ក្រសួងទេសចរណ៍ណែនាំឱ្យអាជីវករលក់ Street food ពង្រឹងគុណភាពសម្រាប់ព្រឹត្តិការណ៍អាស៊ានប៉ារ៉ាហ្គេម

ASEAN Para Games
June 1st, 2023 (1 year)
481 Views
Share

បន្ទាប់ពីបញ្ចប់ព្រឹត្តិការណ៍ស៊ីហ្គេមលើកទី៣២ ក្រសួងទេសចរណ៍បានបន្តផ្សព្វផ្សាយ និងណែនាំបណ្ដុះបណ្ដាលដល់អាជីវកម្មលក់ម្ហូបអាហារតាមដងផ្លូវ (Street Food Vendor) សម្រាប់ព្រឹត្តិការណ៍អាស៊ានប៉ារ៉ាហ្គេមលើកទី១២ និងយុទ្ធនាការ”ឆ្នាំទស្សនាកម្ពុជា២០២៣” ដោយមានការចូលរួមពីរដ្ឋបាលរាជធានី-ខេត្ត មន្ទីរទេសចរណ៍ អង្គភាពពាក់ព័ន្ធ ប្រតិបត្តិករទេសចរណ៍ និងអ្នកលក់ដូរតាមដងផ្លូវ។

ក្នុងឱកាសចុះផ្សព្វផ្សាយ និងបណ្ដុះបណ្ដាល ក្រសួងទេសចរណ៍បានស្នើដល់ប្រតិបត្តិករទេសចរណ៍ និងអ្នកលក់ដូរតាមដងផ្លូវ ដូចជា៖

រៀបចំសោភ័ណភាពអាជីវកម្មរបស់ខ្លួន ដោយឆ្លុះបង្ហាញពីលក្ខណៈវប្បធម៌ ទំនៀមទម្លាប់ប្រពៃណីជាតិខ្មែរ។

ចូលរួមរក្សានូវសណ្តាប់ធ្នាប់យកចិត្តទុកដាក់ខ្ពស់លើអនាម័យម្ហូបអាហារដែលដាក់លក់ដូរជាប្រចាំ ក៏ដូចជាសម្រាប់ព្រឹត្តិការណ៍អាស៊ានប៉ារ៉ាហ្គេមលើកទី១២ ឆ្នាំ២០២៣នេះ។

មានដាក់តាំងបញ្ជីរាយនាមសេវាកម្មជា៣ភាសា រួមមាន ភាសាខ្មែរ ភាសាអង់គ្លេស និងភាសាទីបីណាមួយ និងស្របតាមខ្លឹមសារប្រកាសលេខ ០៥២ ប្រក. ចុះថ្ងៃទី២៣ ខែមីនា ឆ្នាំ២០១៧ របស់ក្រសួងទេសចរណ៍។

ម្ចាស់ ឬអ្នកគ្រប់គ្រងអាជីវកម្មទេសចរណ៍ មិនត្រូវដំឡើងថ្លៃសេវាកម្មរបស់ខ្លួន ឬដោយពុំមានហេតុផលច្បាស់លាស់។
និងចូលរួមអនុវត្តតាមសារាចរណែនាំលេខ ០០៥ ស្ដីពីការពង្រឹងគុណសេវាកម្មទេសចរណ៍ បដិសណ្ឋារកិច្ចល្អ ដើម្បីអបអរការរៀបចំព្រឹត្តិការណ៍អាស៊ានប៉ារ៉ាហ្គេមលើកទី១២ នៅកម្ពុជា។

បន្ថែមពីនេះ ក្រសួងទេសចរណ៍បានចែកជូនអាវក្រណាត់សម្រាប់ពាក់ការពារ និងរក្សាអនាម័យពេលចម្អិនម្ហូបដល់អ្នកលក់ដូរតាមដងផ្លូវ ដែលបានចូលរួមវគ្គបណ្តុះបណ្តាល និងជូនទៅមន្ទីរទេសចរណ៍សម្រាប់ចែកជូនបន្ដចំនួន២៥០អាវក្នុងមួយគោលដៅ៕

អត្ថបទទាក់ទង