Arsenal ទទួលជោគជ័យក្នុងការនាំយកខ្សែប្រយុទ្ធ Kai Havertz ពី Chelsea

Premier League
June 29th, 2023 (1 year)
389 Views
Share

ក្លិប Arsenal បានទទួលជោគជ័យក្នុងការចុះហត្ថលេខាលើខ្សែប្រយុទ្ធ Kai Havertz ពីក្លិប Chelsea ក្នុងកិច្ចសន្យារយៈពេលវែង។

តម្លៃនៃការផ្ទេរនេះមិនត្រូវបានបង្ហាញឱ្យដឹងនោះទេ ប៉ុន្តែប្រព័ន្ធផ្សព្វផ្សាយអង់គ្លេសបានរាយការណ៍ថា Arsenal នឹងចំណាយឱ្យ Chelsea ប្រមាណ ៦៥ លានផោន ជាមួយនឹងការបន្ថែមចំនួន ៥ លានផោនបន្ថែមទៀតលើការចំណាយផ្សេងៗ។

ជុំវិញឱកាសផ្ទេរទៅកាន់ Arsenal នេះកីឡាករអាល្លឺម៉ង់វ័យ ២៤ឆ្នាំ បានប្រាប់គេហទំព័ររបស់ក្លិបថា៖ “វាពិតជារំភើបណាស់សម្រាប់ខ្ញុំក្នុងការចូលរួមជាមួយក្លិបដ៏អស្ចារ្យនេះ និងជាផ្នែកមួយនៃ Arsenal ។”

Havertz នឹងក្លាយជាកីឡាករថ្លៃបំផុតទីពីររបស់ Arsenal បន្ទាប់ពីពួកគេបានបង់ថ្លៃកំណត់ត្រាក្លិបប្រហែល ៧២ លានផោនសម្រាប់ខ្សែប្រយុទ្ធសញ្ជាតិកូតឌីវ័រ Nicolas Pepe ក្នុងឆ្នាំ ២០១៩។

Havertz ត្រូវបាន Chelsea ចុះហត្ថលេខាលើកិច្ចសន្យារយៈពេល ៥ ឆ្នាំក្នុងឆ្នាំ ២០២០ ក្នុងតម្លៃប្រហែល ៧១ លានផោន បន្ទាប់ពីរដូវកាលដ៏ជោគជ័យ ជាមួយ Bayer Leverkusen។

នៅ Chelsea នេះ Kai Havertz បានរួមចំណែកឈ្នះពានរង្វាន់ Champions League ក្នុងរដូវកាលដំបូងរបស់ខ្លួន ដោយស៊ុតបញ្ចូលទីនៅវគ្គផ្តាច់ព្រ័ត្រឆ្នាំ ២០២១ ទល់នឹង Man City ។

Havertz ក៏បានស៊ុតបញ្ចូលទី១៤ គ្រាប់ក្នុងយុទ្ធនាការ ២០២១-២២ ប៉ុន្តែគេបានស៊ុតបញ្ចូលទីបានត្រឹមតែ ៩ ដងប៉ុណ្ណោះកាលពីរដូវកាលមុន ខណៈដែល Chelsea ព្យាយាមរកគ្រាប់បាល់ក្រោមការដឹកនាំរបស់គ្រូបង្វឹក៣រូបផ្សេងគ្នា ហើយបានបញ្ចប់ក្នុងចំណាត់ថ្នាក់ទី១២ក្នុងតារាង។

Chelseaក៏កំពុងសម្លឹងមើលការលក់កីឡាករចេញជាច្រើនរូបទៀតបន្ទាប់ពីចំណាយប្រាក់ជាង ៦០០ លានអឺរ៉ូ លើការចុះហត្ថលេខាកីឡាករថ្មីចាប់តាំងពី ក្លិបត្រូវបានទិញ ដោយក្រុមវិនិយោគដែលដឹកនាំដោយអ្នកជំនួញជនជាតិអាមេរិក Todd Boehly និង Clearlake Capital កាលពីឆ្នាំមុន ៕

អត្ថបទទាក់ទង