ខ្សែប្រយុទ្ធ Mason Greenwood ចង់ចាកចេញពី Man UTD

Premier League
April 19th, 2023 (2 years)
721 Views
Share

ខ្សែប្រយុទ្ធ Mason Greenwood បានបង្ហាញពីបំណងចង់ចាកចេញពីក្លិប Manchester United ចំពេលដែលក្លិបអ៊ីតាលី AC Milan បង្កើនការចាប់អារម្មណ៍ទៅលើរូបគេ។

Greenwood អវត្តមានមិនបានជួយ Man UTD តាំងពីខែមករា ឆ្នាំ២០២២ ក្រោយមានបញ្ហាផ្លូវច្បាប់មួយចំនួនជាមួយអតីតមិត្តស្រីពាក់ព័ន្ធទៅនឹងអំពើហិង្សា និង ការរំលោភបំពាន។

យ៉ាងណាមិញ រាល់បទចោទប្រកាន់ទាំងអស់ ត្រូវបានតុលាការសម្រេចទម្លាក់ចោល កាលពីខែកុម្ភៈកន្លងទៅ។ ប៉ុន្តែ បើទោះបីជារួចផុតពីការចោទប្រកាន់ក៏ដោយ ប៉ុន្តែកីឡាករអង់គ្លេសនៅតែមិនទាន់បានចូលលេងអោយក្លិបបិសាចក្រហមនៅឡើយទេ។

បន្ថែមពីនេះក៏មានការអះអាងថា ការវិលត្រឡប់មកវិញរបស់ Mason Greenwood មិនត្រូវបានស្វាគមន៍ដោយសមាជិកក្លិបជាច្រើនរូប ហើយរូបគេក៏មិនស្ថិតក្នុងគម្រោងរបស់គ្រូបង្វឹកលោក Erik ten Hag ផងដែរ។

ដូច្នេះហើយ Mason Greenwood បានបង្ហាញពីបំណងស្វែងរកទ្រនំថ្មី ដើម្បីស្វែងរកឱកាសលេង ហើយរូបគេក៏ទទួលបានការចាប់អារម្មណ៍ពី ក្លិប AC Milan ដោយចង់បានរូបគេទៅចូលរួមនាពេលទីផ្សារដោះដូរកីឡាករខាងមុខ ដើម្បីទុកជំនួស Rafael Leao ដែលកំពុងមានអនាគតមិនច្បាស់លាស់ជាមួយក្លិប។

សូមបញ្ជាក់ថា Mason Greenwood ជាកីឡាករយុវជនបណ្ដុះបណ្ដាលដោយថ្នាល Manchester United ហើយបានបង្ហាញខ្លួនលេងឱ្យឈុតធំតាំងពីឆ្នាំ ២០១៨។ គិតមកទល់ពេលនេះ រូបគេបានលេងក្នុងការប្រកួតបានចំនួន ៨៣ លើក ហើយស៊ុតចូល ២២ គ្រាប់៕

អត្ថបទទាក់ទង