ប្រធានក្លិប Lyon ថា នឹងបន្តគាំទ្រគ្រូបង្វឹក លោក Paulo Fonseca ក្រោយត្រូវពិន័យមិនអោយចូលទីលាន៩ខែ

បាល់ទាត់
March 11th, 2025 (1 month)
413 Views
Share

ប្រធានក្លិប Lyon លោក John Textor បាននិយាយថា រូបលោកព្រមទាំងក្លិប និង បន្តគាំទ្រ គ្រូបង្វឹក លោក Paulo Fonseca នឹងតស៊ូប្រឆាំងជាមួយការដាក់ពិន័យបុរសវ័យ ៥២ឆ្នាំ។

ជាការពិត លោក Paulo Fonseca គ្រូបង្វឹក ក្រុមបាល់ទាត់ Lyon នៃក្របខណ្ឌ Ligue1 បារាំងត្រូវបានសហព័ន្ធបាល់ទាត់បារាំង កំណត់ដាក់ពិន័យចំនួន៩ខែ មិនអោយចូលដឹកនាំការប្រកួតរបស់ក្រុម ដោយសារតែកាយវិការរបស់លោកធ្វើហួសហេតុទៅលើមន្ត្រីដឹកនាំការប្រកួត និងអាជ្ញាកណ្ដាលក្នុងកំឡុងការប្រកួតកាលពីពេលកន្លងទៅ។

ហេតុការណ៍នេះកើតឡើងក្នុងពេលដែលក្រុម Lyon បានយកឈ្នះទៅលើក្រុម Brest ដោយលទ្ធផល ២-១ នាជំនួបលីគកំពូលបារាំងសប្ដាហ៍ទី២៤ នាកីឡដ្ឋាន Parc Olympique Lyonnais។

នៅពេលនោះលោក Paulo Fonseca បានសម្ដែងកាយវិការចំពោះការសម្រេចចិត្តរបស់អាជ្ញាកណ្ដាលជាខ្លាំងស្ទើរតែប៉ះមុខអាជ្ញាកណ្ដាល និងស្រែកខ្លាំងៗដាក់អាជ្ញាកណ្ដាល ក្នុងពេលនោះអាជ្ញាកណ្ដាលក៏បានផ្ដល់កាតក្រហមទៅកាន់ជនជាតិព័រទុយហ្កាល់ និងបណ្ដេញចេញពីការដឹកនាំក្រុមភ្លាមៗផងដែរ។ បន្ទាប់ពីការបណ្ដេញចេញពីទីលានក្នុងការប្រកួតហើយ សហព័ន្ធបាល់ទាត់បារាំងបានធ្វើការលើរឿងនេះបន្ត ដោយសារតែមើលទៅកាយវិការរបស់លោក Paulo Fonseca ហាក់មិនបានផ្ដល់ការគោរពទៅកាន់ក្រុមមន្ត្រីដឹកនាំការប្រកួត ពិសេសគឺអាជ្ញាកណ្ដាល។ លោក Paulo Fonseca ក៏បានធ្វើការសុំទោស ប៉ុន្តែនៅតែមិនអាចរួចផុតការចោទប្រកាន់។

ជាលទ្ធផល សហព័ន្ធបាល់ទាត់បារាំង បានសម្រេចពិន័យលោក Paulo Fonseca មិនអោយដឹកនាំការប្រកួតលើទីលាន រយៈពេល៩ខែ ពោលគឺរហូតដល់ថ្ងៃទី៣០ ខែវិច្ឆិកា។

ទោះយ៉ាងណា ប្រធានក្លិប Lyon លោក John Textor បានអះអាងថា នឹងបន្តគាំទ្រគ្រូបង្វឹករូបនេះតទៀត ជាពិសេសទៅលើការដាក់បណ្តឹងប្រឆាំងនឹងការពិន័យដ៏ធ្ងន់ធ្ងរ។

លោក John Textor បានសរសេរបណ្តាញសង្គម Instagram ថា “ រូបខ្ញុំនិងក្លិបនឹងឈរនៅខាងលោក Paulo Fonseca ជានិច្ច។ លោក Paulo Fonseca បានបង្កកំហុសនិងសុំទោសរួចហើយ ប៉ុន្តែ ការពិន័យនោះពិតជាធ្ងន់ធ្ងរ ហើយក្លិបនឹងចូលរួមក្នុងការតស៊ូជាមួយការប្រឆាំងការពិន័យនេះ។”

សម្រាប់ពិន័យលើ លោក Paulo Fonseca នោះ ក្រៅពីលោកមិនអាចជាន់លើទីលានបានហើយ សូម្បីតែបន្ទប់ផ្លាស់ប្ដូរសំលៀកបំពាក់ក៏ហាមមិនអនុញ្ញាតអោយចូលរហូតដល់ខែកញ្ញា ថែមទៀតផង៕

អត្ថបទទាក់ទង

ប្រធានក្លិប Lyon ថា នឹងបន្តគាំទ្រគ្រូបង្វឹក លោក Paulo Fonseca ក្រោយត្រូវពិន័យមិនអោយចូលទីលាន៩ខែ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស