គ្រូ Man Utd សប្បាយចិត្តទោះឈ្នះ Wolves យ៉ាងលំបាក

Premier League
August 15th, 2023 (2 years)
857 Views
Share

លោក Erik ten Hag រីករាយដែលក្រុម Manchester United របស់គាត់ បានរកវិធីដើម្បីផ្តួល Wolverhampton Wanderers ទោះបីជាពួកគេធ្វើមិនបានល្អកាលពីយប់មិញក៏ដោយ។

គ្រាប់បាល់តែតបញ្ចូលទីនៅនាទីទី៧៦របស់ខ្សែការពារ Raphael Varane គឺគ្រប់គ្រាន់សម្រាប់ Man Utd ដើម្បីចាប់ផ្តើមរដូវកាលរបស់ពួកគេជាមួយនឹងជ័យជម្នះ ១-០ ខណៈដែល Wolves បានបាត់បង់ឱកាសដ៏ល្អជាច្រើនក្នុងការរកគ្រាប់បាល់។

ការព្យាយាមស៊ុតចំនួន ២៣ លើករបស់ Wolves ជាកំណត់ត្រាដែលមិនធ្លាប់មានឡើយនៅកីឡដ្ឋាន Old Trafford ក្នុងក្របខណ្ឌ Premier League ចាប់តាំងពីរដូវកាល២០០៣-០៤ ខណៈការស៊ុតចំគោលដៅចំនួន ៦ លើករបស់ពួកគេដែលមិនបានសម្រេច ក៏មិនធ្លាប់មាននៅក្នុងដីរបស់ Man Utd ក្នុងរយៈពេល ៤ ឆ្នាំផងដែរ។

Ten Hag បានប្រាប់គេហទំព័រផ្លូវការរបស់ក្លិបថា៖ “ពួកគេក៏សម្រុកយើងខ្លាំងដូចគ្នា ប៉ុន្តែទីបំផុត ពួកយើងនៅតែអាចរកវិធីដើម្បីឈ្នះការប្រកួតនេះ”។

“នោះគឺជាអ្វីដែលយើងបានធ្វើ ហើយបន្ទាប់មកយើងបានឃើញស្មារតីរបស់ក្រុម និងឆន្ទៈក្នុងការឈ្នះ។ ពួកយើងសប្បាយចិត្ត។ ពួកយើងដឹងថាយើងត្រូវតែតស៊ូដើម្បីពិន្ទុរបស់យើង។ វាមិនមែនជាការប្រកួតដ៏ល្អឥតខ្ចោះរបស់ពួកយើងទេ ប៉ុន្តែពួកយើងត្រូវតែប្រយុទ្ធ។ យើងត្រូវតែរកវិធីដើម្បីឈ្នះ ហើយនោះជាអ្វីដែលយើងធ្វើបាន”។

សូមជម្រាបថា Man Utd គឺជាក្រុមកំពូលទាំង៤កាលពីរដូវកាលមុន ដែលស៊ុតបញ្ចូលទីត្រឹមតែ១គ្រាប់ នៅក្នុងការប្រកួតបើករដូវកាល២០២៣-២៤នេះ ខណៈក្រុម៣ទៀតសុទ្ធតែរកបានលើសពី១គ្រាប់ក្នុងជ័យជម្នះរបស់ពួកគេ ដោយ Newcastle ឈ្នះ Aston Villa ដោយលទ្ធផល ៥-១, Man City ឈ្នះម្ចាស់ផ្ទះ Burnley ៣-០ និង Arsenal ស៊ុតបាន២គ្រាប់ក្នុងជ័យជម្នះ ២-១ លើ Nottingham Forest ៕

អត្ថបទទាក់ទង