គ្រូ Arsenal ថា រឿងដំបូងដែលគាត់ត្រូវធ្វើគឺលើកទឹកចិត្តកីឡាករក្រោយពីចាញ់ Man City

Premier League
April 27th, 2023 (2 years)
793 Views
Share

លោក Mikel Arteta គ្រូបង្វឹក Arsenal បាននិយាយថា រឿងដំបូងដែលលោកត្រូវធ្វើនៅពេលនេះ គឺការលើកទឹកចិត្តកីឡាកររបស់ខ្លួន បន្ទាប់ពីពួកគេបានចាញ់ក្រុម Man City រួចមក។

ជាការពិត Arsenal ទើបតែបានចាញ់ក្រុម Man City ដោយលទ្ធផល ៤-១ ក្នុងជំនួបក្របខណ្ឌ Premier League សប្តាហ៍ទី៣៣ ដែលធ្វើឡើងនាទីលាន Etihad កាលពីយប់មិញ។

ការប្រកួតនោះគឺ Arsenal ត្រូវបាន Man City នាំមុខ២គ្រាប់មុនក្នុងវគ្គទី១ ដោយគ្រាប់បាល់របស់ Kevin De Bruyne នៅនាទី ៧ និង John Stones នៅនាទី៤៥+១។

នៅវគ្គទី២ Arsenal បន្តរបូតគ្រាប់បាល់ទៅ Man City ទៀត ដោយ Kevin De Bruyne ស៊ុតនៅនាទី៥៤ ប៉ុន្តែនាទី៨៦ Rob Holding បានតាម១គ្រាប់អោយ Arsenal មកវិញ។ យ៉ាងណាក៏ដោយ គ្រាប់ទី៤របស់ Man City និងជាគ្រាប់បាល់ចុងក្រោយក្នុងការប្រកួត បានកើតឡើង ដោយ Erling Haaland នៅនាទី៩០+៥។

សម្រាប់ការបរាជ័យនេះ ធ្វើឱ្យ Arsenal កាន់តែមានភាពតានតឹងក្នុងការប្រជែងយកជើងឯក Premier League រដូវកាល ២០២២-២៣។ យ៉ាងណាក៏ដោយ លោក Mikel Arteta អះអាងថា ការប្រជែងជើងឯកជារឿងសំខាន់ ប៉ុន្តែរឿងដ៏សំខាន់មួយទៀតនោះគឺការលើកទឹកចិត្តកីឡាកររបស់លោកក្រោយការប្រកួតដ៏ខកចិត្តនេះ។

គ្រូបង្វឹកជនជាតិអេស្ប៉ាញបានថ្លែងបែបនេះថា៖ “វាជារឿងដ៏ខកចិត្ត តែប្រាកដណាស់អ្វីដែលយើងត្រូវធ្វើដំបូងបន្ទាប់ពីនេះ គឺការលើកទឹកចិត្តកីឡាករ ព្រោះពួកគេបានរងភាពឈឺចាប់ណាស់នៅពេលនេះ។ យើងនឹងធ្វើអ្វីគ្រប់យ៉ាងដែលយើងបានធ្វើកន្លងមកអោយបានល្អក្នុងការប្រកួតបន្ទាប់ដើម្បីឈ្នះមកវិញ។ នោះហើយជាអ្វីដែលយើងត្រូវចាប់ផ្តើមពីឥឡូវនេះ។”

គិតត្រឹមពេលនេះ Arsenal នៅបន្តឈរកំពូលតារាងដដែលមាន ៧៥ពិន្ទុ ខណៈ Man City គឺជ័យជម្នះនេះ បានធ្វើឱ្យពួកគេបន្ថយគម្លាតពិន្ទុពី Arsenal ដោយមាន៧៣ពិន្ទុ ប៉ុន្តែក្រុមមេឃខៀវ នៅសល់ដល់ទៅ២ប្រកួតទៀតនៅក្នុងដៃ៕

អត្ថបទទាក់ទង