ព្យាករណ៍៖ អ៊ីតាលីប៉ះអង់គ្លេស វគ្គជម្រុះEuro2024 ផ្សាយបន្តផ្ទាល់ផ្ដាច់មុខនៅ CTN យប់នេះ

បាល់ទាត់
March 23rd, 2023 (1 year)
1909 Views
Share

ក្រោយការប្រកួតបាល់ទាត់ពិភពលោកបានបញ្ចប់កាលពីចុងខែធ្នូកន្លងទៅ ឥឡូវនេះដល់ពេលដែលការប្រកួតជម្រុះ Euro 2024 នឹងត្រូវចាប់ផ្ដើមវិញម្ដង ជាមួយនឹងការប្រកួតបើកឆាករវាងក្រុមម្ចាស់ផ្ទះ អ៊ីតាលី និងក្រុមភ្ញៀវ អង់គ្លេស ពូល C ដែលនឹងមានផ្សាយបន្តផ្ទាល់ផ្ដាច់មុខនៅលើកញ្ចក់ទូរទស្សន៍ CTN តែមួយគត់ ចាប់ពីម៉ោង២:៤៥នាទីរំលងអធ្រាត្រយប់នេះតទៅ។

នេះគឺជាការប្រកួតសងសឹក ដែលអង់គ្លេសបានចាញ់អ៊ីតាលី នៅក្នុងការប្រកួតវគ្គផ្តាច់ព្រ័ត្រ ពានរង្វាន់ Euro 2020 ដោយសារបាល់ប៉េណាល់ទីកាត់ក្ដី។ ចំណែកអ៊ីតាលី នឹងស្ដារមុខមាត់របស់ពួកគេឡើងវិញ បន្ទាប់ពីខកខាននៅក្នុងការបង្ហាញខ្លួននៅក្នុងព្រឹត្តិការណ៍ FIFA World Cup 2022 នៅប្រទេសកាតា។

សម្រាប់ក្រុមអ៊ីតាលី កីឡាករ Federico Chiesa និង Federico Dimarco ត្រូវបានដកចេញពីបញ្ជីឈ្មោះរបស់អ៊ីតាលី ធ្វើឱ្យមានបញ្ហាកង្វះជម្រើសនៃខ្សែប្រយុទ្ធសម្រាប់អ្នកចាត់ការ Roberto Mancini ។ Ciro Immobile និង Giacomo Raspadori ក៏នឹងអវត្តមានក្នុងតំបន់ប្រយុទ្ធរបស់ក្រុមAzzurri ផងដែរ ដូច្នេះវាជាឱកាសសម្រាប់ Gianluca Scamacca មកពីក្រុម West Ham ឬ Mateo Retegui មកពីក្រុម Atletico Tigre នៃលីគរបស់ប្រទេសអាហ្សង់ទីន។

ខ្សែប្រយុទ្ធ Marcus Rashford, ខ្សែបម្រើ Mason Mount និងអ្នកចាំទី Nick Pope បានដកខ្លួនពីក្រុមអង់គ្លេសរបស់លោក Gareth Southgate ដោយសាររបួស។ ខ្សែការពារកណ្តាល Harry Maguire នៅតែជាប់ជាជម្រើសរបស់អ្នកចាត់ការអង់គ្លេស ទោះបីជាមិនសូវបានលេងនៅក្រុម Manchester United ក៏ដោយ។

ប្រវត្តិជួបគ្នា៥លើកចុងក្រោយ អង់គ្លេសមិនស្គាល់ពាក្យថាឈ្នះអ៊ីតាលីឡើយ ពោលគឺ ចាញ់២ដង និងស្មើ៣ដង។ ប្រកួតចុងក្រោយចាញ់ ១–០ នៅក្នុងកម្មវិធី UEFA Nations League ។

នេះអាចជាជម្រើស១១នាក់ដំបូងរបស់អ៊ីតាលីដែលអាចប្រើប្រាស់ទម្រង់ ៤–៣–៣ ៖

Donnarumma; Di Lorenzo, Acerbi, Bonucci, Spinazzola; Barella, Verratti, Jorginho; Berardi, Retegui, Grifo

នេះអាចជាជម្រើស១១នាក់ដំបូងរបស់អង់គ្លេសដែលអាចប្រើប្រាស់ទម្រង់ ៣–៤–៣ ៖

Pickford; Walker, Stones, Maguire; James; Rice, Bellingham, Shaw; Saka, Kane, Grealish

CBS Sports ទស្សន៍ទាយថាលទ្ធផលរវាងក្រុមទាំងពីរគឺ៖ អ៊ីតាលី ២–១ អង់គ្លេស៕

អត្ថបទទាក់ទង

ព្យាករណ៍៖ អ៊ីតាលីប៉ះអង់គ្លេស វគ្គជម្រុះEuro2024 ផ្សាយបន្តផ្ទាល់ផ្ដាច់មុខនៅ CTN យប់នេះ

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស