គ្រូ Inter Milan លាលែងពីតំណែងក្រោយមិនអាចជួយក្រុមឈ្នះជើងឯក UEFA Champions League

បាល់ទាត់
June 4th, 2025 (9 months)
576 Views
Share

លោក Simone Inzaghi បានសម្រេចសុំលាលែងពីតំណែង ជាគ្រូបង្វឹក Inter Milan ក្រោយពីបរាជ័យមិនអាចជួយក្រុមឈ្នះជើងឯក UEFA Champions League រួចមក។

ជាការពិត Inter Milan បានបរាជ័យក្រោមថ្វីជើងរបស់ Paris St-Germain ដោយលទ្ធផល ៥-០ នៅវគ្គផ្តាច់ព្រ័ត្រ ដែលធ្វើអោយពួកគេខកខានឱកាសទទួលបានជើងឯកពានរង្វាន់កំពូលអឺរ៉ុបរដូវកាល ២០២៤-២៥។ការលាលែងពីតំណែងរបស់ បុរសវ័យ៤៩ឆ្នាំ នេះដែរកើតឡើងតែ៣ថ្ងៃប៉ុណ្ណោះ បន្ទាប់ពី បញ្ចប់ការប្រកួត UEFA Champions League។

លោក Inzaghi និង Inter Milan បានបញ្ចប់រដូវកាលដោយការខកចិត្តមួយ បន្ទាប់ពីបានបញ្ចប់ក្នុងចំណាត់ថ្នាក់លេខ ២ ក្នុងក្របខណ្ឌ Serie A ដែលមាន១ពិន្ទុតាមពីក្រោយក្រុមជើងឯក Napoli ហើយត្រូវបានធ្លាក់ចេញពីការប្រកួតវគ្គពាក់កណ្តាលផ្តាច់ព្រ័ត្រ Coppa Italia ក្នុងលទ្ធផល ៤-១ ដោយគូប្រជែងរួមទីក្រុង AC Milan ថែមទៀត។

ជុំវិញការសុំលាលែងពីតំណែងនៅ Inter Milan លោក Inzaghi បាននិយាយនៅក្នុងសេចក្តីថ្លែងការណ៍មួយថា “ពេលវេលាបានមកដល់សម្រាប់ខ្ញុំក្នុងការនិយាយលាទៅកាន់ក្លិបនេះ បន្ទាប់ពីការធ្វើដំណើររយៈពេល ៤ ឆ្នាំ ហើយខ្ញុំរីករាយក្នុងអំឡុងពេលដែលខ្ញុំបានផ្តល់អោយអ្វីគ្រប់យ៉ាងសម្រាប់ក្លិប។”

អំឡុងការដឹកនាំរបស់លោក Inzaghi ក្លិប Inter Milan បានឈ្នះពានរង្វាន់សរុបចំនួន ៦ដង ដែលមាន Serie A ១ដង , Coppa Italia ២ដង និង Supercoppa Italia ចំនួន៣ដង។

បុរសជនជាតិអ៊ីតាលីរូបនេះ បានជួយ Inter Milan ឡើងដល់វគ្គផ្តាច់ព្រ័ត្រ UEFA Champions League ចំនួន២ដង តែរងបរាជ័យទាំង២ដង ដោយក្នុងឆ្នាំ ២០២២-២៣ ចាញ់ Manchester City ១-០ និង ក្នុងឆ្នាំ ២០២៤-២៥ ចាញ់ Paris St-Germain ដោយលទ្ធផល ៥-០ យ៉ាងធ្ងន់ធ្ងរ។

ការលាលែងពីតំណែងនេះ លោក Simone Inzaghi នឹងមិនបានជួយ Inter Milan ទៅកាន់ការប្រកួត FIFA Club World Cup 2025 ទេ ប៉ុន្តែសារពត៌មាននៅអ៊ីតាលីបានផ្សព្វផ្សាយថា លោក Simone Inzaghi នឹងទៅដឹកនាំក្លិប Al-Hilal នៅក្របខណ្ឌ Saudi Pro League ដែលជាក្លិបមានកៅអីទៅកាន់ FIFA Club World Cup ដែលធ្វើឡើងនៅសហរដ្ឋអាមេរិកនាពេលខាងមុខដែរ៕

អត្ថបទទាក់ទង

គ្រូ Inter Milan លាលែងពីតំណែងក្រោយមិនអាចជួយក្រុមឈ្នះជើងឯក UEFA Champions League

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស