David Moyes ថាបញ្ហាផ្ទេររបស់ Declan Rice បង្អាក់ការរៀបចំផែនការរបស់West Ham

Premier League
July 14th, 2023 (2 months)
371 Views
Share

លោក David Moyes អ្នកចាត់ការទូទៅរបស់ក្រុម West Ham United ត្រូវបានសួរអំពីកិច្ចព្រមព្រៀង Declan Rice ផ្ទេរទៅ Arsenal ក្នុងសន្និសីទសារព័ត៌មាននៅទីក្រុង Perth ប្រទេសអូស្ត្រាលី នៅថ្ងៃទី១៤ ខែកក្កដានេះ ដោយអ្នកចាត់ការរូបនេះ មិនអាចប្រាប់អ្វីបានឡើយ ប៉ុន្តែបញ្ហានេះធ្វើឱ្យគាត់មិនអាចរៀបចំផែនការសម្រាប់ក្រុម។

ក្រុមកាំភ្លើងធំ Arsenal ត្រូវបានរាយការណ៍ថាបានយល់ព្រមលើកិច្ចព្រមព្រៀងរបស់ Rice ហើយ។ ទោះជាយ៉ាងណា មកទល់ពេលនេះវាមិនទាន់មានការប្រកាសជាផ្លូវការណាមួយនោះទេ។

អ្នកគាំទ្រទាំង Arsenal និង West Ham កំពុងអន្ទះសារង់ចាំការប្រកាសជាផ្លូវការ ស្របពេលដែលលោក Moyes បាននិយាយថាគាត់ដូចជាអ្នកគាំទ្រជាច្រើនដែរ គឺគ្រាន់តែតាមដានព័ត៌មានដើម្បីមើលថាតើវានឹងទៅរួចឬអត់។

គាត់បានប្រាប់ក្នុងសន្និសីទសារព័ត៌មាននៅទីក្រុង Perth ថា៖ “ខ្ញុំទើបតែបានស្តាប់ Sky ហើយខ្ញុំបានយកព័ត៌មានពី Sky ។ ខ្ញុំមិនបានដឹងរឿងនេះទេ។ អ្នក (អ្នកសារព័ត៌មាន) គួរតែដឹងអំពីវាច្រើនជាងខ្ញុំ ហើយទទួលបានព័ត៌មានលឿនជាងខ្ញុំ។ ដូច្នេះ ខ្ញុំរីករាយនឹងស្តាប់នូវអ្វីដែលអ្នកនិយាយ។”

លោកបន្តថា៖ “បើវាមិនទាន់រួចរាល់ យើងមិនអាចរៀបចំផែនការអ្វីបានទេ។ យើងនឹងរង់ចាំមើលថានឹងមានអ្វីកើតឡើង។ គ្រប់គ្នាដឹងពីស្ថានភាពនេះ យើងរំពឹងថានឹងមានអ្វីមួយកើតឡើង។ ខ្ញុំឮអ្នកនិយាយថាវាទទួលជោគជ័យតាំងពី២សប្តាហ៍មុនម្ល៉េះ ប៉ុន្តែឥឡូវនៅតែគ្មានអ្វីជាផ្លែផ្កាទាល់តែសោះ”។

Arsenal នឹងធ្វើដំណើរទៅកាន់ទីក្រុងវ៉ាស៊ីនតោននៅថ្ងៃអាទិត្យ សម្រាប់ការចាប់ផ្តើមដំណើរទស្សនកិច្ចនៅសហរដ្ឋអាមេរិក ដែលពួកគេនឹងមានការប្រកួតចំនួន៣ នៅទីនោះ ហើយការប្រកាសពីការមកដល់របស់ Rice ត្រូវបានរំពឹងថានឹងកើតឡើងមុនដំណើរទស្សនកិច្ចនេះ៕

អត្ថបទទាក់ទង