ខ្សែប្រយុទ្ធ Cristiano Ronaldo ផ្ញើសារអរគុណគ្រូបង្វឹកលោក Luis Castro ក្រោយត្រូវបញ្ចប់តំណែងនៅ Al Nassr

បាល់ទាត់
September 19th, 2024 (4 weeks)
245 Views
Share

ខ្សែប្រយុទ្ធ Cristiano Ronaldo បានផ្ញើសារអរគុណលោក Luis Castro ក្រោយពេលបុរសសញ្ជាតិព័រទុយហ្កាល់ត្រូវបានក្លិប Al Nassr បញ្ចប់តំណែងពីតួនាទីគ្រូបង្វឹក។

ក្លិបនៅក្របខណ្ឌ Saudi Pro League បានសម្រេចចិត្តចែកផ្លូវជាមួយនឹង លោក Luis Castro ក្រោយពីបានដឹកនាំក្រុមធ្វើមិនបានល្អ សម្រាប់ការប្រកួតនៅដើមរដូវកាល។

ក្រោយក្លិបបញ្ចប់តំណែងបុរសវ័យ ៦៣ឆ្នាំ ខ្សែប្រយុទ្ធសញ្ជាតិព័រទុយហ្កាល់ Ronaldo ក៏បានផ្ញើសារបង្ហាញការគោរព និងអរគុណដល់លោក Castro។

កីឡាករ វ័យ ៣៩ឆ្នាំ បានសរសេរបង្ហោះនៅលើបណ្តាញសង្គម Instagram ភ្ជាប់ជាមួយនឹងរូបភាពដូច្នេះថា Luis Castro ខ្ញុំសូមអរគុណសម្រាប់គ្រប់យ៉ាង។

ចាប់តាំងពី Ronaldo បានផ្លាស់ទៅកាន់ក្លិប Al Nassr នៅដើមឆ្នាំ ២០២៣ រូបគេបានរួមការងារជាមួយនឹង Castro រហូតប្រជែងពានរង្វាន់ Arab King Cup of Champions នៅចុងរដូវកាល។

បុរសសញ្ជាតិព័រទុយហ្កាល់ទាំង ២ ក៏បានរួមគ្នាជួយ Al Nassr ឡើងដល់វគ្គពាក់កណ្តាលផ្តាច់ព្រ័ត្រពានរង្វាន់ AFC Champions League មុនពេលក្រុមបញ្ចប់នៅចំណាត់ថ្នាក់លេខ ២ ក្នុងលីគកំពូលអារ៉ាប៊ីសាអូឌីត។

ដោយឡែក ក្រោយពេលលោក Castro បានចាកចេញ ក្លិប Al Nassr ក៏ជ្រើសរើសលោក Stefano Piolo អតីតគ្រូបង្វឹក AC Milan មកជាគ្រូបង្វឹកថ្មីផងដែរ។

មុនមកកាន់តំណែងនៅ Al Nassr លោក Piolo ដែលបានចាកចេញពីក្លិប AC Milan នៅក្របខណ្ឌ Serie A នៅរដូវកាល ២០២៣-២៤ ត្រូវបានរាយការណ៍ថា អាចទៅដឹកនាំក្លិប Al Ittihad ប៉ុន្តែមិនបានក្លាយជាការពិត ដោយការជជែកពីកិច្ចព្រមព្រៀងត្រូវបានលុបចោល៕

អត្ថបទទាក់ទង

ខ្សែប្រយុទ្ធ Cristiano Ronaldo ផ្ញើសារអរគុណគ្រូបង្វឹកលោក Luis Castro ក្រោយត្រូវបញ្ចប់តំណែងនៅ Al Nassr

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស