Pep Guardiola ត្រឡប់មកបញ្ជាកូនក្រុមក្នុងការប្រកួតរបស់Man City ក្រោយវះកាត់ឆ្អឹងខ្នង

Premier League
September 14th, 2023 (2 years)
576 Views
Share

លោក Pep Guardiola អ្នកចាត់ការទូទៅរបស់ Manchester City បានត្រលប់មកក្លិបវិញ បន្ទាប់ពីបានជាសះស្បើយពីការវះកាត់ឆ្អឹងខ្នង នៅទីក្រុង Barcelona ប្រទេសអេស្ប៉ាញ។

អ្នកចាត់ការសញ្ជាតិអេស្ប៉ាញរូបនេះ បានដឹកនាំការហ្វឹកហាត់សាជាថ្មីបន្ទាប់ពីកីឡាកររបស់ City បានត្រឡប់ពីជួយក្រុមជម្រើសជាតិរៀងៗខ្លួន ដើម្បីរៀបចំសម្រាប់ការប្រកួតក្រៅដីទល់នឹងក្រុម West Ham ។ លោក Guardiola ត្រូវបានរំពឹងថានឹងឈរបញ្ជាកូនក្រុម នៅក្នុងការប្រកួតនេះ បន្ទាប់ពីខកខានការប្រកួតចំនួនពីរ ដោយបានទទួលការវះកាត់ឆ្អឹងខ្នងជាបន្ទាន់។

City រកបាន ៦ពិន្ទុក្រោមការដឹកនាំរបស់លោក Juanma Lillo ដែលដើរតួជាអ្នកចាត់ការជំនួសលោក Guardiola ជាបណ្ដោះអាសន្នក្នុងពីរប្រកួតកន្លងទៅ។ លោកបានដឹកនាំក្រុមឈ្នះក្រុម Sheffield United និង Fulham ។

ក្រុមមេឃខៀវ ប្រមូលបាន ១២ពិន្ទុពេញក្នុង ៤ប្រកួតនៅដើមរដូវកាល២០២៣-២៤នេះ ហើយរំពឹងថានឹងអាចស្វែងរកជ័យជម្នះលើគូប្រកួតនៅទីក្រុងឡុងដ៍ដែលកំពុងបង្ហាញទម្រង់លេងដ៏ល្អមួយ ក្រោមការដឹកនាំរបស់លោក David Moyes ដែលបានជួយឱ្យក្រុមរបស់គាត់ឈ្នះ៣និងស្មើ១ នាថ្ងៃសៅរ៍ ទី១៦ ខែកញ្ញាខាងមុខនេះ៕

អត្ថបទទាក់ទង