Liverpool កក់កៅអីទៅវគ្គ១៦ក្រុមចុងក្រោយ UEFA Champions League បន្ទាប់ពីយកឈ្នះ Atletico Madrid

បាល់ទាត់
November 4th, 2021 (3 years)
1798 Views
Share

ក្រុម Liverpool បានធានាកៅអីទៅកាន់វគ្គ១៦ក្រុមចុងក្រោយនៃពានរង្វាន់ UEFA Champions League ហើយ បន្ទាប់ពីយកឈ្នះក្រុម Atletico Madrid ក្នុងការប្រកួតជុំទី៤ពូល B។

ការប្រកួតនាទីលាន Anfield បានដំណើរការ ១៣នាទី ខ្សែប្រយុទ្ធ Diogo Jota បានតែតបញ្ចូលទីគ្រាប់បើកឆាករបស់ Liverpool ដោយមានការលើកឱ្យយ៉ាងល្អរបស់ Trent Alexander-Arnold។ នាទី២១ Trent Alexander-Arnold ដដែលក៏បានបញ្ចូនបាល់ឱ្យខ្សែប្រយុទ្ធ Sadio Mane ដើម្បីស៊ុតបញ្ចូលទីបង្កើនការនាំមុខគ្រាប់ទី២ឱ្យក្រុមលោក Jurgen Klopp។ រីឯក្រុម Atletico Madrid ដែលកំពុងពិបាកវាយលុកក្រុមម្ចាស់ផ្ទះនោះ កាន់តែជួបបញ្ហាថែមទៀតពេលកីឡាករ Felipe ត្រូវពិន័យកាតក្រហម ព្រោះបង្កកំហុសលើ Sadio Mane ក្នុងនាទី៣៦ ដែលធ្វើឱ្យពួកគេសល់គ្នាតែ១០នាក់ប៉ុណ្ណោះ។ យ៉ាងណា វគ្គទី១បានបញ្ចប់ដោយលទ្ធផល Liverpool ២ Atletico Madrid ០។

ចូលមកដល់វគ្គទី២ ការប្រកួតនៅតែមានភាពតានតឹងដដែល ហើយនៅនាទី៤៨ Diogo Jota បានរកគ្រាប់បាល់បន្តទៀតឱ្យក្រុមហង្សក្រហមទៅហើយ ប៉ុន្តែ VAR មិនឱ្យដោយថាជាបាល់ Offside ។ រីឯក្រុមលោក Diego Simeone បានរកគ្រាប់បាល់ពីសំណាញ់ទីគូប្រជែងទៅហើយ ដោយកីឡាករខ្សែប្រយុទ្ធ Luis Suarez ស៊ុតនៅនាទី៥៧ ប៉ុន្តែក៏ត្រូវបាន VAR មិនឱ្យគ្រាប់បាល់ដូចគ្នាដោយថាជាបាល់ Offside ។ ដូចនេះលទ្ធផល Liverpool ២ Atletico Madrid ០ បានរក្សាដល់ចប់ការប្រកួតតែម្តង។

១គូទៀតក្នុងពូល B នេះដែរគឺ AC Milan ស្មើគ្នានឹង FC Porto ១-១។

ក្រោយឆ្លងកាត់៤ប្រកួតកន្លងមក Liverpool ឈ្នះទាំងអស់ ដែលធ្វើឱ្យពួកគេមាន ១២ពិន្ទុពេញ ច្រើនជាងក្រុមលេខ២ FC Porto ដល់ទៅ៧ពិន្ទុ ច្រើនជាងក្រុមលេខ៣ Atletico Madrid ដល់ទៅ៨ពិន្ទុ និងច្រើនជាងក្រុមបាតតារាង AC Milan ដល់ទៅ១១ពិន្ទុ។ ដូចនេះ Liverpool មានកៅអីទៅជុំបន្តរួចជាស្រេច ទោះសល់ការប្រកួត២លើកទៀតក្តី៕

អត្ថបទទាក់ទង

Liverpool កក់កៅអីទៅវគ្គ១៦ក្រុមចុងក្រោយ UEFA Champions League បន្ទាប់ពីយកឈ្នះ Atletico Madrid

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស