UEFA ដកកីឡដ្ឋាន San Siro ពីទីតាំងរៀបចំការប្រកួតវគ្គផ្តាច់ព្រ័ត្រ UEFA Champions League ឆ្នាំ២០២៧

បាល់ទាត់
September 27th, 2024 (3 weeks)
259 Views
Share

ការប្រកួតបាល់ទាត់ ពានរង្វាន់ UEFA Champions League ឆ្នាំ២០២៧ វគ្គផ្តាច់ព្រ័ត្រ នឹងមិនធ្វើឡើងនាកីឡដ្ឋាន San Siro នៃទីក្រុង Milan ប្រទេសអ៊ីតាលីទៀតទេ ដោយសារកីឡដ្ឋានមួយនេះកំពុងមានភាពមិនច្បាស់លាស់អំពីអនាគតរបស់ខ្លួន។ នេះបើតាមការប្រកាសអោយដឹងពីសហព័ន្ធបាល់ទាត់អឺរ៉ុប UEFA។

ជាការពិត កាលពីពេលកន្លងទៅ ក្លិប AC Milan និង Inter Milan ដែលបានប្រើប្រាស់កីឡដ្ឋាន San Siro ជាទឹកដីរួមគ្នានោះ បានបដិសេធគម្រោងជួសជុលកីឡដ្ឋាន និងបានធ្វើសំណើកសាងកីឡដ្ឋានថ្មីតែម្តង ស្ថិតក្នុងតំបន់តែមួយ។

គម្រោងជួសជុលកីឡដ្ឋាន San Siro ដែលមានការជាប់ពាក់ព័ន្ធទៅនឹង AC Milan និង Inter Milan បានក្លាយជារឿងដ៏ចម្រូងចម្រាស់បានកើតឡើងនៅរយៈពេល៥ឆ្នាំចុងក្រោយ រួមទាំងជាប់ទាក់ទងទៅអាជ្ញាធរក្នុងតំបន់ទីក្រុង Milan ថែមទៀត។

កីឡដ្ឋាន San Siro ដែលមានឈ្មោះផ្លូវការថា Stadio Giuseppe Meazza អាចផ្ទុកមនុស្សបាន ៨ម៉ឺននាក់ ដោយវាបានដំណើរការតាំងពីឆ្នាំ ១៩២៦មក ប៉ុន្តែកីឡដ្ឋាននេះ បច្ចុប្បន្នមិនអាចឈានដល់តម្រូវការដែលក្លិបទាំង២ចង់បាននោះទេ។ កន្លងមកគម្រោងជួសជុលកីឡដ្ឋាន San Siro ទទួលបានការគាំទ្រពីសំណាក់ អភិបាលក្រុង Milan លោក Giuseppe Sala កាលពីដើមឆ្នាំ២០២៤ ប៉ុន្តែការជួសជុលឡើងវិញ ស្ថិតក្នុងតម្លៃយ៉ាងខ្ពស់។ ក្រោយមកក្លិបទាំងពីរ បានបង្ហាញបំណងចង់កសាងកីឡដ្ឋានថ្មី នៅតំបន់ក្បែរទីក្រុងដដែល។ ការបង្ហាញពីគំនិតចង់កសាងកីឡដ្ឋានថ្មីនេះ ដោយសារក្លិបទាំង ២ ចង់បង្កើនប្រាក់ចំណូល បន្ទាប់ពីជួបបញ្ហារអាក់រអួលជាមួយគ្នាយូរមកហើយ ទាក់ទងជាមួយនឹងកីឡដ្ឋានចាស់ San Siro នេះ។

ដោយសារភាពមិនច្បាស់លាស់ទាក់ទងនិងអនាគតរបស់កីឡដ្ឋាន San Siro ទើបស្ថាប័ន UEFA សម្រេចចិត្តដកកីឡដ្ឋាននេះ ពីទីតាំងរៀបចំវគ្គផ្តាច់ព្រ័ត្រ UEFA Champions League ឆ្នាំ២០២៧ និងបើកអោយមានការដេញថ្លៃស្វែងរកកីឡដ្ឋានថ្មីវិញ ដោយការដេញថ្លៃរំពឹងធ្វើឡើងចាប់ពីខែឧសភា ដល់ ខែមិថុនា ឆ្នាំ២០២៥ខាងមុខ។

សូមបញ្ជាក់ថា កាលពីការដេញថ្លៃធ្វើជាម្ចាស់ផ្ទះរៀបចំការប្រកួតវគ្គផ្តាច់ព្រ័ត្រ UEFA Champions League ឆ្នាំ ២០២៦ និង ២០២៧ នោះ មានតែទីក្រុង ២ប៉ុណ្ណោះ ដែលបានឈ្នះគឺទីក្រុង Budapest ប្រទេសហុងគ្រី និង ទីក្រុង Milan ប្រទេសអ៊ីតាលី។ ដូច្នេះវគ្គផ្តាច់ព្រ័ត្រ ការប្រកួត UEFA Champions League ឆ្នាំ ២០២៦ នឹងធ្វើឡើងនាកីឡដ្ឋានណាមួយនៃ ទីក្រុង Budapest ហើយ វគ្គផ្តាច់ព្រ័ត្រ ការប្រកួត UEFA Champions League ឆ្នាំ ២០២៧ នឹងធ្វើឡើងនាកីឡដ្ឋានថ្មីនាទីក្រុង Milan៕

អត្ថបទទាក់ទង

UEFA ដកកីឡដ្ឋាន San Siro ពីទីតាំងរៀបចំការប្រកួតវគ្គផ្តាច់ព្រ័ត្រ UEFA Champions League ឆ្នាំ២០២៧

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស