ប្រវត្តិខ្លីរបស់ក្រុមជម្រើសជាតិកាតា

FIFA World Cup
October 13th, 2022 (1 year)
1506 Views
Share

នៅថ្ងៃទី 20 ខែវិច្ឆិកា ក្រុមបាល់ទាត់បុរសរបស់កាតា នឹងបង្ហាញខ្លួនជាលើកដំបូងក្នុងព្រឹត្តិការណ៍ FIFA World Cup 2022 ក្នុងនាមជាម្ចាស់ផ្ទះ ដោយទទួលក្រុមអេក្វាឌ័រ នៅកីឡដ្ឋាន Al Bayt ដើម្បីប្រារព្ធពិធីបើកការប្រកួតបាល់ទាត់ពិភពលោក។

ពួកគេ កំពុងតែឡើងជើងក្នុងប៉ុន្មានឆ្នាំថ្មីៗនេះ។ នេះគឺជាឆ្នាំសំខាន់ៗរបស់ក្រុមបាល់ទាត់កាតា៖

ឆ្នាំ 1960 – សមាគមបាល់ទាត់កាតា (QFA) ត្រូវបានបង្កើតឡើង។ 3 ឆ្នាំក្រោយមក QFA ក្លាយជាសមាជិកផ្លូវការរបស់ FIFA ។

ឆ្នាំ 1970 – ក្រុមជម្រើសជាតិកាតា បានធ្វើការប្រកួតជាផ្លូវការលើកដំបូងរបស់ខ្លួន ជាមួយនឹងបារ៉ែនក្នុងការប្រកួត Gulf Cup ដែលបានចាញ់ 2-1 ។

ឆ្នាំ 1972 – QFA បើកដំណើរការលីគបាល់ទាត់កាតា។

ឆ្នាំ 1974 – កាតាឈ្នះការប្រកួតអន្តរជាតិជាលើកដំបូងរបស់ពួកគេ ដោយបានយកឈ្នះលើក្រុមអូម៉ង់ 4-0 នៅក្នុងការប្រកួតទីពីរក្នុងពូល ពានរង្វាន់ Gulf Cup ។ កាតាបញ្ចប់ក្នុងចំណាត់ថ្នាក់លេខ 3 ក្នុងព្រឹត្តិការណ៍ដែលមាន 6 ក្រុម។

ឆ្នាំ 1975 – កាតា ចូលរួមក្នុងវគ្គជម្រុះ Asian Cup ប៉ុន្តែបរាជ័យក្នុងការឡើងទៅជុំផ្ដាច់ព្រ័ត្រ។

ឆ្នាំ 1977 – កាតាបានផ្តួលបារ៉ែនក្នុងការប្រកួតជម្រុះ World Cup របស់ខ្លួនជាលើកដំបូង ប៉ុន្តែបានបញ្ចប់ក្នុងចំណាត់ថ្នាក់លេខ 3 ក្នុងពូល។

ឆ្នាំ 1980 – កាតា បង្ហាញខ្លួនជាលើកដំបូងនៅពានរង្វាន់ Asia Cup ក្រោមការគ្រប់គ្រងដោយអតីតខ្សែបម្រើស្លាបរបស់ Barcelona និងប្រេស៊ីល លោក Evaristo។

ឆ្នាំ 1984 – ក្រុមនេះ បានឈានដល់វគ្គផ្តាច់ព្រ័ត្រ Gulf Cup ជាលើកដំបូង ប៉ុន្តែចាញ់អ៊ីរ៉ាក់ 4-3 ដោយការស៊ុតបាល់ប៉េណាល់ទី។

ឆ្នាំ 1992 – កាតាមានសិទ្ធិសម្រាប់លេងនៅកីឡាអូឡាំពិករដូវក្តៅ ជាកន្លែងដែលពួកគេយកឈ្នះអេហ្ស៊ីប និង ស្មើជាមួយកូឡុំប៊ី ។ នៅឆ្នាំដដែលនេះ ក្រុមនេះ បានឈ្នះពានរង្វាន់ Gulf Cup ជាលើកទីមួយដែលមិនធ្លាប់មាន ដោយបានឈ្នះ 4 ប្រកួតក្នុងចំណោម 5 ប្រកួត។

ឆ្នាំ 1997 – កាតាបានឈានទៅដល់វគ្គជម្រុះចុងក្រោយសម្រាប់ការប្រកួតបាល់ទាត់ពិភពលោកឆ្នាំ 1998 ប៉ុន្តែមិនអាចឆ្លងផុតវគ្គជម្រុះចុងក្រោយ បន្ទាប់ពីចាញ់អារ៉ាប៊ីសាអូឌីត ក្នុងការប្រកួតចុងក្រោយ។ ជ័យជម្នះ នឹងធានាបានកៅអីមួយនៅ World Cup 1998 ដែលរៀបចំដោយម្ចាស់ផ្ទះបារាំង។

ឆ្នាំ 2004 – កាតាឈ្នះ Gulf Cup ជាលើកទីពីរ ដែលលើកនេះធ្វើជាម្ចាស់ផ្ទះ។

ឆ្នាំ 2006 – កាតាឈ្នះមេដាយមាស Asian Games ជាលើកទីមួយរបស់ពួកគេ ដោយយកឈ្នះអ៊ីរ៉ាក់នៅវគ្គផ្តាច់ព្រ័ត្រ។

ឆ្នាំ 2014 – ជាឆ្នាំដែលកាតាចាញ់តែម្ដងគត់ និងបានឈ្នះពានរង្វាន់របស់សហព័ន្ធបាល់ទាត់អាស៊ីខាងលិច និងជើងឯក Gulf Cup ។

ឆ្នាំ 2019 – កាតាឈ្នះពានរង្វាន់ Asian Cup ជាលើកដំបូង។ ក្នុងដំណើរឆ្ពោះទៅកាន់តំណែងជើងឯកនេះ កាតាបានយកឈ្នះកូរ៉េខាងត្បូងក្នុងវគ្គ 8 ក្រុមចុងក្រោយ និងជើងឯក 4 សម័យកាលជប៉ុន នៅវគ្គផ្តាច់ព្រ័ត្រ។ ពួក គេបានរបូតតែមួយ គ្រាប់ គត់ ក្នុង ការប្រកួតនៃព្រិត្តិការណ៍ ទាំង មូល។ នៅឆ្នាំដដែលនោះ កាតាត្រូវបានគេអញ្ជើញឱ្យទៅលេងនៅពានរង្វាន់ Copa America ។ ពួកគេបានស្មើ 2-2 ជាមួយប៉ារ៉ាហ្គាយ ប៉ុន្តែបានចាញ់ពីរប្រកួតបន្ទាប់ និងបញ្ចប់ក្នុងចំណាត់ថ្នាក់បាតតារាង។

ឆ្នាំ 2021 – ក្រុមនេះ ត្រូវបានអញ្ជើញឱ្យលេងនៅពានរង្វាន់ CONCACAF Gold Cup ដែលពួកគេឈានដល់វគ្គពាក់កណ្តាលផ្តាច់ព្រ័ត្រ មុនពេលចាញ់ម្ចាស់ផ្ទះអាមេរិក 1-0 ។

ស្វាគមន៍ព្រឹត្តិការណ៍បាល់ទាត់ពិភពលោក FIFA World Cup 2022, CBS ទទួលសិទ្ធិផ្ដាច់មុខ ផ្សាយបន្ដផ្ទាល់បាល់ទាត់ពិភពលោកនៅកម្ពុជា ឆាប់ៗខាងមុខនេះ៕

អត្ថបទទាក់ទង

ប្រវត្តិខ្លី​របស់​ក្រុមជម្រើសជាតិ​កាតា

ប្រវត្តិខ្លីរបស់ក្រុមជម្រើសជាតិកាតា