ម្ចាស់ក្លឹប Spurs ចាក់បញ្ចូលលុយបន្ថែម 100លានផោន ដើម្បីជំរុញ “ភាពជោគជ័យរយៈពេលវែងរបស់កឹ្លប”

Premier League
October 10th, 2025 (5 months)
532 Views
Share

ម្ចាស់ភាគហ៊ុនភាគច្រើនរបស់ Spur ក្រុមហ៊ុន ENIC បានវិនិយោគទឹកប្រាក់បន្ថែម 100 លានផោន (133.87 លានដុល្លារ) ទៅក្នុងក្លឹប ដោយពួកគេមានបំណងជំរុញឱ្យមាន “ភាពជោគជ័យផ្នែកកីឡារយៈពេលវែង”។

ការបណ្ដាក់ទុនបន្ថែមនេះ កើតឡើងមួយខែ បន្ទាប់ពី មាន់ខ្នាយមាសទទួលបានសំណើទិញក្លឹប ហើយក៏បានបដិសេធរួចហើយដោយបញ្ជាក់ថា ក្លឹបដែលមានមូលដ្ឋាននៅភាគខាងជើងទីក្រុងឡុងដ៍មិនមែនសម្រាប់លក់ទេ។

ពាក្យចចាមអារ៉ាមអំពីទិញលក់ក្លឹបនេះ កាន់តែមានកម្ដៅឡើង ចាប់តាំងពីប្រធានប្រតិបត្តិ Daniel Levy បានលាលែងពីតំណែង បន្ទាប់ពីគាត់នៅជាមួយក្លឹបអស់រយ:ពេលជិត 25ឆ្នាំ ។

យ៉ាងណាមិញ Spurs បានបញ្ចាក់ឱ្យដឹងនៅក្នុងសេចក្តីថ្លែងការណ៍ថា “យើងមានសេចក្តីសោមនស្សរីករាយក្នុងការប្រកាសថា ម្ចាស់ភាគហ៊ុនភាគច្រើនរបស់យើង ត្រកូល Lewis បានតាមរយៈក្រុមហ៊ុន ENIC Sports & Development Holdings Ltd (“ENIC”) បានបន្ថែមដើមទុនថ្មីបន្ថែមចំនួន 100 លានផោនទៅក្នុងក្លឹប” ។

“ការបន្ថែមទឹកប្រាក់នេះ នឹងពង្រឹងផ្នែកហិរញ្ញវត្ថុរបស់ក្លឹប ហើយផ្តល់ធនធានបន្ថែមដល់ក្រុមថ្នាក់ដឹកនាំរបស់ក្លឹប ដើម្បីបន្តការយកចិត្តទុកដាក់លើការជំរុញភាពជោគជ័យផ្នែកកីឡារយៈពេលវែង។ ដើមទុនបន្ថែមនេះគឺជាផ្នែកមួយនៃការប្តេជ្ញាចិត្តបន្តរបស់គ្រួសារ Lewis ចំពោះក្លឹប និងអនាគតរបស់ក្លឹប។”

ការជំរុញផ្នែកហិរញ្ញវត្ថុកើតឡើង នៅពេលដែល Spurs ធ្វើបានល្អក្នុងការចាប់ផ្តើមរដូវកាលថ្មីក្រោមការដឹកនាំរបស់អ្នកចាត់ការថ្មី Thomas Frank ដែលត្រូវបានតែងតាំងកាលពីខែមិថុនា។ បច្ចុប្បន្ន ក្រុមកំពុងឈរនៅចំណាត់ថ្នាក់លេខ 3 ក្នុងតារាង Premier League ដោយតាមពីក្រោយក្រុមកំពូលតារាង Arsenal ចំនួន 2 ពិន្ទុ បន្ទាប់ពីការប្រកួតចំនួន 7ប្រកួត៕
ប្រភព៖ Reuters
Link: https://www.reuters.com/sports/soccer/spurs-owners-inject-100m-boost-long-term-sporting-success-2025-10-09/?utm_source=chatgpt.com

អត្ថបទទាក់ទង