Mohamed Salah ត្រូវបានក្លិបអារ៉ាប៊ីសាអ៊ូឌីតដាក់សំណើទៅកាន់ Liverpool

Premier League
August 7th, 2023 (1 year)
463 Views
Share

Liverpool ត្រៀមនឹងទទួលបានការដេញថ្លៃ ៦០លានផោនពីក្រុម Al-Ittihad សម្រាប់ Mohamed Salah ។ នេះបើយោងតាមរបាយការណ៍ក្នុងប្រទេសអារ៉ាប៊ីសាអ៊ូឌីត។

Al-Ittihad ដែលបានបញ្ចប់ក្នុងនាមជាជើងឯកនៃ Saudi Pro League កាលពីរដូវកាលមុន បានចុះហត្ថលេខាជាមួយ Karim Benzema, N’Golo Kante និង Jota រួចមកហើយ។ Liverpool បានបាត់បង់កីឡាករ Jordan Henderson ទៅកាន់ក្លិប Al-Ettifaq រួចហើយ ខណៈដែល Fabinho បានបញ្ចប់ការផ្លាស់ទៅកាន់ក្លិប Al-Ittihad នៅអារ៉ាប៊ីសាអ៊ូឌីត កាលពីសប្តាហ៍មុន។

យោងតាមទូរទស្សន៍អារ៉ាប៊ីសាអ៊ូឌីត Al-Riyadiah បានឱ្យដឹងថាក្រុម Al-Ittihad កំពុងពិភាក្សាជាមួយអ្នកតំណាងរបស់ Salah ដើម្បីពិភាក្សាអំពីការផ្ទេរដ៏មានសក្តានុពលមួយ មុនពេលចុងបញ្ចប់នៃទីផ្សារដោះដូរកីឡាករដើមរដូវកាលថ្មីនេះ។

ក្លិបអារ៉ាប៊ីសាអ៊ូឌីតនឹងផ្ដល់កុងត្រាសម្រាប់ Salah ដែលអាចឱ្យកីឡាករបាល់ទាត់អេហ្ស៊ីបរកបាន ១៥៥ លានផោន ក្នុងរយៈពេលពីររដូវកាល ហើយនឹងដាក់សំណើដេញថ្លៃ ៦០ លានផោនទៅ Liverpool ។

ប្រភពជិតស្និទ្ធនឹងកីឡាករបានប្រាប់ Al-Riyadiah ថា៖ “វាជាការពិត។ មានការចរចាររវាង Mohamed Salah និងក្លិបអារ៉ាប៊ីសាអ៊ូឌីត Al-Ittihad ។ សំណើនេះគួរឱ្យចាប់អារម្មណ៍សម្រាប់តារាបាល់ទាត់អេហ្ស៊ីបដើម្បីមកលេងនៅអារ៉ាប៊ីសាអ៊ូឌីត។ Salah នៅតែល្អនៅក្នុងប្រទេសអង់គ្លេស។”

Salah បានចុះហត្ថលេខាលើកិច្ចសន្យារយៈពេល ៣ ឆ្នាំកាលពីខែកក្កដាឆ្នាំមុន ដែលឱ្យគាត់ទទួលបាន ៣៥ម៉ឺនផោនក្នុងមួយសប្តាហ៍ពី Liverpool ។ កីឡាករវ័យ ៣១ ឆ្នាំរូបនេះស៊ុតបញ្ចូលទីបាន ៣០ គ្រាប់ក្នុងការបង្ហាញខ្លួន ៥១ លើកសម្រាប់ក្រុម Liverpool កាលពីរដូវកាលមុន៕

អត្ថបទទាក់ទង