ភ្នាក់ងារខ្សែប្រយុទ្ធ Mohamed Salah បដិសេធការផ្លាស់ចេញពី Liverpool

Premier League
August 9th, 2023 (1 year)
418 Views
Share

ទីភ្នាក់ងារផ្ទាល់របស់ខ្សែប្រយុទ្ធ Mohamed Salah លោក Ramy Abbas Issa បានច្រានចោលពាក្យចចាមអារ៉ាមដែលថា កីឡាករអេស្ស៊ីប នឹងផ្លាស់ចេញពី Liverpool ទៅកាន់ទឹកដីប្រទេសអារ៉ាប៊ីសាអ៊ូឌីត។ ភ្នាក់ងាររូបនេះ អះអាងថាកីឡាករវ័យ ៣១ឆ្នាំ នៅតែបន្តស្នាក់នៅជាមួយនឹងក្លិបរហស្សនាមហង្សក្រហម។

បើតាមរយៈការចុះផ្សាយរបស់កាសែតមួយចំនួននៅអារ៉ាប៊ីសាអ៊ូឌីត បានបញ្ជាក់ថា មានការជជែងរវាងកីឡាករសញ្ជាតិអេហ្ស៊ីប និងក្លិប Al-Ittihad ជុំវិញការផ្ទេរដែលមានតម្លៃប្រមាណ ១៥៥លានផោន លើកិច្ចសន្យារយៈពេល ២ឆ្នាំ។

កាលពីពេលថ្មីៗនេះអតីតមិត្តរួមក្រុមរបស់ Salah កីឡាករសញ្ជាតិប្រេស៊ីល Fabinho បានសម្រេចចិត្តផ្លាស់ទៅកាន់ប្រទេសអារ៉ាប៊ីសាអ៊ូឌីតដោយចូលរួមជាមួយនឹងក្រុម Al-Ittihad នេះដែរ ក្នុងតម្លៃនៃការផ្ទេរ ៤០លានផោន។

ក្រោយមានការលេចឮព័ត៌មានខាងលើនេះ លោក Ramy Abbas បានបង្ហោះនៅលើបណ្តាញសង្គមដោយបដិសេធថា Salah គ្មានគម្រោងចាកចេញពី Liverpool នៅពេលនេះឡើយ។

លោក Abbas បានបញ្ជាក់ថា៖ “ប្រសិនយើងជ្រើសរើសចាកចេញពី Liverpool នៅឆ្នាំនេះ យើងនឹងមិនបន្តកិច្ចសន្យានៅរដូវកាលមុនមកឡើយ។ Salah នៅតែបន្តស្នាក់នៅជាមួយក្រុមនៅ Premier League ដដែល។ គេបានបន្តកិច្ចសន្យាដល់បញ្ចប់រដូវកាល ២០២៤-២៥។”

Salah បង្ហាញខ្លួនលេងបាន ២៣១ប្រកួត រកបានគ្រាប់បាល់ចំនួន ១៣៩គ្រាប់សម្រាប់ Liverpool។ ទោះយ៉ាងណាទីភ្នាក់ងាររបស់ Salah បានចេញមុខអះអាងដោយបាននិយាយថាអតីតខ្សែប្រយុទ្ធក្រុម Chelsea និង Roma គ្មានបំណងចាកចេញពីទឹកដី Anfield ឡើយទោះក្នុងលក្ខខណ្ឌអ្វីក៏ដោយ៕

អត្ថបទទាក់ទង