ក្រោយបន្តឈ្នះ Bayer Leverkusen គ្រូ Bayern Munich ថា Harry Kane វ័យកាន់តែចាស់លេងកាន់តែល្អ

បាល់ទាត់
March 12th, 2025 (1 month)
520 Views
Share

លោក Vincent Kompany គ្រូបង្វឹក Bayern Munich បានបង្ហាញការពេញចិត្តយ៉ាងខ្លាំងទៅលើខ្សែប្រយុទ្ធ Harry Kane ក្រោយពីរូបគេបន្តស៊ុតបាល់បញ្ចូលទី ក្នុងជំនួបពានរង្វាន់ UEFA Champions League ជើងទី២ វគ្គ១៦ក្រុមចុងក្រោយយកឈ្នះលើក្រុមម្ចាស់ផ្ទះ Bayer Leverkusen ដោយលទ្ធផល ២-០។

គ្រូបង្វឹកសញ្ជាតិបែលហ្ស៊ីក និយាយថា Harry Kane កាន់តែមានវ័យច្រើន ប៉ុន្តែលេងបាល់បានកាន់តែល្អទៅៗ។ ជាការពិត កីឡាករអង់គ្លេស វ័យ ៣១ឆ្នាំ កំពុងឈរជាកីឡាកររកគ្រាប់បាល់ច្រើនជាងគេនៅក្របខណ្ឌ Bundesliga ដោយរកបាន២១គ្រាប់ទៅហើយ ប៉ុន្តែក្នុងការប្រកួត ពានរង្វាន់ UEFA Champions League រូបគេបន្តរកបានគ្រាប់បាល់ទៀត។ ជាក់ស្តែង កាលពីជើងទី១ Harry Kane រកបាន២គ្រាប់ក្នុងជំនួបឈ្នះ Bayer Leverkusen ៣-០ ហើយការប្រកួតជើងទី២ កាលពីយប់មិញ រូបគេរកបានគ្រាប់បាល់១គ្រាប់នៅនាទី៥២នៃវគ្គទី២ ក្រោយពីមិនមានគ្រាប់បាល់កើតឡើង ក្នុងវគ្គទី១នាកីឡដ្ឋាន Bay Arena។ គ្រាប់បាល់១គ្រាប់ទៀតរបស់ Bayern Munich កើតឡើងដោយ Alphonso Davies នៅនាទី៧១។

លោក Kompany បាននិយាយ ក្រោយបញ្ចប់ការប្រកួតដូច្នេះថា “Harry Kane កាន់តែមានគុណភាពនៅពេលអាយុកាន់តែច្រើន។ វាជួយនៅពេលដែលអ្នកមានកីឡាករកំពូលម្នាក់ដែលនៅតែចង់ប្រយុទ្ធដើម្បីក្រុម ហើយរត់ដូចកីឡាករវ័យក្មេង។ នៅពេលអ្នកមើលពីរបៀបដែលគេរៀបចំសម្រាប់ការប្រកួត ខ្ញុំពិតជាពេញចិត្ត។ វាមិនមែនជារឿងភ្ញាក់ផ្អើលទេដែលគេលេងបានល្អណាស់២ដងទល់នឹង Bayer Leverkusen ។ ខ្ញុំធ្លាប់បានលេងជាមួយ Harry Kane ក្នុងនាមជាគូប្រកួត ហើយខ្ញុំអាចនិយាយបានថាគេមានភាពប្រសើរឡើងក្នុងរយៈពេលជាច្រើនឆ្នាំ។”

សម្រាប់ការប្រកួតកាលពីជើងទី១ Bayern Munich បានឈ្នះ ៣-០ បូករួមជើងទី២នេះទៀត គឺពួកគេបានឈ្នះ Bayer Leverkusen សរុប ៥-០។ ដូច្នេះ Bayern Munich ជាក្រុមដែលត្រូវបន្តឡើងទៅកាន់វគ្គ៨ក្រុមចុងក្រោយ UEFA Champions League ដោយត្រូវជួបជាមួយ Inter Milan ដែលបានទម្លាក់ក្រុម Feyenoord៕

អត្ថបទទាក់ទង

ក្រោយបន្តឈ្នះ Bayer Leverkusen គ្រូ Bayern Munich ថា Harry Kane វ័យកាន់តែចាស់លេងកាន់តែល្អ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស