Chelsea ចុះហត្ថលេខាជាមួយខ្សែប្រយុទ្ធ Shakhtar Donetsk ក្នុងតម្លៃ89លានផោន

Premier League
January 16th, 2023 (2 years)
688 Views
Share

Chelsea បានបញ្ចប់ការចុះហត្ថលេខាជាមួយខ្សែប្រយុទ្ធអ៊ុយក្រែន Mykhailo Mudryk ពីក្លិប Shakhtar Donetsk ក្នុងកិច្ចព្រមព្រៀងដែលមានតម្លៃរហូតដល់ទៅ 89 លានផោន។

កីឡាករវ័យ 22 ឆ្នាំរូបនេះ បានយល់ព្រមលើកិច្ចព្រមព្រៀងរយៈពេល 8 ឆ្នាំកន្លះ ក្នុងតម្លៃ 70 លានអឺរ៉ូ (62 លានផោន) បូករួមទាំងប្រាក់បន្ថែមចំនួន 30 លានអឺរ៉ូ (27 លានផោន)។

Mudryk ស៊ុតបញ្ចូលទីបាន 7 គ្រាប់ក្នុងការបង្ហាញខ្លួន 12 ប្រកួតសម្រាប់ Shakhtar នៅរដូវកាលនេះ។ កីឡាករដែលបានបង្ហាញខ្លួនចំនួន 8 ដងសម្រាប់ក្រុមជម្រើសជាតិអ៊ុយក្រែនចាប់តាំងពីបង្ហាញខ្លួនជាលើកដំបូងក្នុងខែមិថុនា ឆ្នាំ 2022 បានបង្ហាញខ្លួននៅកីឡដ្ឋាន Stamford Bridge ដើម្បីមើលការប្រកួតក្របខណ្ឌ Premier League របស់ Chelsea ជាមួយនឹងក្រុម Crystal Palace កាលពីថ្ងៃអាទិត្យ។

Mudryk គឺជាកីឡាករចំណូលថ្មី ទី 5 របស់ Chelsea នៅក្នុងទីផ្សារដោះដូរកីឡាករនាខែមករានេះ បន្ទាប់ពីការមកដល់របស់ Joao Felix ក្នុងកិច្ចសន្យាខ្ចីជើងពី Atletico Madrid បូករួមទាំងកីឡាករចំណូលថ្មី Benoit Badiashile, David Datro Fofana និង Andrey Santos ផងដែរ។

គួរបញ្ជាក់ថា Chelsea បានចំណាយប្រាក់ជាង 400 លានផោនលើការផ្ទេរកីឡាករ ចាប់តាំងពីអ្នកជំនួញជនជាតិអាមេរិក Todd Boehly បានកាន់កាប់ក្លិបក្នុងខែឧសភា ឆ្នាំ 2022៕

អត្ថបទទាក់ទង