កាតក្រហមលើ Mac Allister ត្រូវបានលុបចោលក្រោយការតវ៉ា

Premier League
August 23rd, 2023 (2 years)
796 Views
Share

កាតក្រហមលើខ្សែបម្រើ Alexis Mac Allister របស់ Liverpool ក្នុងការប្រកួតទល់នឹង Bournemouth ត្រូវបានសមាគមបាល់ទាត់អង់គ្លេស សម្រេចលុបចោលវិញ បន្ទាប់ពីការប្តឹងឧទ្ធរណ៍របស់ Liverpool ទទួលបានជោគជ័យ។

Mac Allister ត្រូវបានអាជ្ញាកណ្តាល Thomas Bramall ផ្តល់ក្រហម សម្រាប់ការប្រជែងលើ Ryan Christie អំឡុងពេល Liverpool ទទួលជ័យជម្នះ ៣-១ លើ Bournemouth នៅកីឡដ្ឋាន Anfield ។

ដំបូងឡើយ Allister ត្រូវព្យួរ ៣ ប្រកួតបន្ទាប់ ដែលប្រកួតទល់នឹង Newcastle, Aston Villa និង Wolves ប៉ុន្តែពេលនេះ គេនឹងមិនជាប់បម្រាមទៀតទេ។

ក្រោយការប្រកួតខាងលើ លោក Jurgen Klopp អ្នកចាត់ការទូទៅរបស់ក្រុម Liverpool បានបង្ហាញការមិនយល់ស្រមលើការសម្រេចចិត្តរបស់អាជ្ញាកណ្ដាលមកលើកូនក្រុមរបស់គាត់ឡើយ។

គាត់បាននិយាយថា៖ “ពួកយើងត្រូវតែពិចារណាលើបញ្ហានេះ ហើយគ្រប់គ្នាសុទ្ធតែបានយល់ស្រប។ ខ្ញុំយល់បើខ្ញុំជាអាជ្ញាកណ្ដាលក៏សម្រេចចិត្តដូចគ្នាក្នុងស្ថានភាពនោះ ប៉ុន្តែនៅពេលអ្នកមើលឡើងវិញ ផ្នែកប្រអប់ជើងខាងក្នុងរបស់គេនោះអត់មានកម្លាំងទេ”។

Liverpool នឹងធ្វើដំណើរទៅជួប Newcastle ក្នុងការប្រកួតសប្ដាហ៍ទី៣ នៃក្របខណ្ឌ Premier League ដែលមានផ្សាយបន្តផ្ទាល់ផ្ដាច់មុខនៅលើកញ្ចក់ទូរទស្សន៍ CTN នាថ្ងៃអាទិត្យ ទី២៧ ខែសីហា ឆ្នាំ២០២៣ វេលាម៉ោង ១០:២៥ នាទីយប់តទៅ៕

អត្ថបទទាក់ទង