជាបាត់បង់សមត្ថភាពខ្លាំងក្នុងការប្រកួតប្រជែងទល់នឹងក្រុមខ្លាំងៗ ដោយការប្រកួតវគ្គជម្រុះ FIFA World Cup 2026 កន្លងទៅ ក្រុមប្រេស៊ីលបានប្រកួតចាញ់ អាហ្សង់ទីន កូឡុំប៊ី អ៊ុយរូហ្គាយ ហើយបើទោះជាបានឈ្នះអេក្វាឌ័រ ប៉ុន្តែពួកគេបន្តចាញ់ប៉ារ៉ាហ្កាយ ដោយលទ្ធផល ១-០ ទៀត។

ការលើកឡើងទាក់ទងនឹង Neymar នេះដែរ Rodrygo បានបង្ហាញអារម្មណ៍នឹករលឹកដល់កីឡាករ ដែលធ្លាប់បានកសាងស្នាដៃជាច្រើនក្នុងក្រុមប្រេស៊ីល។

កីឡាករវ័យ២៣ឆ្នាំ បាននិយាយដូច្នេះ “Neymar ជាកីឡាករឆ្នើមរបស់ប្រេស៊ីល។ យើងបានបាត់វត្តមានរបស់គេយូរមកហើយ។ នៅពេលមាន Neymar វាគឺជារឿងអ្វីដែលយើងចង់បាន និងជាពិសេសគឺចង់អោយរូបគេជាសះស្បើយពីរបួសបានលឿនបំផុត។ យើងចង់បានរូបគេវិលត្រឡប់មកវិញអោយបានឆាប់បំផុត។”

នៅក្នុងការប្រកួតវគ្គជម្រុះ FIFA World Cup 2026 តំបន់ទ្វីបអាមេរិកខាងត្បូងវិញ ប្រេស៊ីលបច្ចុប្បន្នស្ថិតនៅចំណាត់ថ្នាក់លេខ ៥ រកបាន ១០ពិន្ទុ ក្រោយឆ្លងកាត់ការប្រកួតចំនួន ៨លើក និងមានគម្លាតពិន្ទុពីក្រុមកំពូលតារាងអាហ្សង់ទីនដល់ទៅ ៨ពិន្ទុ។ ប្រេស៊ីល ឈរពីក្រោមក្រុមកូឡុំប៊ី អ៊ុយរ៉ុហ្កាយ និង អេក្វាទ័រថែមទៀត។

សម្រាប់ការប្រកួត វគ្គជម្រុះពានរង្វាន់ FIFA World Cup 2026 តំបន់អាមេរិកខាងត្បូង ជាបន្ត ក្រុមប្រេស៊ីល នឹងត្រូវជួបក្រុមឈីលី និង ប៉េរូ នៅខែតុលា ខាងមុខ៕

អត្ថបទទាក់ទង

ខ្សែប្រយុទ្ធ Rodrygo ថា ប្រេស៊ីល ត្រូវការ Neymar បើចង់ឈ្នះ FIFA World Cup 2026

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស