អនាគតលោក Erik ten Hag ជាមួយ Man UTD នៅតែមិនទាន់ច្បាស់លាស់

Premier League
October 11th, 2024 (1 year)
564 Views
Share

ក្លិប Man UTD មិនទាន់ធ្វើការសម្រេចចិត្តចុងក្រោយ អំពីអនាគតរបស់លោក Erik ten Hag ក្នុងនាមជាគ្រូបង្វឹកនៅឡើយទេ បើទោះជាមានការប្រជុំដ៏តានតឹងរបស់ថ្នាក់ដឹកនាំក្លិប រួចហើយក៏ដោយ។

ជាការពិត អនាគតរបស់គ្រូបង្វឹក Man UTD លោក Erik ten Hag កាន់តែមានភាពស្រពេចស្រពិល ឡើងជាលំដាប់ បន្ទាប់ពីការបរាជ័យជាបន្តបន្ទាប់ក្នុងការដឹកនាំក្រុម។ មកទល់បច្ចុប្បន្ន Man UTD មានទម្រង់លេងធ្លាក់ចុះខ្លាំងមែនទែន ជាពិសេសរដូវកាលថ្មីនេះដោយអាចទទួលបានជ័យជំនះត្រឹមតែ៣ដងប៉ុណ្ណោះក្នុងការប្រកួត ១១ លើក គ្រប់ពានរង្វាន់ទាំងអស់ ដោយក្នុងនោះមានមួយប្រកួតឈ្នះលើក្រុមមកពី League One ក្នុងពានរង្វាន់ EFL Cup។

ក្នុងដើមរដូវកាល ២០២៤-២៥ Man UTD ក៏បានជួបប្រទះបញ្ហា ដោយក្រុមមិនអាចរកបានគ្រាប់បាល់តាមតម្រូវការ ។ ការប្រកួត Premier League ៣លើក ចុងក្រោយមកនេះ Man UTD នៅមិនទាន់ស៊ុតបញ្ចូលទីគូប្រកួតបាននៅឡើយ។ ឆ្លងកាត់ការប្រកួត Premier League ៧លើករួចមក Man UTD ទើបតែស៊ុតបាល់ បញ្ចូលទី៥គ្រាប់ប៉ុណ្ណោះ ដែលនេះជាហេតុធ្វើអោយពួកគេជួបប្រទះកំណត់ត្រាដ៏អាក្រក់ថ្មី មួយបន្ថែមទៀត គឺការចាប់ផ្តើមរដូវកាលថ្មីមិនល្អ និងពិបាករកគ្រាប់បាល់ ចាប់តាំងពីរដូវ កាល ១៩៨៩-៩០។

ដោយសារការចាប់ផ្តើមរដូវកាលនេះមិនសូវល្អ ក្រុមបិសាចក្រហម កំពុងជួបការលំបាកក្នុងចំណាត់ថ្នាក់ទី ១៤ ក្នុងក្របខណ្ឌ Premier League ដែលនាំអោយមានការកើនឡើងសម្ពាធលើ Ten Hag ។ នេះបាននាំអោយមានការបើកកិច្ចប្រជុំថ្នាក់ដឹកនាំក្លិប Man UTD ដោយមានទាំងវត្តមានសហម្ចាស់ក្លិបលោក Jim Ratcliffe ដែលត្រូវបានធ្វើឡើង ដើម្បីពិភាក្សាអំពីស្ថានភាពរបស់ក្រុម ប៉ុន្តែមិនមានការសម្រេចចិត្តភ្លាមៗណាមួយត្រូវបានសម្រេចនៅឡើយទេ បើទោះជាការប្រជុំនោះចាយរយៈពេលដល់ទៅ៧ម៉ោងក្តី។ លោក Ratcliffe ត្រូវបានគេរាយការណ៍ថា កំពុងពិចារណាលើការផ្លាស់ប្តូរមួយ ទោះបីជាក្លិបមានបំណងចាត់វិធានការវាស់វែងមុននឹងសម្រេចក្តី។ ទោះយ៉ាងណា ការពិភាក្សាអំពីអនាគតរបស់លោក Erik ten Hag ត្រូវបានរំពឹងទុកថា នឹងបន្តធ្វើឡើង ខណៈពេលវេលានៃការដឹកនាំរបស់លោកនៅទឹកដី Old Trafford កាន់តែខើចទៅ។

បន្ទាប់ពីការសម្រាកអន្តរជាតិ Man UTD នឹងបន្តការប្រកួត Brentford និង West Ham នៅក្នុងក្របខណ្ឌ Premier League រួមទាំងការប្រកួតនៅក្របខណ្ឌ UEFA Europa League ទល់នឹង Fenerbahçe ដែលនឹងកា្លយជាការប្រកួតដើម្បីសម្រេចអំពីជោគវាសនារបស់លោក Erik ten Hag ក្នុងការកាន់តំណែងនៅ Man UTD ៕

អត្ថបទទាក់ទង